¹ Tiniti tani tsapano, Mulungu adalamba wanthu wake? bzvinitenepo lini , nainepo ndine muIzilayeli, mbadwe yaAbrahamu wambumba yaBejameni. ² Mulungu alibe kulamba wanthu wake, awo iye waadasankhula pakuthoma. Mubzvidziwa pale pabzvidanembewa mumanembo paniti, Eliya adang'ngun'uzika kwaMulungu padzulu paIzilayeli? ³ ''Mfumu, apha apolifita wanu ndiye apwanya maalitali yanu. ndiye ndine mbodzi ndasala koma akufuna kundipha.'' ⁴ Mphindulo yaMulungu idati tani kuna iye, ''Ndidabzvichengetela amuna bzviwulu bzvinomwe, awo alibe kugodamila mulungu asili chayiye Bhahali.'' ⁵ Nee nalelo uno kwasala wanthu ango'nong'no awo adasankhuliwa naMulungu thangwe lachifundo chake. ⁶ Koma nakufuna kwachifundo, anisankhula lini nathangwe lamachitidwe yathu, koma thangwe lachifundo chake, Pakuti kusankhula kwaMulungu kuchiyitiwa natangwe yamachitidwe yawanthu, nakutenepo kukoma ntima kwake kukhalilini kukoma mtima chaiko. ⁷ Chadidi wanthu chiIzilayeli alibe kuwona chaakapswaga. likhali gulu ling'nong''ono lawanthu awo akadasankhula ndiwo adawona chaakhali kupswaga, azinji alibe kumbva kuchemela kwake. ⁸ Ninga kunembewa kwabzvidayitiwa mumanembo kuti, ''' ''Mulungu adayitisa nzelu zawo kuti zikhale zakufa, kuti nemaso yawo yaleke kuwona, pomwe nemakutu yawo yaleke kubvakufika nalelo uno.'' ⁹ Tsapano Dhavheti adati, ''Ngaaphatiwe pomwe ngaateyewe pambuto zaanidyela, ngaagwesewe, ndiye ngaalangiwe. ¹⁰ Maso yawo ngayafungiwe kuti aleke kuwona, ayitiseni kuti alambe achishupika asingapumule.'' ¹¹ Tsapano ndikubvunzeni kuti, '' Ko Ajudha paadaghunkhunthiwa adagwelatu bzvakutaza kulamuka?'' Nee ndibzvo lini, ko nathangwe lakutaza kwawo chipulumuso chidayenda kuwanthu asili wachuJudha, kuti aJudha akhale nacheni. ¹² Chakuyipa chaJudha chidabwelesa madaliso makulu kudziko lentse, umphayi wawo udabwelesa madaliso makulu kuna wale asili aJudha. Madaliso yanizakulilatu kana aJudha wentse afakiwambo mugulu limweli? ¹³ Ndikulewa-lewa tsapano kunaimwepo asili aJudha, pakuti ndine Muapostola kuna asili aJudha, Ndini peleka zikomo kwaMulungu thangwe labasa la adandipasa kuti ndiyite. ¹⁴ Ndiniyita bzvimwebzvi kuti wanthu wadzinza langu akhale nacheni, peno nanjila yimweyi ndingapulumuse anango wawo. ¹⁵ Pakuti paakadalambiwa wanthu wapadziko lapantsi, adasanduliwa kuchoka muudani kuwa abwenzi wake. Ndikukomedza kwakutani kwabzviniyita, tsapano, kana wentse akazatambiliwa, bzviniyita ninga umoyo wakulamusiwa kuchoka kuipfa. ¹⁶ Kana chimedu chakuthoma chamukate chikapasiliwa kwaMulungu, bzvinilewa kuti mkate wentse wapasiliwa kwaMulungu, ndiye kana midzi yamiti yikapasiliwa kwaMulungu, ndiyembo pomwe mithayi ininga yapasiliwa kwaMulungu. ¹⁷ Minango mithayi yamuti wamuOlive idatyoka, ndiye muthayi wamuti wamuOlive wamuthengo udaphukila pamwepo. Imwepo wanthu asili achiJudha muninga muti umweu wamuOlivi wamuthengo, tsapano muniwonambo umoyo wawo aJudha. ¹⁸ Saka tsopano musabzviwone ninga muli padzulu paawo adatyoka ninga mitayi. Mungadumbe tani, pakuti ndimwe mithayi, mudyesalini mithayi koma midzi ndiyo idyesa imwepo. ¹⁹ Ungati, ''Inde, koma mithayi idatyoka kuti ndiwone mbuto.'' ²⁰ Chadidi angagwatiwe thangwe lakuti alibe kukhulupilila, pamwepo imwepo munilamba mulipo pakuti munikulupilila. ²¹ Kana Mulungu alibe kulekelela aJudha ali iwo mithayi chaiyo, munkhumbuka kuti angakukhululukileni. ²² Apo tiniwona kukoma kwakutonga kwahasha kwaMulungu: Ana hasha kwaawo anyakutaza, koma anamoyo wabwino kwaimwepo kana mukhalamba muli wabwino wake. Koma mukaleka mugwatiwa pomwe. ²³ Neiwo kana akasiya kusakulupilila kwawo, azabwezelewa pomwe pambuto yaakhali. Pakuti Mulungu anikwanisa kuwaikha pomwe. ²⁴ Imwepo wanthu asili achiJudha mudagwatiwa kuchoka pamuOlivhi wamuthengo, ndiye panakuti mukhale pamwepo mudayikiwa pamuOlivhi usili wamuthengo pasili pambuto yanu chaiyo pakuti mumele, Bzvidapusa kuti Mulungu abwezele aJudha pamuti wawo wamuOlivhi, pakuti ndiwo mithayi chaiyo yapamwepo. ²⁵ Pana chadidi chidabisika, adale wangu, chandilikufuna kuti mudziwe, pakuti kana muchidziwa chinikuyitisani kuti musiye kufunga kuti mudachenjela munzelu zanu: Kusaya kukhulupilila kwawanthu wachiIzilayeli kunizalamba lini kuchiyendelela, koma kuzandokhala kwantthawe ing'onong'ono kufikila wanthu wentse asili aJudha wale anifanila kubwelela kwaMulungu akwana. ²⁶ Uku ndiko kupulumusiwa kuzayitiwa Izilayeli, ninga kunembewa kwabzvidayitiwa mumanembo kuti, ''Mpulumusi anizabwela kuchokela kuZiyoni, ndiye anizachosa kuyipa kwentse kunichoka kumbadwe waJakopo. ²⁷ Ndinizayita pomwe chipangano nawo, pamwepo pandizawakhululukila bzvakuyipa bzvawo.'' ²⁸ Pakuti anilamba mafala yabwino, aJudhe ndiadani waMulungu ndiye bzvakomela imwepo asili aJudha. Koma Mulungu achilikukonda aJudha pakuti adaasankhula kale thangwe lachipangano chake kumakholo yawo. ²⁹ Pakuti Mulungu anisandula lini mtima wawo paanenge alata kana kudalitsa. ³⁰ Wanthu asili wachiJudha kale mulube kutetekela kwaMulungu, koma tsapano mudatambila ntsisi zaMulungu tangwe lakuti aJudha alibe kutetekela. ³¹ Munjila ibodzi-bodziyo thangwe lantsisi zamudatambila, aJudha lelowuno alibe kutetekela Mulungu, kuti iwombo pomwe atambilembo ntsisi zaMulungu. ³² Pakuti Mulungu adayita wanthu wentse kuti akhale ninga nyakumangiwa pakuti alibe kumutetekela, adayita bzvimwebzvo kuti awonese chifundo chake kuna wentse. ³³ Yinde, mulungu aniwonesa chifundo chake chikulu, chadidi Mulungu nzelu nakudziwa kwake nkukulu! mbani ngakwanise kulongosola kukumbuka kwake ninga kunembewa kwabzvidachitiwa mumanembo kuti, ³⁴ '''Mbani anidziwa bzvinifunga Mpfumu, mbani anikwanisa kumpasa nzelu ³⁵ Mbani adambosako chinthu Mulungu, kuti Mulungu achipagale?'' ³⁶ Pakuti bzvinthu bzventse bzvinichoka mwayiye. Mphanbvu zake ziniyita kuti bzvinthu bzventse bzvikhale pabodzi, bzvinthu bzventse bzvidakonzelewa iye. kuna Mulungu kukhale nandemela lini nalini. Amen.