¹ Jehova wakambuula kuli Mozesi munkanda ya Sinayi, mumweezi mutaanzi wamwaaka wabili musule kabali bazwa kunyika ya Ijipiti. Wakati, ² "Leka bantu ba Izilayili babambe Pasika kuchiindi chalyo cheelede chamwaaka. ³ Mubuzuba bwakkumi aane bwamweezi uuno, kuchiindi chagoko, mweelede kubamba Pasika muchiindi chalyo cheelede chamwaaka. Muleelede kulibamba, mutobelezye milawu yoonse, akuswiilila mbeta zyoonse zilangene aandilyo." ⁴ Mpawo Mozesi wakaambila bantu ba Izilayili bayelede kubamba Pobwe lya Pasika. ⁵ Mpawo bakabamba Pasika mumweezi mutaanzi, mubuzuba bwakkumi aane bwamweezi, chiindi chagoko, munkanda ya Sinayi. Bantu ba Izilayili bakaswioilizya zyoonse Jehova nzyakalayiilila Mozesi kuti azichite. ⁶ Kwakali bamwi baalumi bakazoosofwaala ankaambo kamutunta wamuntu. Tebakakonzya pe kubambila Pasika oobo buzuba. Bakaya kunembo lya Mozesi a Aloni muli ndi;leelyo zuba. ⁷ Aabo baluumi bakati kuli Mozesi, "Twasofwaala nkaambo kamutunta wamuntu. Nkamboonzi nwatukasya kukupeda chituuzyo kuli Jehova muchiindi cheelede chamwaaka aakati kabantu ba Izilayili?" ⁸ Mozesi wakati kulimbabo, "Amundilinde ndimvwe eezyo Jehova nzyayondilayilila aatala andinywe." ⁹ Jehova wakambuula kuli Mozesi. Wakati, ¹⁰ "Ambuula kubantu ba Izilayili. Wamba kuti, 'Na umwi wanu naba walunyungu lwako wasofwaala ankaambo kamutunta, nekuba bali mulweendo lulamfu, nga uleelede kubamba Pasika kuli Jehova.' ¹¹ Mumweezi wabili mubuzuba bwakkumi aane muchiindi chagoko, bayoolya chilyo cha Pasika. Baleelede kulya mwana wa mbelele wa Pasika antoomwe achinkwa chakachitwa kachitakwe busweezyo aantomwe azisyu zilula. ¹² Tabeelede kusiya nichiba chimwi chayo mane kusika kuseeni, na kupwaya na netuba tufuwa twayo. Baleelede kutobelezya milawu yoonse ya Pasika. ¹³ Pesi kufumbwa muintu utasofweede alimwi katyali mulweendo, pesi ooyo ukachilwa kumba Pasika, ooyo muntu uleelede kugwisigwa kuzwa kubantu bakwe, nkaambo taakwe nakapeda chituuzyo eecho Jehova nchayanda muchiindi cheelede chamwaaka. Ooyo muntu uleelede kulibwezela chibi chakwe. ¹⁴ Na mweenzu wakkala aakati kanu akubamba Pasika kuli Jehova, uleelede kulibamba mbuli mumalayilile aa Pasika alimwi mbuli mumulawu walyo. Muleelede kuba aa malayilile aa kozyania amuzwakule ayooyo wakazyalwa munyika." ¹⁵ Mubuzuba oobo dumba nelyakayakwa, joba lyakavumba dumba, tente lyamilawu yachizuminano. Kuchiindi chagoko joba lyakali aatala lyadumba. Lyakaboneka mbuli mulilo kusikila kuseeni. ¹⁶ Lyakayinkilila anjiyeeyo nzila. Joba lyakavumba dumba akulibonia mbuli mulilo mansiku. ¹⁷ Eelyo joba nilyalikubwezwa kuzwa aajulu lyatente, bantu ba Izilayili balikutalika lweendo lwabo. Eelyo joba mpolyali kwiima, bantu balikukkala. ¹⁸ Akulayila kwa Jehova, bantu ba Izilayili bslikweenda, alimwi akulayilila kwakwe, balikukkala. Chiindi joba nelyayimvwi aatala lya dumba, balikukkala mumisasa yabo. ¹⁹ Eelyo joba nelyakkalilila kwamazuba aatala lya dumba, mpawo bantu ba Izilayili balikuswiilila malayilile aa Jehova akuteenda pe. ²⁰ Chimwi chiindi joba lyalikukkala kwamazuba mache aatala lya dumba. Mukaambo aako, balikuswiilila malayile aa Jehova -balikuyaka musasa akweenda lubo aakulayilila kwakwe. ²¹ Chimwi chiindi jobs lyakaliwo mumusasa kuzwa kuchiindi chagoko kusikila kuseeni. Eelyo joba nelyakali kunyampuka chiindi chakuseeni, bali kweenda. Na lyalikweendelela kwabuzuba akwabusiku, eelyo luzutu joba nelyali kunyampuka nebali kweenda. ²² Nekuba kuti joba lyslikukkala aatala aa dumba, kwamazuba obile, mweezi, nekuba mwaaka, kufumbwa kuti joba lyakkalilila aawo, bantu ba Izilayili balikukkala mumisasa yabo akuteenda pe. Pesi chiindi joba nelyalikutolwa kujulu, balikutalisya lweendo lwabo. ²³ Balikukkala aawo Jehova nalayilila, akweenda kululayo lwakwe. Bakaswiilila malayilile aa Jehova aakapegwa kwiinda muli Mozesi.