¹ Jehova wakambuula kuli Mozesi. Wakati, ² "Chita myeembo yobilwe yansiliva. Pwaya nsiliva kuti wiichite. Mweelede kubelesyamyeembo kukwiita luundu aamwi akwiita luundu kuti lulonzye misasa yalo. ³ Bapayizi baleelede kusiba mweembo kwiita luundu loonse antomwe kunembo kunembo lyako kumulyango wetente lyakubunganina. ⁴ Na bapayizi balizya mweembo lomwe luzutu, eelyo bazululi, basilutwe baluzubo lwa Izilayili baleelede kubungana kulinduwe. ⁵ Nimusibila aajulu mweembo, misasa ili kulubazu lwakujwe ileelede kutalika lweendo lwayo. ⁶ Eelyo walizya lwabili, misasa yakulubazu lwakumusanza ileelede kukkazika lweendo lwayo. Baleelede kusibila mweembo wabo mujulu walweendo lwabo. ⁷ Luundu nilubungana aamwi, mulizye mweembo pesi batalizizyi aajulu. ⁸ Bana balombe ba Aloni, bapayizi, beelede kulizya mweembo. Eechi chinoochitwa mazuba oonse aazyalane lyabantu bako. ⁹ Nimwiinka kunkondo munyika yanu aatala asinkondo umudyaaminizya, mpawo muleelede kuyeezya aamweembo. Ime, Jehova Leza wanu, ndiyomuyeezya akumufutula kuzwa kuli basinkondo nyokwe. ¹⁰ Alimwi, kuzyiindi zyakusekelela, mapobwe woonse aa tobelene akumatalikilo aamweezi, mweelede kulizya mweembo atala lyazipayililo zyakutentela alimwi aatala lyazituuzyo zyanu zyakujatana. Eezi ziyooba ziibaluzyo zyanu kuli ndime, Leza wanu." ¹¹ Mumwaaka wabili, mumweezi wabili, mubuzuba bwamakkumi aabili bwamweezi, joba lyakalinyampukide kuzwa aatala luyadumba lyachizuminano. ¹² Bantu ba Izilayili bakiinkilila kunembo aa lweendo lwabo kuzwa munkanda ya Sinayi. Joba lyakayimikila munkanda ya Palani. ¹³ Bakachita lweendo lwabo lutaanzi, kabatobela mulawu wa Jehova ngubakapegwa mukwiinda muli Mozesi. ¹⁴ Musasa ulimunsi lyandembela lyalunyungu lwa Juda bakanguna kuzwa, kugwisya basilumamba awumwi awumwi. Nasoni mwana mulombe wa Aminadabbu wakazuluda basilumamba ba Juda. ¹⁵ Netanelu mwana mulombe wa Zuwa wakazuluda nkamu yabasilumamba yaluzubo lwalunyungu lwa Isakka. ¹⁶ Eliyabbu mwana mulombe wa Heloni wakazululida nkamu yabasilumamba yaluzubo lwalunyungu lwa Zebbuluni. ¹⁷ Lunyungu lwa Gesomu alwa Melali, ooyo wakalikulanga dumba, wakaselusya dumba akukkazika lweendo lwabo. ¹⁸ Itobela, nkamu yabasilumamba munsi lyandembela yamusasa wa Lubbeni bakakkazika lweendo lwabo. Elizuli mwana mulombe wa Sedewuli wakazulida nkamu yabasilumamba ba Lubbeni. ¹⁹ Selumiyelu mwana mulombe wa Zulisadayi wakazulida nkamu yabasilumamba bamukowa walunyungu lwa Simiyoni. ²⁰ Eliyasafu mwana mulombe wa Deyuwelu wakazulida nkamu yabasilumamba bamukowa walunyungu lwa Gadi. ²¹ Ba Kkohati bakazwa. Bakanyampula zibelesyo zisalala. Bamwi banoonga bakubusya dumba ba Kkohati kabatana kusika kumusasa uutobela. ²² Nkamu yabasilumamba ili munsi aandembela yalunyungu lwa Efuleyimu mbalikutobela. Elisama mwana mulombe wa Amihudi wakazulida nkamu yabasilumamba ba Efuleyimu. ²³ Gamaliyelu mwana mulombe wa Pedazuli wakazulida nkamu yabasilumamba bamukowa walunyungu lwa Manase. ²⁴ Abbidani mwana mulombe wa Gdiyoni wakazulida nkamu yabasilumamba bamukowa walunyungu lwa Bbenjamini. ²⁵ Basilumamba aabo kabakkede munsi lyandembela yalunyungu lwa Dani bakazwa kumamanino. Ahiyeza mwana mulombe wa Amisadayi wakazulida nkamu yabasilumamba ba Dani. ²⁶ Pajiyelu mwana mulombe wa Okkilani wakazulida nkamu yamukowa walunyungu lwa Asa . ²⁷ Ahila mwana mulombe wa Enani wakazulida nkamu yabasilumamba bamukowa walunyungu lwa Nafutali. ²⁸ Eeyi njiyo nzila eeyo basilumamba babantu ba Izilayili njibakeenda aayo mulweendo lwabo. ²⁹ Mozesi wakambuula kuli Hobbabbu mwana mulombe wa Lewuyelu mu Midiyani. Lewuyelu wakali wisi wamukayintu wa Mozesi. Mozesi wakambuula kuli Hobbabbu akwaamba kuti, "Tuli aalweendo lwakuya kubusena oobo Jehova mbwakapanduluula. Jehova wakati, 'Ndiyoobupa kulinduwe.' Muze aamwi andiswe tuyomuchitila bubotu. Jehova wakasyomezya kuchitila Izilayili bubotu." ³⁰ Pesi Hobbabbu wakaamba kuti kuli Mozesi, "Nsikwe kuyookinka aamwi anduwe. Ndiyooyinka kunyika yangu akubantu bangu." ³¹ Mpawo Mozesi wakasandula, "inche kaka utatusiyi. Ulizi kukkala munkanda mbukubede. Weelede kutulanga. ³² Na weenda aawsebo, tuyookuchitila bubotu Jehova mbwachita kulindiswe." ³³ Bakayenda kuzwa kuchilundu cha Jehova kwama zuba aatatu. Bbokesi lyachizuminano cha Jehova lyakayinda kunembo lyabo kwamazuba aatatu kuti likabajanine busena bwakulyookezya. ³⁴ Joba lya Jehova lyakali aajulu lyabo sikati nibakalobweenda. ³⁵ Kumbwa chiindi bbokesi nikanyampuka, Mozesi wakali kuti, "Jehova, nyampuka. Mwaiysya basinkondo nyokwe. Chita aabo batakuyandi kuti bachije kuzwa kulinduwe." ³⁶ Kufumbwa chiindi bbokesi nilyakayimikila, Mozesi wanoonga wati, "Muboole, Jehova, kumakumi aa zyuulu zyazyuulu zyaba Izilayili.