¹ Jehova wakambuula kuli Mozesi. Wakati, ² "Wambuula kuli Aloni. Wamba kuti kulinguwe, 'Malampi ali musanu aaleelede kupa mumuni kunembo lyachibikilo chalampi na wamwinika." ³ Aloni wakachichita eechi. Wakamwinika malampi aachibikilo chalampi kuti kube mumuni kwalyo, mbuli Jehova mbakalayilila Mozesi. ⁴ Chibikilo chalampi chakachitidwe munzila eeyi alimwi Jehova wakatondeezya Mozesi nzila yakuzichita. Chakaleelede kuumwa angolida kuzwa aansi kusika aatala, ankomeki yumidwe mbuli maluba. ⁵ Alimwi, Jehova wakambuula kuli Mozesi. Wakati, ⁶ "Bweza ba Levi kuzwa aakati kabantu ba Izilayili akubasalazya. ⁷ Chita eechi kuli mbabo kuti ubasalazye; sansa maanzi akuboozya aalimbabo. Bachite kuti banyoole mibili yabo yoonse, basanzye zisamo zyabo, alimwi balisalazye. ⁸ Eelyo ubaleke babweze mupule munini wan'ombe achipayizyo chawo chazilyo bwazilyo bunante buvweleene aamafuta. Baleke babweze uumbi mupule wan'ombe munini mbuli chipayizyo chachibi. ⁹ Uyoleta ba Levi kunembo lyatente lyambunganino akuswanana aluundu loonse lwabantu ba Izilayili. ¹⁰ Nuyoleta ba Levi kunembo lya Jehova, bantu ba Izilayili baleleede kubika maanza aabo aba Levi. ¹¹ Aloni weelede kupayilila ba Levi kunembo lya Jehova, mbuli chipayizyo chakuyumba kuzwa kubantu ba Izilayilikuchitila kuti bachite mulimu wa Jehova. ¹² Ba Levi beelede kubika maboko aabo amitwe yabapule ban'ombe. Mweelede kupayizizya mupule wan'ombe umwi kachili chipazyo chachibi alimwi umwi mupule wan'ombe kali chipayizyo chakuumpilizya kuli ndime, kuti kuboozegwe ba Levi. ¹³ Usisye ba Levi kunembo lya Aloni akunembo lyabana bakwe balombe alimwi ubanyapmule mujuli mbuli chipayizyo chakuyumba kuli ndime. ¹⁴ Munzila eeyi weelede kupambukania ba Levi kuzwa aakati kabantu ba Izilayili. Ba Levi bayooba bangu. ¹⁵ Kuzwa waawo, ba Levi baleede kwiinka kuti bakabeleke mutente lyakubunganina. Weelede kubasalazya. Weelede kubapayilila mbuli chipayizyo chakuyumba. ¹⁶ Muchite eechi nkaambo balaba bangu kwalyoonse kuzwa kubantu ba Izilayili. Bayoobweza busena bwa mwana mulombe woonse ujula nzyalilo; bana bataanzi balunyungu loonse lwa Izilayili. Ndabweza ba Levi kuti babe bangu. ¹⁷ Boonse bana bataanzi kuzwa aakati kabantu ba Izilayili mbibangu, boonse bantu na banyama. Mubuzuba mbundakabweza buumi bwabana boonse bataanzi munyika ya Ijipiti, ndakabapambwida kuli ndime kuti babe bangu. ¹⁸ Ndabweza ba Levi kuzwa aakati kabantu ba Izilayili kwiinda kubweza bana bataanzi boonse. ¹⁹ Ndapa ba Levi mbuli chipo kuli Aloni akubana bakwe balombe. Ndakababweza kuzwa aakati kabantu ba Izilayili kuti bachite mulimu yabantu ba Izilayili mutente lyakubunganina. Ndabapa kuti baboozye bantu bangu ba Izilayili kuchitila kuti kutabi penzi liyoopenzya bantu nibayoosika afwaafwi akubusena busalala." ²⁰ Mozesi, Aloni aluundu loonse lwabantu ba Izilayili bakachita eechi aba Levi. Bakachita zyoonse eezyo Jehova nzyakalayilila Mozesi aatala aba Levi. Bantu ba Izilayili bakachita eechi ambabo. ²¹ Ba Levi bakalisalazya mpawo akusanzya zisamo zyabo, alimwi Aloni wakabasisya mbuli chipayizyo chakuyumba kuli Jehova mpawo wakachita kuboozyania kwabo kuti abasalazye. ²² Kuzwa waawo, ba Levi bakanjila mukati kuti bachite mulimu mutente lyakubunganina kunembo lya Aloni akunembo lyabana balombe ba Aloni. Eechi chakali mbuli Jehova mbakali walayilila Mozesi aatala aba Levi. Bakabamba ba Levi boonse munzila eeyi . ²³ Jehova wakambuula lubo kuli Mozesi. Wakati, ²⁴ "Choonse chazeezi nchaba Levi bali amyaaka ili makumi aabili amusanu akwiinda. Beelede kujatana ankamu kuti babeleke mutente lyakubunganina. ²⁵ Beelede kuleka kubeleka munzila eeyi basika kumyaaka ili makumi musanu. Kumyaaka eeyi tabeelede kubeleka limbi pe. ²⁶ Balakonzya kugwasya beenziina beendelela kubeleka mutente lyakubunganina, pesi tabeelede kubeleka limbi. Weelede kubatondeezya ba Levi makani oonse aaya.