1 Lino ndolu lwaano lwa lunyungu lwa Aloni a Mozesi eelyo Jehova naakambula a Mozesi achilundu cha Sinayi. 2 Mazina abana balombe ba Aloni ngaya; Nadabu mutanzi, a Abihu, Eliyaza, a Itamala. 3 Aya ngimazina abana balombe ba Aloni, bapayizi bakananikwa alimwi bakalongezegwa kuti babeleke mbuli bapayizi. 4 Pesi Nadabu a Abihu bakafwa kunembo lya Jehova nibakapeda mulilo utatambuliki munkanda ya Sinayi. Nadabu a Abihu tebakalikwe abana pe, aboobo Eliyaza a Itamala bakabeleka mbuli bapayizi awisi Aloni. 5 Jehova wakambuula kuli Mozesi wakati, 6 ''Eta musyobo wa Levi ubeete kuli Aloni mupayizi kuti bamugwasye. 7 Bayelede kuchita milimu mubusena bwa Aloni aantomwe aluundu loonse kunembo lyatente lyakuswanana. Beelede kubeleka mudumba. 8 Beelede kujata kabotu zyoonse zibelesyo mutente lyakuswanana, alimwi bayelede kugwasya musyobo wa Izilayeli kuchita mulimu wamudumba. 9 Weelede kupa ba Levi kuli Aloni abana bakwe balombe. Bapedwe chakumaninina kuti bamugwasye kubelekela bantu ba Izilayeli. 10 Weelede kusala Aloni abana bakwe balombe mbuli bapayizi, pesi kufumbwa muzwakule utaze aafwifwi weelede kujayigwa. 11 Jevova wakambula kuli Aloni wakati, 12 ''Langa ndabweza ba Levi kuzwa akati kabantu baba Izilayeli. Ndachita eechi muchiindi chakutola mwana mutaanzi mulombe aakati kabantu ba Izilayeli. Ba Levi mbibangu . 13 Boonse bana bataanzi mbibangu. Mubuzuba mbundakawuma boonse bana bataanzi munyika ya Ijipiti, ndakabika aambali mebo boonse bana bataanzi mu Isilayeli, kubikilizya babantu ababanyama. Mbibangu. Ndime Jehova.'' 14 Jehova wakambula kuli Mozesi munkanda ya Sinayi wakati, 15 ''Bala lunyungu lwa ba Levi muli imwi ayimwi mpuli, munzubo zyabo. Bala woonse wachaalumi uli amwezi uumwi wakuzyalwa akwinda.'' 16 Mozesi wakababala, katobelezya ijwi lya Jehova, mbuli mbakalayililwa kuti achite. 17 Mazina abana ba Levi mba Gesyoni, Kohati, a Melali. 18 Nzubo zyakazwa kubana balombe ba Kohati ngu Libbini a Syimeyi. 19 Nzubo zyakazwa kubana balombe ba Geshoni ngu Amulamu, a Izala, a Hebbuloni, a Uziyeli. 20 Nzubo zyakazwa kubana balombe ba Melali bakali Mali, a Musi. Eezi ninzubo zya Levi, mbuzitobelana nzubo anzubo. 21 Nzubo zya ba Libbinayiti azya ba Syimeyiti zizwa ku Gelisyoni. Eezi ninzubo zya ba Gesyoni. 22 Boonse baalumi balaamweezi umwi na kwiinda bakabalwa, kusika kumweelwe 7,500. 23 Nzubo zya ba Gesyoni beelede kukkala kubbazu kububbila kwadumba. 24 Eliyasafu mwana mulombe wa Layeli weelede kuzulwida luzubo lwalunyungu lwa ba Gesyoni. 25 Impuli ya Gesyoni yeelede kulingulula busena bwakuswananina kubikilizya aamwi adumba . Beelede kulingulula kubusena, chakuvumbwa kwacho, aantomwe achisitilizyo chaamulyango chabusena bwakuswananina. 26 Beelede kulingulula masani alengelela aalubuwa, masani abelesegelwe mbuli kumulyango watente lyakubunganina - lubuwa luzyunguluka chikombelo achipayililo amubusena busalala. Beelede kulangalanga tukole twambunganino a zyoonse zili mukati. 27 Eezi ninzubo zizwa kuli Kohati: luzubo lwa ba Amulamu , luzubo lwa ba Izyalati, luzubo lwa ba Hebbuloni, aantomwe aluzubo lwa ba Uziyeli. Zyoonse nzubo eezi zizwa ku ba Kohati. 28 8,600 baalumi bakabalwa bakali amwezi omwe na kwiinda kuti babambe zintu zya Jehova. 29 Nzubo zya Kohati zyeelede kukkala kubusena bwakumusanza bwakudumba. 30 Elizafani mwana mulombe wa Uziyeli weelede kuzulwida nzubo zya ba Kohati. 31 Beelede kubamba bbokesi, tafula, chikazikilo cha lampi, chipayililo, zintu zisalala eezyo zibelesegwa mumilimu yabo, chivumbilizyo, aantomwe amulimu woonse. 32 Eliyaza mwana mulombe wa Aloni weelede kuzulwida baalumi aabo bazulwida ba Levi. Weelede kulangalanga baalumi babamba busena busalala. 33 Nzubo zyobile zyakazwa ku Melali: luzubo lwa ba Mali aluzubo lwa ba Musyi. Eezi nzubo zyakazwa ku Melali. 34 6,200 baalumi bakabalwa bakali amweezi umwi na kwiinda wakuzyalwa. 35 Zuliyeli mwana mulombe wa Abbiheli weelede kuzulwida nzubo zya Melali. Beelede kukkala abusena bwakulubazu lwaku bwiinganyika bwa dumba 36 Ilunyungu lwa Melali lweelede kubamba bubumbwe bwedumba, minkulu yakwiinga, zikazikilo, azibelesyo azimwi zyendelana ambabo, kubikilizya 37 aanjimayima azyaanzikilo zizyunguluka dumba, ampako zyazyo, azilindilindi zyazyo amamanizyo, alimwi amakkole. 38 Mozesi a Aloni alimwi abana babo beelede kukkala kubuzwezuba bwadumba, kunembo bwatente lyakuswanana, kazi kubuzwezuba. Mbibayiminini mukuyozuzikizya milimu yamubusena busalala amilimu yakubantu baIsiyayeli. Kufumbwa muzwakule uyosika mubusena busalala welede kujayigw. 39 Mozesi aAloni bakabala boonse baalumi banzubo zya Levi bakali amweezi umwi akwindilila, mbuli Jehova mbakaamba. Bakabala zyuulu amakumi abili azibili baluumi. 40 Jehova wakati kuli Mozesi, ''Bala boonse bana bataanzi balombe baantu ba Isilayeli abo bali amweezi umwi wakuzyalwa akwiinda. Lemba mazina aabo. 41 Weelede kundetela ba levi - kunze kwa boonse bana bataanzi bana baIsilayeli azivubwa zyaba Levi kusiya bana bataanzi bazivubwa zyalunyungu lwa Izilayeli.'' 42 Mozesi wakabala boonse bana bataanzi ba Isilayeli mbuli Jehova mbwakamulayilila kuchita. Wakabal a bana boonse ba bataanzi baalumi amazina, bala mweezi uumwi akwiinda. 43 Wakabala zyulu zili makumi abili alamyaanda iibili amakumi musanu aabili a baalumi batatu. 44 Alubo, Jehova wakambula kuli Mozesi. Wakati, 45 ''Bweza baLevi kwinda boonse bana bataanzi baIsilayili, ubwezele baLevayiti.'' Zivubwa kusiya zivubwa zyabantu. Balevi mbibangu- ndime Jehova. 46 Weleede kubutania masekeli alimusanu alufutuko wa umwi awumwi basika kumyaandaa myaanda iibili amkumi musanu aayitatu yabama bataanzi ba Izilayili bayiinda kumyeelwe yaba Levi. 47 Welede kubelesya sekeli lyakubusena busalala mbuli mububotu bwakulema kwalyo. Syekeli lyendelana amakumi aabili ama gela. 48 Weleede kupa muulo walufutuko mbuli mbwakaliya kuli Aloni abana bakwe balombe." 49 Mpawo Mozesi wakabungania muliyo wachiyunuzyo kuli baabo bakayindilila mweelwe wababo bakavunwa aba Levi. 50 Mozesi wakabunganizya mali kuzwa kubana batanzi babantu ba Izilayili. Wakabungania chuulu chimwi amyaanda itatu ilamakumi musanu ayimwi amusanu masyekeli, bulemu bwasekeli bwamubusena busalala. Mozesi wakapa mali yalununuko mbuli Aloni akubana bakwe. 51 Mozesi wakachita zyoonse nzyakambilidwe kuchita kwiinda kujwi lya Jehova, mbuli Jehova mbakamulayilila