¹ Jehova wakati kuli Aloni, ''Iwe, bana bako balombe, alimwi lunyungu lwabasikale bako muzoozyiiminina zibi zyoonse nzibakachita aabusena bwakukombela busalala. Pesi iwe luzutu a bana bako balombe bali aanduwe muyoyiiminina zibi zyoonse zyakachitwa awumwi uuli mubupayizi. ² Mbuli kuli baabo benzinyokwe bamukowa wa Levi, mukowa wabasikale bako, weelede kuyobeeta aantomwe anduwe kuti bwaswaanane anduwe alimwi bakagwasizye muchiindi eelyo iwe a bana bako balombe nimuyoobeleka kunembo lyatente lyachizuminano chamilawu. ³ Beelede kukubelekela alimwi atente lyoonse. Nikubaboobo, tabeelede pe kusika afwifwi kufumbwa kuchintu chili mubusena busalala na chijatanisigilwe achipayililo, nakuti bo alimwi alubo we muyoofwa. ⁴ Beelede kuswanaana anduwe alimwi babambe kabotu tente lyakuswaninana, a woonse mulimu uujatanisya tente. Muzwakule tayelede kukuswena afwifwi pe. ⁵ Weelede kwiiminina busena busalala alimwi a chipayililo kuchitila kuti kunyema kwangu kutasiki kubantu ba Izilayeli lubo. ⁶ Langa, mebo lwangu ndakasala benzinyokwe ba ba Levi kuzwa aakati kamazyalane aba Izilayeli. Aaba babachipo kulinduwe, bapegwa kuli kulindime kuti bachite mulimu ujatanisya kutente lyakuswaninana. ⁷ Pesi luzutu iwe alimwi abana bako balombe mulakonzya kubeleka kubupayizi kulangilila kuzintu zyoonse zijatanisigilwe achipayililo alimwi zyoonse zintu zilimukati kachisitikizyo. Inywe lwanu mweelede kuzuzikizya milimu eeyo. Kufumbwa muzwakule uuswena afwifwi uleelede kujayigwa.'' ⁸ Mpawo Jehova wakati kuli Aloni, ''Langa, ndakupa mulimu wakutambula zipayizyo zyabunganisigilwa ndime, azyoonse zipayizyo zisalala eezyo bantu ba Izilayeli nzibapa kulindime. Ndapa eezi zipayizyo kulinduwe alimwi akubana bako balombe mbuli chaabilo nchiinkilila aanembo. ⁹ Eechi chiyooba chako kuzwa kuzintu zisalala eezyo zyabambwa kuzwa kumulilo. Kuzwa kulizyoonse zipayizyo zyabo - zipayizyo zyoonse zyazilyo, zipayizyo zyoonse zyachibi, zipayizyo zyoonse zyamilandu - zipambwidilidwe kulinduwe alimwi akubana bako balombe. ¹⁰ Eezi zipayizyo zilasalala loko; boonse baalumi beelede kuzilya, nkaambo zilasalala kulindinywe. ¹¹ Eezi nzipayizyo zitabe zyenu, zibikidwe kumbali kuzwa kulizezyo zipo zyabo zyakuvukuuzya zyabantu ba Izilayeli. Ndazipa kulinduwe, kubana bako balombe, alimwi kubana bako basimbi, mbuli chibeela chako chalyoonse. Boonsd basalidwe kusalala mumpuli yanu baleelela kulya kufumbwa zipayizyo eezi. ¹² Woonse mafuta mabotu, yoonse iwayini impya alimwi azilyo zipya, amichelo mitaanzi eeyo bantu njibandipa - zyoonse zintu eezi ndazipa kulinduwe. ¹³ Butebuzi butaanzi kulizyoonse zilimunyika yabo, nzibayeta kulindime, ziyooba zyako. Woonse uusalala mumpuli yako uleelela kuzilya eezi zintu. ¹⁴ Choonse chintu chipedekezegelwe mu Izilayeli chiyooba chako. ¹⁵ Zintu zyoonse zijulila luzyalo, boonse bana bataanzi aabo bantu mbibapayizya kuli Jehova, boonse babantu alimwi abanyama, bayooba bako. Nikubaboobo, bantu beelede kuunununa boonse bana balombe bataanzi babanyama batasalali. ¹⁶ Eezyo zyoonse ziyandikana kuulwa lubo abantu zyeelede kuulwa kazili zyaba aamweezi womwe kukomena. Mpawo bantu balakonzya kuziboozya akuzyuula, kumuulo wamasyekeli aali musanu, mukulema kulimumweelo wa syekeli lyamubusena bwakukombela busalala, lyeelene a magela alimakkumi obilwe. ¹⁷ Pesi bana bataanzi ben'ombe, na bana bataanzi bembelele, na bana bataanzi bempongo - tamweelede pe kuunununa banyama aaba; basalilidwe kuli ndime. Weelede kusansiila gazi lyazyo aachipayililo alimwi utente mafuta aazyo mbuli chipayizyo chachitwa amulilo, mweema uubotezya kuli Jehova. ¹⁸ Inyama yazyo iyooba yako. Mbuli lukkolo lunyampwidwe a chibelo chakuchilisyo, nyama yazyo iyooba yako. ¹⁹ Zyoonse zipayizyo zisalala eezyo bantu nzibapedekezya kuli Jehova, ndazipa kulinduwe, alimwi akubana bako balombe akubana bako basimbi bali aanduwe, mbuli chaabilo chako chiinkilila aanembo. Nchizuminano chitamani chamwinyo, nchizuminano chaanga chitamani, kunembo lya Jehova kulinduwe alimwi akulunyungu lwako luli aanduwe.'' ²⁰ Jehova wakati kuli Aloni, ''Tokoyoojana lukono munyika yabantu, nikuba kujana chaabilo chalubono aakati kabantu. Ndime chaabilo chako alimwi lukono lwako aakati kabantu ba Izilayeli. ²¹ Kulunyungu lya Levi, langa, ndapa zyoonse zyakkumi muli Izilayeli mbuli lukono lwabo mukubozezya kunchito nzibachita mukubeleka kutente lyakuswaninana. ²² Kuzwa lino kaziya kunembo bantu ba Izilayeli tabeelede kuswena afwifwi atente lyakuswaninana, nkaambo balachiiminina chibi eechi akufwa. ²³ Ba Levibeelede kuchita mulimu uujisini kutente lyakuswaninana. Beelede kwiiminina kufumbwa chibi chilimpawo. Eechi uyooba mulawu utamani kusikila kumazyalane abantu bako. Aakati kabantu ba Izilayeli tabeelede kujana lukono. ²⁴ Nkaambo zyakkumi zyabantu ba Izilayeli, eezyo nzibapa mbuli zio kulindime - nzizyo nzyepa ba Levi mbuli lukono lwabo. Nkinkaako nchindakaamba kuti kulimbabo, 'Tabeelede kujana lukono aakati kabantu ba Izilayeli.''' ²⁵ Jehova wakaambuula kuli Mozesi alimwi wakati, ²⁶ ''Weelede kwaambula kuba Levi alimwi utedi kulimbabo, 'Eelyo notambula kuzwa kubantu ba Izilayeli chekkumi nchindapa kulinduwe kuzwa kulukono lwako, uyopa chipo kuzwa kulinchicho kuli Jehova, chekkumi chachekkumi. ²⁷ Chipo chako chiyobwezwa anduwe mbuli kuti nchekkumi chazilyo kuzwa kulubuwa lwakupolela na butebuzi bwawayini kuzwa kuchisinino chamasaansa. ²⁸ Aboobo weelede kupa kuli Jehova kuzwa kuli zyakkumi zyoonse nzyotambula kuzwa kubantu ba Izilayeli. Kuzwa kulinzizyo weelede kupa chipo kuli Aloni mupayizi. ²⁹ Kuzwa kuzipo zyoonse nzyotambula, weelede kupa kuli Jehova. Weelede kuchita eechi kuzwa kuzintu zyoonse zibotu alimwi akuli zisalalisya zinoli zyapegwa nduwe.' ³⁰ Aboobo weelede kwaamba kuti kulimbabo, 'Eelyo nopedekezya chibotu kulizyoonse, mpawo zyeelede kupegwa ba Levi mbuli butebuzi buzwa kulubuwa lwakupolela alimwi akuchisinino chamasaansa. ³¹ Uyookonzya kulya zyoonse zipo zyako zizwa kufumbwa busena, iwe alimwi ampuli zyako, nkaambo mufolo wako mukubozezya kumulimu wako mutente lykuswaninana. ³² Tokoyooba amulandu kukulya alimwi akukunywa eechi, na wapedekezya kuli Jehova zibotu zyazeezyo nziwatambula. Pesi towelede kusofwaazya zipayizyo zisalala zyabantu ba Izilayeli, na uyoofwa.'''