¹ Lino Kkola mwana mulombe wa Iza mwana mulombe wa Kkohati mwana mulombe wa Levi, kabali aa Datani a Abbilamu bana balombe ba Eliyabbu, a Oni mwana mulombe wa Peleti, lunyungu lwa Lubbeni, wakabuta bamwi baalumi. ² Bakabukila Mozesi, aantomwe abamwi baalumi kuzwa kubantu ba Izilayeli, 250 bazululi baluundu aabo bakazibikene loko muluundu. ³ Bakalibungania aamwi aantomwe kuti biinkile Mozesi a Aloni. Bakati kulimbabo, ''Mwaya kule loko! Loonse luundu lulipambwidwe, boonse umwi awumwi wabo, alimwi Jehova uli aakati kabo. Nkaambonzi nimulisumpula aatala abamwi baluundu lwa Jehova?'' ⁴ Eelyo Mozesi nakamvwa eezi, wakalala wavundama. ⁵ Wakaambula kuli Kkola akuli boonse mbakali aabo, ''Kuseni Jehova uyoozibisya aabo bali bakwe alimwi ooyo upambwididwe nguwe. Uyooyeta ooyo muntu afwifwi anguwe. Ooyo ngwayosala uyoomweta afwifwi anguwe mwini. ⁶ Chita eechi, Kkola alimwi akabunga kako koonse. Mukabweze zitentelo zyatununkilizyo ⁷ junza alimwi mukabike amulilo a tunumkilizyo mulinzizyo kunembo lya Jehova. Ooyo umwi Jehova ngwatasale, ooyo muntu uyoobambilwa kuli Jehova. Mwaya kule loko, inywe lunyungu lwa Levi.'' ⁸ Alubo, Mozesi wakati kuli Kkola, ''Lino swiilizya, inywe nolunyungu lwa Levi: ⁹ nchintu chiniini na kulindinywe kuti Leza wa Izilayeli wakamwaanzanisya kuzwa kuluundu lwa Izilayeli, kuti amweete afwifwi anguwe mwini, kuchita mulimu mudumba lyakukombela lya Jehova, alimwi kuti mwiime kunembo lyaluundu akubamanina milimu bo? ¹⁰ Wakamweeta afwifwi, alimwi anzubo zyako zyoonse, lunyungu lwa Levi, aantomwe anduwe, anikuti ulikuyandula bupayizi ayebo! ¹¹ Nkikaako iwe ankamu yako mwabungana aantomwe kubukila Jehova. Ngwani Aloni ooyo ngumutongawuka aatala anguwe?'' ¹² Mpawo Mozesi wakiita Datani a Abbilamu, bana balombe ba Eliyabbu, pesi bakati, ''Tatukooza pe. ¹³ Nchitu chiniini na kuti wakatweeta kuzwa kunyika ikunka malili a buchi, kuzotujaya swebo munkanda? Lino uyanda kulichita mweendelezi aatala andiswe! ¹⁴ Mukuyungizya, tewatweeta munyika iikunka malili a buchi, nikuba kutupa swebo myuunda alimwi myuunda yamasaansa mbuli lukono. Lino uyanda kutoofwazya azisyomezyo zyako zyabuyo? Tatukooza kulinduwe.'' ¹⁵ Mozesi wakanyema loko alimwi wakati kuli Jehova, ''Utakalemeki chipo chabo. Takwe nindabweza mbongolo yomwe kuzwa kulimbabo, alimwi takwe umwi wabo ngundakachisa pe.'' ¹⁶ Mpawo Mozesi wakati kuli Kkola, ''Junza iwe ankamu yako yoonse muleelede kwiinka kunembo lya Jehova - iwe ambabo, a Aloni. ¹⁷ Umwi awumwi wanu weelede kubweza chitentelo chatununkilizyo chakwe alimwi abike tununkilizyo mulinchicho. Mpawo umwi awumwi muntu weelede kweeta kunembo lya Jehova chitentelo chakwe chatununkilizyo, 250 (myaanda iibili amakkumi ali musanu) zitentelo zyatununkilizyo. Iwe a Aloni, lubo, mweete zitentelo zyatununkilizyo umwi awumwi.'' ¹⁸ Akaako mwaalumi woonse wakabweza chitentelo chatununkilizyo chakwe, bakabika mulilo milinzizyo, kwayalwa tununkilizyo mukati, alimwi bakiimikila boonse amulyango kutente lyakuswanana aantomwe a Mozesi a Aloni. ¹⁹ Kkola wakabungania luundu loonse akwiiminana aatala a Mozesi a Aloni amulyango watente lyakuswanana, alimwi bulemu bwa Jehova bwakaboneka ku luundu loonse. ²⁰ Mpawo Jehova wakaambua kuli Mozesi alimwi akuli Aloni: ²¹ ''Amulyaanzanie lwenu kuzwa kuluundu oolu kuchitila kuti ndikonzye kubanyonyoona chakufwambaana.'' ²² Mozesi a Aloni bakavundamika masyu aabo aansi alimwi bakati, ''Leza, Leza wamyuuya yoonse yabantu, na umwi muntu wabisya, kujana ulanyemena luundu loonse na?'' ²³ Yawe wakasandula kuli Mozesi. Wakati, ²⁴ ''Ambuula ku luundu. Tedi, 'Zwa kuzwa kumatente aa Kkola, Datani, a Abbilamu.''' ²⁵ Mpawo Mozesi wakanyampuka akwiinka kuli Datani a kuli Abbilamu; bapati ba Izilayeli bakamutobela. ²⁶ Wakaambula ku luundu alimwi wakati, ''Lino muzwe mumatente aababa bantu basofweede alimwi mutagumi kufumbwa chintu chabo, nkaambo mwachita oobo muyoonyonyooka azibi zyabo zyoonse.'' ²⁷ Aboobo luundu kulubazu loonse lwa Kkola, Datani a Abbilamu lwakabasiya. Datani a Abbilamu bakazwa aanze alimwi bakiimikila amilyango yamatente aabo, aantomwe abanakazi babo, bana babo balombe, alimwi abana babo. ²⁸ Mpawo Mozesi wakati, ''Acheechi muyooziba kuti Jehova wandituma kuti ndichite milimo yoonse eeyi, nkaambo tensi ndiichita mukuyanda kwangu. ²⁹ Na bantu aaba bafwa lufu mbuli mbukufwigwa kale, mpawo Jehova unoli tanditumide pe. ³⁰ Pesi na Jehova walenga chimwi chipya, alimwi nyika yajula mulomo wayo akubamena, aantomwe anzibalaazyo zyoonse, alimwi bayiinka aansi kabachipona mu Syiyoli, mpawo muleelede kumvwisisisya kuti aaba baalumi bakanyansya Jehova.'' ³¹ Mpawompawo Mozesi mbakamana kwaambula majwi aaya, nyika yakajulika kunsi lyabaalumi aabo. ³² Nyika yakajula mulomo wayo alimwi yabamena, mpuli zyabo, alimwi aboonse bantu bakalikuzwa kuli Kkola, kubikilizya zyoonse nzibakali aazyo. ³³ Akaako bo alimwi azyoonse nzibakali aazyo zyakaya aansi kazipona mu Syiyoli. Nyika yakajala aatala aambabo, alimwi bakamana kuzwa kuluundu. ³⁴ Boonse ba Izilayeli bakabazyungulukide bakachija nibakamvwa kulila kwabo. Bakakwiila chakoompolola, ''Amwi inyika ilatumena aswebo!'' ³⁵ Mpawo mulilo wakazwa kuli Jehova alimwi wajaya baalumi bali 250 aabo bakapede tununkilizyo. ³⁶ Alubo Jehova wakaambula kuli Mozesi alimwi wakati, ³⁷ ''Ambuula kuli Eliyeza mwana mulombe wa Aloni mupayizi alimwi ngakabweze zitentelo zyatununkilizyo kuzwa kumabangabanga aamulilo, nkaambo zitentelo zyatununkilizyo zipambwidilidwe kulindime. Mpawo mumuleke amwayuule makkala aayaka kulekuke. ³⁸ Bweza zitentelo zyatununkilizyo zyabaabo basweekelwa buumi bwabo nkaambo kachibi chabo. Ngazikachitwe zikabe ndido zipwayidwe mbuli zyakuvumba aatala achipayililo. Aabo baalumi bakalizipede kunembo lyangu, akaako zipambwidilidwe kuli ndime. Chiyooba chitondezyo chabuliwo bwangu kubantu ba Izilayeli.'' ³⁹ Eliyeza mupayizi wakabweza zitentelo zyatununkilizyo zya mukkuba eezyo zyakali kubelesegwa aabaalumi aabo bakatentwa, alimwi bakapwayigwa kuba zijazyo zya chipayililo, ⁴⁰ kuba chiyeezyo kubantu ba Izilayeli, kuchitila kuti kutabi uzwa aanze utali walunyungu lwa Aloni uyokonzya kuza akutenta tununkilizyo kunembo lya Jehova, kuti batakabi mbuli Kkola akabunga kakwe - mbuli Jehova mbakalayilila kwiinda muli Mozesi. ⁴¹ Pesi chifumo chitobela loonse luundu lwabantu ba Izilayeli bakatongawuka aatala a Mozesi a Aloni. Bakati, ''Mwajaya bantu ba Jehova,'' ⁴² Mpawo zyakachitika, eelyo luundu nilwakabungana aamwi kubukila Mozesi a Aloni, kuti bakalanga kutente lyakubunganina alimwi, mulange, ijoba lyakalilivumbide. Bulemu bwa Jehova bwakaboneka, ⁴³ alimwi Mozesi a Aloni bakasika kunembo lya tente lyakuswanana. ⁴⁴ Mpawo Jehova wakaambula kuli Mozesi. Wakati, ⁴⁵ ''Inka kule kuzwa kunembo lya luundu oolu kuchitila kuti ndibanyonyoone chakufwambana.'' Mpawo Mozesi a Aloni bakavundamina aansi amasyu aabo. ⁴⁶ Mozesi wakati kuli Aloni, ''Bweza chitentelo chatununkilizyo, bika mulilo mulinchicho kuzwa kuchipayililo, bika tununkilizyo mulinchicho, chitole ku luundu chakufwambaana, alimwi uchite chakumana milandu yabo, nkaamb bukkali buyobuza kuzwa kuli Jehova. Chiyoosyo chatalika.'' ⁴⁷ Akaako Aloni wakachita bmuli mumalayilile a Mozesi. Wakachijaana kunjila aakati kaluundu. Chiyoosyo chakatanguna kuzulila aakati kabo bantu, aboobo wakabika chitentelo chatununkilizyo alimwi akumana milandu yabantu. ⁴⁸ Aloni wakiimikila aakati kabafwide abachipona; munzila eeyi chiyoosyo chakiimikila. ⁴⁹ Aabo bakajayigwa achiyoosyo bakali 14,700 (zyuulu zilikkumi azine zili aamyanda ili musanu ayibili) mumweelwe, kunze kwabaabo bakafwa mukaambo ka Kkola. ⁵⁰ Aloni wakabweeda kuli Mozesi kumulyango watente lyakuswanana, alimwi chiyosyo chakamana.