1 Mpawo Jehova wakaambula kuli Mozesi. Wakati, 2 ''Ambuula kubantu ba Izilayeli alimwi uteedi kulimbabo, 'Eelyo mwakuyinka munyika oko nkomuyookkala, eeyo Jehova njayomupa, 3 muleelede kuyobamba chituzyo chamulilo kuli Jehova, nikuba chituzyo chakutentwa na chipayizyo chakuzuzikizya chizuminano na kuti chituzyo chakulimvwida, na kuti chituzyo chamapobwe anu, kuti zigwisye mweema uununkilila kuli Jehova kuzwa kutanga lya n'ombe na lyambelele. 4 Muleelede kupa kuli Jehova zituzyo zyakutentwa aantomwe azituzyo zyazilyo zyakkumi zya chisuwo chazilyo bunante bwachibunge buvwelenganisigilwe achipanzi chomwe mulizine zyakankuli kamafuta. 5 Muleelede lubo kupa achituzyo chakutentwa , na kuti zyachipayizyo, chomwe mulizine zyakankuli ka wayini yachituuzyo chakunywa kumwana wambelele uwmi awumwi. 6 Na kolikupa chituuzyo chamugutu wambelele, uleelede kubamba chituuzyo chazilyo zipanzi zyobile mukkumi zyazisuwo zyabusu bunante bwachibunge buvwelenganisigilwe akapanzi komwe mulizitatu zyakankuli kamafuta. 7 Kuchituuzyo chakunywa, muleelede kupa chipanzi chomwe mulizitatu zyakankuli kawayini. Chiyoogwisya bweema bununkilila kuli Jehova. 8 Eelyo nemubambila mupule wan'ombe mbuli chipayizyo chakutentwa na mbuli chipayizyo chakuzuzikizya chikonke, na kuti mbuli chipayizyo chabulyidilano kuli Jehova, 9 mpawo uleelede kupa aantomwe amupule chituuzyo chazipanzi zyotatwe mukkumi zyazisuwo zyabusu bunante bwachibunge buvwelenganisigilwe aachisela chakankuli kamafuta. 10 Muleelede kupa mbuli chipayizyo chakunywa chachisela chakankuli kawayini, mbuli chipayizyo chichitidwe amulilo, kuti chigwisye bweema bununkilila kwa Jehova. 11 Cheelede kuchitwa munzila eeyi kuli umwi awumwi mupule wan'ombe, mugutu atubelele twaalumi na kuti mpongo niini. 12 Choonse chipayizyo nchemubamba akupa cheelede kuchitwa mbuli mbukwaambidwe aawa. 13 Boonse bakazyalilwa muchisi beelede kuchita zintu eezi muleeyi nzila, eelyo kufumbwa muntu nayeta chipayizyo chichitidwe amulilo, kuti chigwisye bweema bununkilila kuli Jehova. 14 Na muzwakule ulikkede andinywe, nikuba kufumbwa uukkala aakati kanu kumazyalane woonse abantu banu, weelede kuchita chipayizyo chakutentwa kukuchitila Jehova mweema uununkilila. Uleelede kuchita mbuli mbumuchita. 15 Kweelede kuba mulawu womwe uukozyania waluundu alimwi awamuzwakule uukkala andinywe, mulawu walyoonse kumazyalane aabantu bako boonse. Mbuli mbobede, abbobo mbubo alubo silyeenda mbayelede uukkala andinywe. Uleelede kuchita mbuli mbomuchita kunembo lya Jehova. 16 Mulawu ukozyania a malayilile ayelede kubeleka kulindinywe akumuzwakule ngumukkala aawe.''' 17 Lubo Jehova wakaambuula kuli Mozesi. Wakati, 18 ''Ambuula kubantu ba Izilayeli alimwi uteedi kulimbabo, 'Eelyo mwakusika munyika ooko nkwesikamutole, 19 eelyo mwakulya kulya kuzwa munyika , muleelede kuyoopa chituuzyo akucheeta kulindime. 20 Kuzwa kubufunke bwabusu bwachibunge butaanzi muleelede kupa chibunge kuti muchifufumune mbuli chipo chakufufumunwa kuzwa kuchipolelo. Muchifufumune muleeyi nzila. 21 Muleelede kundipa chipo chifufumikidwe kwiinda kumazyalane abantu banu kuzwa kubufunke bwanu butaanzi. 22 Chimwi chiindi muyoobisya kamutakanzide kuchita oobo, eelyo nimwataswiilila malayilile woonse ngindaambula kuli Mozesi - 23 zyoonse nzindamulayilila kwiinda muli Mozesi kuzwa mubuzuba mbundakasanguna kumupa malayilile akumazyalane woonse abantu banu. 24 Kukaambo kakubisya kamutakanzide luundu kalutazizi, mpawo luundu loonse lweelede kupa mupule muniini mbuli chipayizyo chakutentwa chigwisya bweema bununkilila bwa Jehova. Aantomwe achechi kweelede kupangwa chipo chazilyo alimwi achipo chazyakunywa, mbuli mbukulayililidwe mumabambe, ampongo ndyalumi mbuli chipo chachibi. 25 Mupayizi weelede kusalazya luundu lwabantu ba Izilayeli. Bayoolekelelwa nkaambo chibi chakaba chakulubizya. Beeta chipayizyo chabo, chipayizyo chachitwa amulilo kulindime. Beeta chipayizyo chabo chachibi chakutaziba kulindime. 26 Mpawo luundu loonse lwabantu ba Izilayeli luyoolekelelwa, alimwi lubo amazwakule bakkede aambabo, nkaambo boonse bantu bakabisya kabatakanzide. 27 Na muntu wabisya katakanzide, mpawo weelede kupa mpongo ndyanakazi iili amunyaka womwe mbuli chipayizyo chachibi. 28 Mupayizi weelede kusalazya muntu wabisya kunembo lya Jehova katakanzide. Ooyo muntu uyoolekelelwa kusalazigwa kwaakuchitwa. 29 Mweelede kuba amulawu ukozyanua kuli yooyo uuchita chintu katachikanzide pe, mulawu ngumwi biyo wamuzwakule mubamtu ba Izilayeli amuzwakule wakkala mukati kabo. 30 Pesi muntu uchita chintu munzila ikazya, naba muzyalwe wamuchisi nanka abe muzwakule, ulipa kalezaleza kulindime. Ooyo muntu weelede kugwisigwa aakati kabantu bakwe. 31 Akaambo kakuti walangilila aansi majwi aangu akutyola malayilile angu, muntu ooyo weelede kwaandilwa aato. Chibi chakwe chinoli alinguwe.''' 32 Aawo bantu ba Izilayeli nibakali munkanda, bakajana muntu nkabungika zisamu mubuzuba bwa Sabata. 33 Aabo bakamujana bakamweeta kuli Mozesi, Aloni, alimwi akuluundu loonse. 34 Bakamubamba mu chitookesi nkaambo tekwakalinaambwa pe kuti kuchitwa biyeni aatala anguwe. 35 Mpawo Jehova wakati kuli Mozesi, ''Mwaalumi ooyo nchobeni weelede kujayigwa. Loonse luundu lweelede kumutulula mabwe aanze aagunzi.'' 36 Aboobo loonse luundu lwakamweeta aanze aagunzi alimwi bakamutulula mabwe wafwa mbuli Jehova mbakali walayilila Mozesi. 37 Alubo Jehova wakaambula kuli Mozesi. Wakati, 38 ''Ambuula kubana ba Izilayeli alimwi ubalayilile kuti balipangile beni zyaanzikilo zyakukobekela kuzwa kumipimpito yazisamo zyabo, kuzikobeka kuzwa kuluumwi mupimpito antambo yamuteme. Beelede kuchita eechi kumazyalane woonse aabantu babo. 39 Chiyooba chiyeezyo chiyandisi kulindinywe, eelyo mwayoochilanga, kumilawu yangu yoonse, kukwabweza kuchitila kuti mutakalilangi mumyoyo yanu a kuumenso aanu alimwi akuchita bumambe nobeni kulimbabo. 40 Muchite eechi kuchitila kuti muchibike mumiyeyo alimwi mubambe milawu yangu yoonse, alimwi kuti musalale, kubambilwa ndime, Leza wenu. 41 Ndime Jehova Leza wanu, wakamweeta kuzwa munyika ya Ijipiti, kuzooba Leza wanu. Ndime Jehova Leza wanu.''