¹ Mansiku aayo luundu lwakalila chakoompololesya. ² Boonse bantu bakanyansya Mozesi a Aloni. Iluundu loonse lwakati kulimbabo, ''Tupeekezya kuti nitwakafwidilide munyika ya Ijipiti, nikuba omuno munkanda! ³ Nkaambonzi Jehova natweeta munyika eeyi kuzoofwa aapanga? Ibanakazi besu abana besu baniini bazooba basaalwe. Tachili mbubo na kuti tubwede ku Ijipiti?'' ⁴ Bakati kuli umwi awumwi, ''Atusale uumbi muzululi, alimwi tubwede ku Ijipiti.'' ⁵ Mpawo Mozesi a Aloni bakalala chakuvundama kunembo lya mbungano yaluundu lwa bantu ba Izilayeli. ⁶ Josyuwa mwana mulombe wa Nuni a Kkelebbu mwana mulombe wa Jefune, bakali bamwi babaabo bakatumidwe kuyootwela nyika, bakadelula zizwato zyabo. ⁷ Bakaambula kuluundu loonse lwabantu ba Izilayeli. Bakati, ''Inyika njitwakiinda munlunjiyo akwiibona ninyika mbotu loko. ⁸ Na Jehova wabotelwa andiswe, mpawo uyotutola kunyika mbotu alimwi akiipe kulindiswe. Inyika ikunka malili a buchi. ⁹ Pesi mutabukili Jehova, alimwi mutakayowi bantu bali munyika, nkaambo bo nchilyo kulindiswe. Chitabilizyo chabo chiyogwisigwa kulimbabo, nkaambo Jehova uli andiswe. Mutabayowi.'' ¹⁰ Mpawo nkamu yoonse bakaamba batulilwe amabwe. Pesi bulemu bwa Jehova bwakaboneka aatente lyakuswaninana kubantu boonse ba Izilayeli. ¹¹ Jehova wakati kuli Mozesi, ''Kuyoosika lili bantu aaba kabachindinyansya? Kuyoosika lili kabachikachilwa kundisyoma, kutalanga zyoonse zitondezyo zyanguzu zyangu eezyo nzindakachita aakati kabo? ¹² Ndiyobawumya malwazi, nsikoyobapa lukono, alimwi ndikachite kuzwa kumukkowa wanu beni chisi chipati alimwi chili anguzu mpati kwiinda mbuli mbubabede.'' ¹³ Mozesi wakati kuli Jehova, ''Na mwachita eechi, mpawo bana Ijipiti bayoomvwa aatala anchicho, nkaambo wakavuna bantu aaba kuzwa kulimbabo anguzu zyako. ¹⁴ Bayozyambila kubakkali benyika iino. Bakamvwa kuti iwe, Jehova, uliwo aantomwe abantu aaba, nkaambo ulabonwa busyu kubusyu. Ijoba lyako lyiima aatala abantu besu. Uleenda kunembo lyabo mumusumpuululu wajoba mubuzuba alimwi mumusumpuululu wamulilo mansiku. ¹⁵ Lino na wajaya bantu aaba mbuli uumwi muntu, mpawo manyika akamvwa mpuwo yako ayowambula alimwi bakatedi, ¹⁶ ''Nkaambo Jehova takoyootola bantu munyika njakakonkezya kubapa, wabajaya munkanda.' ¹⁷ Lino, ndakukombelela, belesya manguzu aako mapati. Nkaambo wakaamba kuti, ¹⁸ 'Jehova ulanonoka kunyema alimwi ulakkalilila muluyando lukkalilide. Ulalekelela milandu ansotoko. Takoyookonzya kuyozimazya bubi eelyo nayoyeta chisubulo chachibi chabasikale kulunyungu lwabo, kuyosika kuzyalane lyatatu alimwi alyane.' ¹⁹ Indulula, ndakukombelezya, eechi chibi chabantu akaambo kabupati bwakusyomeka kwachizumina chako, mbuli mbwakali kulekela kale bantu bantu aaba kuzwa kuchiindi nibakali mu Ijipiti kusikila lino.'' ²⁰ Jehova wakati, ''Ndabalekelela mbuli muchikumbizyo chako, ²¹ pesi chakasimpe, mbuli mbechipona, alimwi mbuli nyika yoonse mbiyoozuzigwa aabulemu bwangu, ²² boonse bantu aabo bakabona bulemu bwangu a zitondezyo zyanguzu nzindakachita ku Ijipiti a munkanda - bakandisunka kwazyiindi zili kkumi akutaswiilizya ijwi lyangu alimwi tebakaswiilizya ijwi lyangu. ²³ Akkako nchobeni takwe nibatakabone nyika aatala anjiyo eeyo njindakasyomezya kuli basikale babo. Takwe naba omwe ooyo wakandisampawula uyoyibona, ²⁴ kunze kwamulanda wangu Kkelebbu, nkaambo uli aamuya usiyene alimwi ulanditobela me amoyo wakwe woonse. Ndiyoomweta oomo munyika mwakabede, alimwi lunyungu lwakwe luyotola chaabilo chanjiyo. ²⁵ (Lino ba Amaleki aba Kkenani bakali kukkala mumumpata.) Junza amubwede alimwi mukayinke munkanda anzila ya Lwizi lwa Matete.'' ²⁶ Jehova wakaambula kuli Mozesi alimwi akuli Aloni. Wakati, ²⁷ ''Kukabe lili nkechiba amoyo mulamfu aatala aluundu lubi oolu lundinyansya? Ndakamvwa kutongawuka kwabantu ba Izilayeli aatala andime. ²⁸ Amba kuti kulimbabo, ''Mbuli mbechipona,' mbwaamba Jehova, 'mbuli mbumwakaamba kumatwi angu, ndiyoochita eechi kuli ndinywe: ²⁹ Mitumba yanu iifwide iyowida munkanda, moonse nimwakatongawuka aatala andime, inywe nimwakabalwa ku kabalwebalwe, yoonse myeelwe yabantu kuzwa kuminyaka iili makkumi aabili akuya kujulu. ³⁰ Nchobeni tamukoyonjila munyika njindakamusyomezya kuti mukachite muunzi wanu, kunze kwa Kkelebbu mwana mulombe wa Jefuni a Josyuwa mwana mulombe wa Nuni. ³¹ Pesi bana banu baniini aabo mbimwakaamba kuti mbibatakalobe, ndiyobanjizya munyika. Bayoyimvwa nyika njimwakakaka! ³² Mbuli ndinywe, mitumba yenu iifwide iyowida munkanda. ³³ Bana benu bayooba beembezi munkanda kwaminyaka ili makkumi one. Beelede kubweza mpindu yanchito zyenu zyakupanduka kuyosikila kumamanino aamitumba yenu munkanda. ³⁴ Mbuli kumyeelwe yamazuba ngimwakabweza kukutwela nyika - mazuba aali makkumi one, muleelede mbubo kubweza mpindu yaczibi zyanu kwaminyaka ili makkumi one - munyaka omwe kuzuba lyomwe, alimwi mweelede kuziba kuti chili buti kukazyania andime. ³⁵ Ime, Jehova, ndaambula. Nchobeni ndiyochita eechi kuluundu lubi oolo lubungene aantomwe kukubukila ndime. Bayogwisigwa chakumaninina, alimwi aano bayoofwa.''' ³⁶ Aboobo baalumi Mozesi nbakatumide kuyotwela nyika, aabo bakaboola alimwi bachita luundu loonse kuti lutonawuke aatala a Mozesi akumwaya mulumbe mubi aatala anyika - ³⁷ aaba baalumi bakeeta mulumbe mubi aatala anyika bakawisigilwa aansi, alimwi bakafwa achilwazi kunembo lya Jehova. ³⁸ Kuli baabo baalumi bakayinka kukutwela nyika, luzutu Josyuwa mwana mulombe wa Nuni a Kkelebbu mwana mulombe wa Jefune mbibakasyaala kabali bawumi. ³⁹ Eelyo Mozesi nakaamba majwi aaya kubantu boonse ba Izilayeli, bakalila kapati. ⁴⁰ Bakabuka chifumofumo kuseni akwiinka aatala achilundu alimwi bakati, ''Langa, tuli aano, alimwi tuzooyinka kubusena Jehova mbwakatusyomezya, nkaambo twakabisya.'' ⁴¹ Pesi Mozesi wakati, ''Nkaambonzi nimwanyongania mulawu wa Jehova? Tamukoyoozwidilila pe. ⁴² Mutayinki, nkaambo Jehova tali andinywe pe kukumukwabilila kuzwa ku kuzundwa kuzwa kuli basinkondonyokwe. ⁴³ Ba Amaleki a ba Kkenani nkubali, alimwi muyojayigwa apanga nkaambo mwazwa kukutobela Jehova. Aboobo takoyooba andinywe pe.'' ⁴⁴ Pesi bakakakatila kutanta kweenda kuya munyika yachilundu; nikubaboobo, pe pe Mozesi nikuba bbokesi lyachizuminano cha Jehova lyakazwa kumusasa. ⁴⁵ Mpawo ba Amaleki bakaseluka aansi, alimwi ama Kkenani bakali kukkala mutulundu ooto. Bakalwisya ma Izilayeli alimwi bakabazunda yoonse nzila kusika ku Homa.