¹ Mpawo Jehova wakaambuula kuli Mozesi. Wakati, ² ''Tuma bamwi baalumi bakatwele nyika ya Kkenani, eeyo njindakapa bantu ba Izilayeli. Tuma muntu kuzwa kumusyobo umwi awumwi wakumawisi aabo. Muntu umwi awumw weelede kuba muzuluzi aakati kabo.'' ³ Mozesi wakabatuma kuzwa kunkanda ya Palani, kuchitila kuti baswiilile malayilile a Jehova. Boonse bakalibazuluzi aakati kabantu ba Izilayeli. ⁴ Aaya ngaakali mazina aabo: kuzwa kumusyobo wa Lubbeni, Syamuya mwana wa Zakka; ⁵ kuzwa kumusyobo wa Simiyoni, Safati mwana wa Holi; ⁶ kuzwa kumusyobo wa Juda, Kkalebbu mwana wa Jefune; ⁷ kuzwa kumusyobo wa Isakka, Igalu mwana wa Jozefu; ⁸ kuzwa kumusyobo wa Ifulemu, Hosiya mwana wa Nuni; ⁹ kuzwa kumusyobo wa Bbenjamini, Paliti mwana wa Lafu; ¹⁰ kuzwa kumusyobo wa Zebbuloni, Gadiyeli mwana wa Sodi; ¹² kuzwa kumusyobo wa Jozefu (kwaamba kuti, kuzwa kumusyobo wa Manase), Gachi mwana wa Susi; ¹¹ kuzwa kumusyobo wa Dani, Amiyeli mwana wa Gemali; ¹³ kuzwa kumusyobo wa Asya, Setu mwana wa Mikkayeli; ¹⁴ kuzwa kumusyobo wa Nafutali, Nabbi mwana wa Vopisi; ¹⁵ kuzwa kumusyobo wa Gadi, Gewule mwana wa Maki. ¹⁶ Aaya ngimazina abaalumi aabo Mozesi mbakatuma kuyotwela nyika. Mozesi wakayita Hosiya mwana wa Nuni uli aazina lya Josyuwa. ¹⁷ Mozesi wakabatuma kuti bakatwele nyika ya Kkenani. Wakati kulimbabo, ''Mukanjilile ku Negevi alimwi mukayinke kunyika yachilundu. ¹⁸ Mukayitwele nyika mukabone kuti ilibiyeni. Mukabalangisisye bantu bakkala mumo, kuti balisimide na tabasimide, kuti mbache na na mbayingi. ¹⁹ Mukayilange nyika mbiibede ooko nkubakkala. Nimbotu na na nimbi? Ngaali madolopo aali nkuko? Alimbuli misasa na, na madolopo aakwabililidwe? ²⁰ Mukayilange kuti ninyika ilibiyeni, na nimbotu kukulima zilimwa na pe. Mube aabusichaambo alimwi mukeete zitondezyo zyanyika nzyiigwiya.'' Lino chiindi chakali chiindi chakubizwa kwamasansa mataanzi. ²¹ Aboobo baalumi bakayinka alimwi bakutwela nyika kuzwa kunkanda ya Zini kusikaku Lehobbu, aafwifwi a Lebo Hamati. ²² Bakayinka kuzwa ku Negevi alimwi bakakuusika ku Hebbuloni. Ahimani, Syesyayi, a Talumayi, lunyungu lwa Anakki, bakali nkuko. LinoHebbuloni yakali yayakwa minyaka iilimusanu ayibili kunembolya Zowani mu Ijipiti. ²³ Lino nibakasika ku Mumpata wa Esyikkolu, bakatema mutabi wakali aachimomba cha masansa. Bakawunyampula achisamu aakati kababilimuchibunga chabo. Alubo bakeeta ma pomegilaneti ankuyu. ²⁴ Oobo busena bwakuuzikwa kuti Mumpata wa Esyikkoli, akaambo kachimomba chamasansa bantu ba Izilayeli nchibakatemena aanzi ooko. ²⁵ Nikwakiinda mazuba aalimakkumi one,bakabweeda kuzwa kukutwela nyika. ²⁶ Bakabweeda kuli Mozesi,Aloni, akuluundu loonse lwabantu ba Izilayeli munkanda ya Palani, a Kkadesyi. Bakeeta ijwi kulimbabo akuluundu loonse, alimwi bakabatondezya zizwa munyika eeyo. ²⁷ Bakaambila Mozesi, ''Twakaakusika kunyika ooko nkuwakatutumide. Iloko ilakunka malili abuchi. Nchechi chimwi chizwa mumo. ²⁸ Nekubaboobo, bantu bachita myuunzi yabo nkuko balisimide. Madolopo aaboalikwabililidwe alimwi mapatiloko. Alubo ooko twakabona lunyungu lwa Anakki. ²⁹ Ba Amaleki bakkala mu Negevu. Ba Hiti, ba Jebbusi, a ba Amoni bali aamyuunz yabo munyika yaachilundu. Ba Kkenani bakkala kumbali lya lwizi alimwi a mu Mulonga Jodani.'' ³⁰ Mpawo Kkalebbu wakuumuzya bantu bakali kunembo lya Mozesi alimwi wakati, ''Atwiinke alimwi tukabweze nyika, nkaambo iloko tulakonzya kwiizunda.'' ³¹ Pesi bamwi baalumi mbakiinkide aabo bakati, '''Tatukonzyi kubalwania bantu nkaambo balisimide kwiinda ndiswe mbutubede.'' ³² Aboobo bakamwaya mulumbe uutasungwaazyi pe kubantu ba Izilayeli aatala anyika njibakatwela. Bakati, ''Nyika njitwakalanga ninyika iilya bakkali bamumo. Bantu boonse mbitwakabona nkuko mbantu balamfu loko. ³³ Oko twakabona mabbabbani, lunyungu lwa Anakki, bantu bakazwakumabbabbani. Mukubona kwesu twakali mbuli maduuntila nitwakalyeezyanisya ambabo, alimwi mbubo mbutwakabede kumenso aabo, lubo.''