¹ Jesu naakabona makamu makamu wakatanta aachilundu. Nakakkala, basikwiiya bakwe bakaza kulinguwe. ² Eelyo wakabbanuna mulomo wakwe, wakabayiisya kati, ³ "Bali aachoolwe bachete mumuuya, nkaambo bwami bwakujulu mbubwabo. ⁴ Bali achoolwe aabo balila, nkaambo bazowuumuzigwa. ⁵ Bali achoolwe aabo babombe, nkaambo bazoovuba nyika. ⁶ Bali aachoolwe aabo bali aanzala nzala anyota yabululami ankaambo kakuti bazookkuta. ⁷ Bali achoolwe basiluse nkaambo abalabo bayoolujana. ⁸ Bali achoolwe aabo basalala mumoyo nkaambo bazoomubona Leza. ⁹ Bali aachoolwe ba siluumuno nkaambo bazootegwa mbana ba Leza. ¹⁰ Bali aachoolwe aabo bapenzegelwa bululami nkaambo Bwami bwakujulu mbubwabo. ¹¹ ''Muli aachoolwe na bantu bamutukila akumupenzya akumutamikizya zintu zyoonse zibi akaambo kangu. ¹² Amukondwe akubotelwa nkaambo bulumbu bwanu bwakujulu mbupati. Mbubonya oobo mbubakapenzya basinsimi bakaliwo. ¹³ Muli munyo wanyika. Pesi na munyo wasampuka, ulweezegwe buti lubo? Tuuchikwe mulimu pe, kwasyaala kuti usowegwe. ¹⁴ Muli mumuni wanyika. Muunzi uuyakidwe aachilundu tuukonzyi kusisigwa. ¹⁵ A nibayasya chimunisyo bantu tabachivumbi pe. Pesi balachibika aachibikilo kuti chibe aantanganana, chimunikile boonse bali mung'anda. ¹⁶ Mumuni wanu nguumunike kunembo lyabantu munzila yakuti babone milimu yanu mibotu, balemeke Wuso uli kujulu. ¹⁷ ''Mutayeeyi kuti ndazida kuzoojaya mulawu nibaba basinsimi. Teendazida kuzijaya pe eezi, ndazida kuzizuzikizya. ¹⁸ Ndamwaambila kasimpe, julu anyika ziyooloba pesi jwi lyangu talilobi pe kuzwa kumulawu mane zintu zyoonse zikachitwe. ¹⁹ Nkikaako umwi awumwi uusotoka umwi wamilawu eeyi, akuyiisya bamwi kuchita boobo, uyoonyansigwa mu Bwami bwakujulu. Pesi ooyo uyilomya, akuyiisya bamwi kuchita boobo uyoosumpulwa mu Bwami bwakujulu . ²⁰ Nkaambo ndamwaambila kuti, bululami bwanu bwatayinda bwa balembi abwaba Falisi, tamukanjili kale pe mu Bwami bwakujulu. ²¹ ''Mwakamvwa kale mbubakaambilwa ba sikale, 'Utajayi,' alimwi, 'Ooyo uujaya uyoobetekwa.' ²² Pesi ndiliikumwaambila kuti ooyo uunyemena munyina uyoobetekwa. Alimwi ooyo uusampawula munyina iyoomubeteka nkamu, pesi ooyo utukila uyoopya mulilo wa gehena. ²³ Nkikaako na koli kupa chipo aa chipayiliilo, mpawo wazooyeya kuti munyoko uli aakambo anduwe, ²⁴ siya chipo chako kunembo lyachipayililo ubweede saansi ku munyoko mukamaninsizyanie notazoope. ²⁵ Fwambaana kuzuminana a sikukupa mulandu kamuchiyobuya ku nkuta, nkokuti sikukupa mulandu atakutoli kumubetesi, nkaambo mubetesi uyookupedekezya kuli ba simulinda ntolongo batakakuwaale muntolongo. ²⁶ Kasimpe ndakwaambila kuti tokoyoozwa pe do mane ukamaninizye kuliya. ²⁷ Mwakamvwa mbukwakaambwa kuti, 'Utachiti bumambi.' ²⁸ Pesi ndamwaambila kuti ooyo weemuzya mwanakazi wachita kale bumambi anguwe mumoyo wako. ²⁹ Na liso lyako lyalulyo lyakulebya, linonkole usowe. Kuli mbubo kunyonyookelwa chizo chimwi kwiinda kuti mubili woonse ukasowelwe mu gehena. ³⁰ Na kuboko kwako kwa lulyo kwakulebya, kugonke usowe. Kuli mbubo kunyonyookelwa chizo chimwi kwiinda kuti mubili woonse ukasowelwe mu gehena. ³¹ Kwakaambwa lubo kuti, 'Kufumbwa uuleka mukakwe amupe lugwalo lwakumuleka.' ³² Pesi ndamwaambila kuti woonse uuleka mukakwe kunze kwakuti wajatwa mu bumambi, wamuchita mumambi. Kufumbwa uutazomukwate kali walekwa, waba sibumambi alakwe. ³³ ''Alubo mwakamvwa zyakaambilidwe basikale kuti, 'Utakonki chakubeja, pesi zuzikizya zikonke zyako ku Mwami.' ³⁴ Pesi ndamwaambila kuti mutakonki pe nikuba abuniini, nikuba a julu nkaambo nchuuno cha Bwami cha Leza. ³⁵ Nikuba a nyika nkaambo nchilyatililo chamawulu aakwe, nikuba a Jelusalemu, nkaambo muunzi wa Mwami mupati. ³⁶ Nikuba kukonka a mutwe wako, nkaambo tokonzyi kusandula nikaba komwe kanzeta kasusu kuti katube na kasiye. ³⁷ Kwaamba kwanu akube, 'Iyii, iyii', na 'Pe, pe.' Zyoonse zyiinda eechi zizwa kumubi. ³⁸ Mwakamvwa mbukwakaambwa kuti, 'Linso kulinso, a linyo ku linyo.' ³⁹ Pesi ndamwaambila kuti mutakazyanii amuntu mubi. Pesi muntu ooyo ukuuma seya lyalulyo, mupe a lyakuchimweensi. ⁴⁰ Na umwi walombozya kutolaana aayebo kunkuta mpawo wakubwezela chikobela chako, muleke abweze achibaki. ⁴¹ Kufumbwa uukumanikizya kweenda musinzo wa mayili yomwe, enda aawe kwa mamayili aabili. ⁴² Pa kufumbwa uukukumbila, utamukakili waza kukuzookumbila. ⁴³ Mwakamvwa mbukwakaambwa kuti, 'Yanda mweenzinyokwe, pesi sinkondonyokwe umusule. ⁴⁴ Pesi ndamwaambila kuti amubayande basinkondonyokwe, mubakombele bamupenzya, ⁴⁵ nkokuti mube bana ba Wuso uli kujulu. Nkaambo ulapasuzya zuba kubabi akubabotu alimwi ulawisizya mvula kuli boonse baluleme abataluleme. ⁴⁶ Na mwayanda aabo bamuyanda, mujana bulumbuunzi? Sena basimutelo tabachiti boobo na abalabo? ⁴⁷ Na kojuzya be lyako luzutu, nzeezili nzochita kwiinda bamwi? ⁴⁸ Nkikaako amumaninine mbuli Wuso uli kujulu mbamaninide.