¹ Milimu yanu yabululami mutayichitili kubonwa aabantu. Mwachita oobo takwe bulumbu mbumuyoojana pe kuzwa kuli Wuso wa kujulu. ² Aboobo nimupa zipo mutalizyi mweembo mbuli mbubachita ba sikuupawupa muzikombelo a munzila kuti balumbayizigwe abantu. Nchobeni ndamwaambila kuti balijene kale bulumbu. ³ Pesi nopa zipo, kuboko kwachimweensi kutazibi ziliikuchitwa akwalulyo ⁴ kuchitila kuti chipo chako chipegwe mukusisikizya. Wuso uubona zisisikene uyookulumbula. ⁵ Nimukomba mutabi mbuli ba sikuupawupa nkaambo balayanda kukomba kabiimvwi muzikombelo a muzyooko zyanzila kuti babonwe abantu. Nchobeni ndamwambila kuti balijene kale bulumbu bwabo. ⁶ Pesi nokomba njila mung'anda yako ulijalile ukombe kuli Wuso uuli kusitikene, mpawo uyookulumbula. ⁷ Nimukomba mutanoobwanti chakwiindulula majwi aabuyo mbuli mbubachita ba masi, nkaambo bayeeya kuti balamvwigwa mukubwanta kwabo. ⁸ Nkikaako, mutabi mbuli mbabo, Wuso ulikujulu ulizi zintu zyonse nzimubula kamutana kumukumbila. ⁹ Amukombe boobu: 'Taata wesu uuli kujulu, alilemekwe izina lyako. ¹⁰ Abuze Bwami bwako. Aluchitwe luyando lwako, aansi aano mbuli kujulu. ¹¹ Utupe sunu kulya nkutubula. ¹² Utulekelele milandu yesu, mbuli mbutulekelela batubisizya. ¹³ Utuvune kukusunkwa, utukwabilile kumubi. Nkaambo Bwami mbubwako anguzu, abulemu, mane kukabe kutamani. Ameni. ¹⁴ Nkambo mwalekelela bantu ndubizyo zyabo alakwe Wuso ulikujulu ulamulekelela. ¹⁵ Pesi mwatabalekelela ndubizyo zyabo, alakwe Wuso uuli kujulu takoyomulekelelwa. ¹⁶ Nimulyiimya kulya mutabi mbuli ba sikuwupawupa, nkaambo balawungumana akuusisya masyu aabo kuti baboneke kubantu mbubalyiimya kulya. Nchobeni ndamwaambila kuti balijene kale bulumbu bwabo. ¹⁷ Pesi nolyiimya kulya, samba ¹⁸ kuti kulyiimya kwako kutalibonii kubantu, pesi kuli Wuso uuli kusisikene. Wuso uubona zisisikene uyookulumbula. ¹⁹ Mutaliyobwedi lubono aansi aano, aawo mapempe abulala mpuzinyonyoona, ababbi mpubanjila kuti babbe. ²⁰ Pesi muliyobwede lubono lwakujulu ooko mapempe abulala nkuzitanyonyooni, ababbi nkubatanjili kuti babbe. ²¹ Ooko kuli lubono lwako, amoyo wako nkuubede. ²² Linso nchimunisyo chamubili. Aboobo na linso lyako kalili bbotu mubili woonse ulazula mumuni. ²³ Pesi na linso lyako kalilibbi, mubuli woonse uzwide mudima. Aboobo, na mumuni uli muli nduwe kuli mudima, nchobeni mudima mupati! ²⁴ Taakwe uukonzya kubelekela ba simalelo babili nkaambo ulasula umwi ayande umwi nikuba kulipeda kuli umwi anyansye umwi. Tokonzyi kubelekela Leza, abuvubi. ²⁵ Nkikaako ndamwaambila kuti utalikataazyi aatala abuumi bwako kuti uyoolyaanzi na uyoonywaanzi; nikuba aatala amubili wako kuti uyoosamaanzi. Buumi bwako mbupati kwiinda kulya, amubili kwiinda zizwaato. ²⁶ Kamulanga tuyuni. Tatubyali, tatutebuli, nakuyobola, pesi Wuso wakujulu ulatusanina. Sena toli muyandisi kwinda ntuto na? ²⁷ Ngwani akati kenu ukonzya kuyungizya mazuba akupona akulibilika nikuba kakokola komwe? ²⁸ Alimwi nkamboonzi mulalibilikila zyakusama? Amuyeeye malubaluba amumyuunda mbwaamena, taabeleki, taaluki pe. ²⁹ Pesi ndamwaambila kuti naba Solomoni mu bulemu bwakwe boonse takakonzya kusama mbuli limwi lyawo. ³⁰ Na Leza kasamika boobu masokwe aamulusaka, aanga mpaali sunu, junza asowelwa mubbibi, sena takayindilizyi na kumusamika nobalusyomo luniini? ³¹ Nkikaako mutalikataazyi akwaamba kuti, 'Tuyolyaanzi, tuyonywaanzi, na tuyosamaanzi?' ³² Eezi nzeziyandulwa abamaasi alimwi Wuso wakujulu ulizi kuti mulaziyanda. ³³ Pesi amusangune kuyandula Bwami bwa Leza abululami bwakwe, eelyo zintu eezi zyoonse ziyoyungizigwa kulinduwe. ³⁴ Aboobo mutalikatazyi azya juunza, nkaambo bwejunza bulalikatazizya. Bumwi abumwi buzuba buli amapenzi aabo.