¹ Mpawo Jesu wakazulwidwa a Muuya kuya munkanda kuti akasunkwe a dyabbulosi. ² Lino naakalyiimya mazuba makkumi aane amansiku ali makumi aane, wakamvwa nzala. ³ Sikusunka wakasika akwaamba kuti kulinguwe, ''Na koli mwana wa Leza, layilila mabwe aaya kuti abe zinkwa.'' ⁴ Pesi Jesu wakasandula akwamba kuti kulinguwe, ''Kulilembedwe kuti, 'Muntu taponi achinkwa luzutu, pesi ajwi lyoonse lizwa kumulomo wa Leza.''' ⁵ Mpawo dyabbulosi wakamutola mumuunzi uusalala, aansonge yang'anda ya Leza, ⁶ akwaamba kuti kulinguwe, ''Na koli mwana wa Leza, liwaalile aansi, nkaambo kulilembedwe kuti, 'Uyoolayilila bangelo bakwe kuti bakubambe,' alimwi, 'Bayokubaka mumaanza aabo, kuti utakalyuuminini aabbwe.'''' ⁷ Jesu wakamwaambila kuti, ''Alubo kulilembedwe kuti, 'Utasunki Mwami Leza wako.''' ⁸ Alubo dyabbulosi wakamutola kukalundu kalamfu akumutondeezya bwami boonse bwanyika abulemu bwabo boonse. ⁹ Wakamwaambila kuti, ''Zyoonse zintu eezi ndakupa, na wandivundamina akundikomba.'' ¹⁰ Mpawo Jesu wakamwaambila kuti, ''Zwaawa, Saatani! Nkaambo kulilembedwe kuti, 'Uyookomba Mwami Leza wako, akukutawukila nguwe luzutu.''' ¹¹ Eelyo dyabbulosi wakamusiya, mpawo ba angelo bakaza bamukutawukila. ¹² Lino Jesu naakamvwa kuti Joni waangwa, wakanjila mu Galili. ¹³ Wakazwa mu Nazaleti akulongela ku Kkapenawumu iilikumbali lya Lwizi lwa Galili, mubusena bwa Zebbuluni a Nafutali. ¹⁴ Eechi chakachitika kuzuzikizya chakaambwa amusinsimi Isaya kuti, ¹⁵ ''Nyika ya Zebbuluni a Nafutali iiteenkene amulonga Jodani, koya ku lwizi Galili, busena bwa bamasi! ¹⁶ Bantu bakakkede mumudima a baabo bakakkede mucheenzule cha lufu bakangweemukilwa.'' ¹⁷ Kuzwa kuli eecho chiindi Jesu wakatalika kukambawuka kati, ''Amusanduke, nkaambo Bwami bwakujulu bwaba afwiifwi.'' ¹⁸ Naakali kweenda kunkomwe ya Lwizi Galili, wakabona Sayimoni utegwa Pita amwana wakwabo Endulo, bakali kuwaala tunsabwe mulwizi, nkaambo bakali bazubi babaswi. ¹⁹ Jesu wakati kuli mbabo, ''Amuze munditobele, ndikamuchite bazubi babantu.'' ²⁰ Mpawo aawo bakasiya tunsabwe bamutobela. ²¹ Mbaakiinda aawo wakabona Jemusi amwana wa kwabo Joni, bana ba Zebbedi. Bakali mubwaato awisi kabaliikusuma tunsabwe twabo. Wakabayita, ²² mpawo bakasiya wisi mu bwaato batobela Jesu. ²³ Jesu wakeenda mu Galili yoonse, kayobuyiisya mu zikombelo, kakambawuka makani mabotu aa Bwami akusilika misyobo yoonse yamalwazi amachise aakali mubantu. ²⁴ Impuwo yakwe yakasaalila mu Siliya yoonse, alimwi bantu bakeeta boonse bakali kuchiswa misyobo misyobo yamalwazi amachise. Abaabo bakanjidwe myuuya mibi, basizisuntu, abayuminide mibili, Jesu wakabasilika. ²⁵ Makamu makamu aakazwa ku Galili, ku Dekkapolisi, ku Jelusalemu, ku Judiya, amutala aa Jodani akamutobela Jesu.