¹ Mumazuba aayo Joni Mubbizyi wakasika kakambawuka munkanda yaku Judiya kaamba kuti, ² ''Amusanduke, nkaambo Bwami bwakujulu bwaba afwiifwi.'' ³ Nkaambo ooyu ngonguwe wakaambwa amusinsimi Isaya kuti, ''Ijwi lya yooyo woompolola munkanda, 'Mululamike nzila ya Mwami, mululamike nzila zyakwe.'''' ⁴ Lino zisamo zya Joni zyakachitidwe aaboya bwa nkamela, kasama bbanti lyachikumba muchibuno chakwe. Wakali kulya nsozi abuchi bwamusokwe. ⁵ Mpawo bantu boonse bamu Jelusalemu, bamu Judiya, abamuzilikiti zyoonse zizyungulukide mulonga wa Jodani bakayinka kulinguwe. ⁶ Bakabbizigwa anguwe mu Mulonga Jodani, kabalyaamba zibi zyabo. ⁷ Pesi naakabona ba Falisi bayingi abasimulawu kabaza kulinguwe kuti ababbizye, wakabaambila kuti, ''Inywe nobana ba chipile, ngwani wakamuchenjezya kuchija bukali buza? ⁸ Muzyale michelo yeelela kusanduka. ⁹ Mutanooyenani kamuti, 'Abbulahamu ngu taata wesu.' Nkaambo ndamwaambila kuti Leza ulakonzya kusandula mabwe aaya abe bana ba Abbulahamu. ¹⁰ Kabikwa kale kaleba kumiyanda yaminsamu. Aboobo minsamu yoonse iitazyali michelo mibotu ilagonkoolwa akuwalwa mumulilo. ¹¹ Ndamubbizya mumaanzi mbuli chitondeezyo chakusanduka kwenu. Pesi ooyo uuza musule lyangu ulaanguzu kwiinda ndime, alimwi tandeelede nikuba kwaangununa ndyatyo zyakwe. Uyoomubbizya mu Muuya Uusalala a mumulilo. ¹² Ulijisi chipupuluzyo mumaanza aakwe kuti akukule lubuwa lwakwe akupupulula buungu kuzwa kubulotwe, abunganie bulotwe mung'anda yachiyobwedo. Pesi uyowumpa buungu amulilo uutazimiki pe.'' ¹³ Mpawo Jesu wakasika kuzwa ku Galili akuya ku Mulonga Jodani kuti akabizigwe a Joni. ¹⁴ Pesi Joni wakasyeezye kumukakila, kaamba kuti, ''Ndiyanda kubbizigwa anduwe, ani waza kulindime biyeni?'' ¹⁵ Jesu wakamuvwiila wati, ''Chizuminine kwalino, nkaambo kuleelede kuti tuzuzikizye bululami boonse.'' Mpawo Joni wakamuzumizya. ¹⁶ Musule lyakubbizigwa, Jesu wakazwa mumaanzi, amulange, julu lyakajulika kuli nguwe. Wakabona Muuya wa Leza kaseluka akukkala alinguwe mbuli nziba. ¹⁷ Amulange, ijwi lyakazwa kujulu kalyaamba kuti, ''Ooyu Mwana wangu ngundiyandisya. Ndilabotelwa anguwe.''