¹ Musule lya kuzyalwa kwa Jesu mu Bbetelehemu yaku Judiya mumazuba aa Mwami Helodi, baalumi basongo bazwa kujwe bakasika mu Jelusalemu kabaamba kuti, ² ''Ulikuli ooyo wakazyalwa kali Mwami waba Juda? Twakabona nyenyeezi yakwe kujwe alimwi twaza kuzomukomba.'' ³ Aawo Helodi Mwami nakamvwa eechi chakamukatazya, abantu boonse mbakali aabo mu Jelusalemu. ⁴ Helodi wakababungania boonse bapayizi bapati a balembi babantu, wabuzya, ''Nkuukuli Kkilisito nkwayelede kuzyalilwa?'' ⁵ Bakamwambila kuti, ''Mu Bbetelehemu yamu Judiya, nkambo mbukulembedwe amusinsiimi, ⁶ 'Pesi webo Bbetelehemu, muchisi cha Juda toli munini pe aakati kabendelezi baJuda, nkambo kuzwa kulinduwe kuyozwa Mweendelezi, uyoyembela bantu bangu Izilayeli.'' ⁷ Mpawo Helodi chakusisikizya wakiita baalumi basongo kuti abuzye, nchiindinzi loko nyenyezi niyakaboneka. ⁸ Wakabatuma ku Bbetelehemu wati, ''Kamuya mukamulangulisisye muvwanda. Na mwakumujana, muzondaambile nkokuti ambebo nzomukombe. ⁹ Naakagozya kwaambuula Mwami, bakeenda anzila yabo, ayilayo nyenyeezi njibakabwene kujwe yakabazulwida kusikila yakwiima aatala abusena aawo muvwanda mpakabede. ¹⁰ Nibakabona nyenyeezi, bakabotelwa loko. ¹¹ Bakanjila mung'anda bamubona muvwanda antoomwe a Meli, banyina. Bakavundama akumukomba. Bakapasununa buvubi bwabo mpawo bamupa zipo zya ngolide, tununkilizyo a mili. ¹² Leza wakabachenjezya kumaloto kuti batabweedi pe kuli Helodi, aboobo bakabweeda kunyika yabo anzila iimbi. ¹³ Kabali beenda, mungelo wa Mwami wakalibonia kuli Jozefu muchiloto akwaamba kuti, ''Buka, bweza muvwanda abanyina, uchijile ku Ijipiti. Ukkale nkuko kusikila ndikwaambile nkaambo Helodi uyoomulanguula muvwanda kuti amujaye.'' ¹⁴ Mansiku ngawo aayo Jozefu wakabuka wamubweza muvwanda abanyina mpawo wanyampuka waya ku Ijipiti. ¹⁵ Wakakkala nkukooko kusikila Helodi wafwa. Eechi chakazuzikizya chakaambwa a Mwami kwiindila kumusinsimi, ''Kuzwa mu Ijipiti ndamwiita mwana wangu mulombe.'' ¹⁶ Mpawo Helodi, naakabona kuti wafubaazikwa abaalumi basongo, wakanyema kapati. Wakatuma lumamba lwakwe kuti lukajaye bana balombe boonse, bakali mu Bbetelehemu amuzisi zyoonse zizyungulukide, bakali aaminyaka iibili yakuzyalwa kaziya aansi, kazyeendelana akuyeeyela nkwaakachita akaambo kazyakachitwa abaalumi aaba. ¹⁷ Mpawo chakazuzikizigwa chakaambwa kwiindila kumusinsimi Jelemiya, ¹⁸ ''Ijwi lyakamvwigwa mu Lama, kulila a koomoka, Lakkeli ulilila bana bakwe, alimwi wakaka kuumbulizigwa, nkaambo tabachiwo pe.'' ¹⁹ Eelyo Helodi naakafwa, langa, mungelo wa Leza wakaboneka muchiloto kuli Jozefu mu Ijipiti akwaamba kuti, ²⁰ ''Buka ubweze mwana a banyina muye ku Izilayeli, nkaambo aabo bakali kuyanda kujaya mwana bakafwa.'' ²¹ Jozefu wakabuka wabweza mwana a banyina, baboola mu Izilayeli. ²² Pesi naakamvwa kuti Akkelosi wakali kweendelezya Judiya aabusena bwa wisi Helodi, wakayoowa kukwiinka. Naakamana kuchenjezegwa a Leza muchiloto, wakazwa waya kuchisi cha Galili ²³ alimwi wakiinka waakukkala mumuunzi utegwa Nazaleti. Eechi chakazuzikizya chakaambidwe kwiindila kubasinsimi, kuti uyooyitwa kutegwa mu Nazalini.