¹ Awo Jesu abasikwiya bakwe nibakasika ku Jelusalema alubo bakakusika ku Bbetipegi, kukalundu ka Olivusi, mpawo Jesu wakatuma basikwiya bakwe bobile, ² wakati kuli mbao, ''Kamuya kumunzi ulikunembo, alimwi muyofwambana kubona donki lyangidwe nkuko, alubo akana kelyo. Mwawangunune mwalete kulindime. ³ Kuti kwaba utabe achakwamba atala angawo, mukambe kuti, 'Mwami ulayanda,'alimwi oyo muntu uyofwambana kumupa ngawo. ⁴ 'Lino kwakaba kuti ezyo zyakali zyambwa kwinda kumusinsimi zizuzikizigwe. Wakati, ⁵ ''Ambila mwana musimbi we Zioni, 'Langa, Mwami wanu ulaza kulindinywe, Ulibombede alimwi ulitantide a donki, Akukana ka donki, mwana we donki.'' ⁶ Mpawo basikwiya bakinka bakuchita mbunya Jesu mbwakabalayililide. ⁷ Bakakuleta donki akana alubo bakabika zikobela zyabo a donki, alimwi Jesu Jesu wakakkala ajulu azikobela. ⁸ Makamumakamu manji akayala zikobela zyabo mumugwagwa, alimwi bamwi bakagonka ntabi zyamisamu akuyobuyala mumugwagwa. ⁹ Mpawo makamu akenda kunembo lya Jesu alubo abaabo bakali kuyobutobela kabayobompolola, ''Hosana kumwana wa Davida !'' Ulongezezegwe ngoyo uuza muzina lya Mwami ! Hosana kuli simajulu !'' ¹⁰ Elyo Jesu nakasika ku Jelusalema, idolopo lyoonse lyakali lyanyonganisigwa akwamba kuti, ''Ngwani oyu ?'' ¹¹ Makamumakamu akasandula, ''Oyu ngu Jesu musinsimi uzwa waku Nazaleta mu Galili.'' ¹² Mpwo Jesu wakanjila mungánda ya Leza. Wakaandilanze boonse abo bakali kuula akuuzya mungánda ya Leza, alubo wakasandamuna matafula abasikuzizya mali alubo azikkalo zyababo bakali kuzya nziba. ¹³ Wakati kulimbabo, ''Kulilembedwe, 'Ngánda yangu iyowambwa kuti ngánda yakukambya; pesi mwayichita kuti ibe chikkalilo chababb.'' ¹⁴ Mpawo mofu achilima bakeza kulinguwe mungánda ya Leza, alubo wakabaponya. ¹⁵ Pesi elyo bapayiza bapati alubo abalembi bamulawu nibakabona zintu nzyakachita, alubo elyo nibakamvwa bana balompolola mungánda yaLeza alubo balamba, ''Hosana kumwana a Davida, ''bakaba akunyema kupati. ¹⁶ Bakati kulinguwe, ''Ulibamvwide na kuti balikutyeni Jesu wakati kulimbabo, ''Iyii ! Pesi takwe nimwakabalide, 'kuzwa kumilomo yabana banini atunyonka wakabamba intembawuzyo'?'' ¹⁷ Mpawo Jesu wakabasiya alubo akuzwa mudolopo lya Bbetani akumana busiku nkuko. ¹⁸ Lino kuseni wakayinka nakali kujokela kudolopo, wakali waba anzala. ¹⁹ Nakabona mukuyu munsi lyamugwagwa, wakayinka kulinguwo akujana kakutakwe chintu kuli nguwo kunze kwamatu. Wakaamba kuti kulinguwo, ''Kutakabi kuti kukabe michelo lubo kuzwa kulinduwe alimbi,'' alubo mponya awo mukuyu wakapusama. ²⁰ Elyo basikwiya nibakawubona, bakagamba akwamba bati, ''Ibiyeni mukuyu wapusama mpawonyaawa ?'' ²¹ Jesu wakasandula akwamba kulimbabo, ''Masimpe ndamba kulindinywe, na mulijisi lusyomo alubo kamutadoneki, tamukwe nimuyochita zyakachitwa amukuyu biyo pe, pesi muyowamba nikuba kuchilundu echi, 'Zyukuka akuwalwa mulwizi; alubo ziyochitika. ²² Kufumbwa nchimuyolomba munkombyo, chakuzumina, muyozitambula.'' ²³ Elyo Jesu nakasika mungánda yaLeza. Bapayizi bapati antomwe abapati babantu bakasika kulinguwe kali mukuyisya basikuti, ''Anguzu nzi nzyochitya zintu ezi, alubo ngwani wakakupa nguzu ezi?'' ²⁴ Jesu wakasandula akwamba kulimbabo, ''Ambebo ndilamubuzya mubuzyo umwi. Na mwandambila, ndiyomwambila kuti nkunguzunzi nzindichitya ezi. ²⁵ Lubbabbatizyo lwaJoni - nkukuli nkulwakazwa ? Lwakazwa kujulu na kuti nkubantu ?'' Bakambuzyania akati kabo, bakati, ²⁶ ''Na tutedi, Luzwa kujulu,' Ulamba kuti kulindiswe, 'Nkambonzi mpo nimwakatamusyoma ?'Pesi na tutedi nkubantu,'tuyowa nkamu yabantu nkambo boonse babona Joni mbuli musinsimi.'' ²⁷ Mpawo bakasandula Jesu alubo bati, ''Tatuzi pe.'' Wakamba alimwi kulimbabo, ''Nsikwe nensikamwambile ambebo kuti ninguzunzi nzindichitya azyozintu ezi. ²⁸ Pesi muyeyaanzi mwalumi wakali abana balombe babili. Wakaya kumutanzi alubo wakati, ''mwanangu, koya ukabeleke sunu mumunda wamasansa. ²⁹ ''Mwana wakasandula wati, ''Tandiinki, pesi mukuya kwachiindi wakasandula mizezo yakwe wakinka. ³⁰ Mpawo mwalumi wakaya kumwana wachibili akwamba chintu chikozyenie. Wakasandula wati, 'Ndilayinka, 'Ta; pesi takwe nakinka pe. ³¹ Nguuli mubana babili aba wakachita kuyanda kwawisi ?'' Bakati, ''Mutanzi.'' Jesu wakati kulimbabo, ''Masimpe ndaamba kulindinywe, basimutelo abasimamambe bayonjila mubwami bwa Leza kamutana kunjila. ³² Nkambo Joni wakeza kulindinywe minzila yabululami, pesitemwakamusyoma pe. Pesi basimutelo abasimamambe bakamusyoma. Pesi nywebo, nikuba elyo mwakazibona ezi, temwakeempwa mukuya kwachindi alubo temwakamusyoma. ³³ ''Amuswilile kuli ambi mambilambali. Kwakali umwi mwalumi, mukamwini munda wakabyala masansa, wakayaka lubaya alinguwo; wasikusya chikandilo mukati kawo, wayaka ngánda yamujulu, alubo wakayiboleka kuli basikulima masansa. Mpawo wakaya kulichimwi chisi ³⁴ Elyo chiindi chakutebulwa kwamasansa nichakasika, wakatuma bamwi babelesi kuli basikulimina masansa kuti bakabweze michelo yakwe. ³⁵ Pesi basikulimina masansa bakabweza babelesi bakwe bawuma umwi, bajaya awumwi, alubo bamutulula mabwe. ³⁶ Alubo, mwanimunda wakatuma bambi babelesi bayingi kwinda batanzi, pesi basikulimina masansa bakabajata zikozyenie. ³⁷ Kwiinda awo, mwanimunda wakazotuma mwanakwe kulimbabo, kuti, 'Bayo mulemeka mwanangu. ³⁸ '''Pesi elyo balimi bamasansa nibakabona mwana, bakati akati kabo, 'Ngoyu sikukona. Mubole, muleke tumujaye akubweza lukono. ³⁹ 'Nkinkako bakamubweza, bamusowela kunze amuunda akumujaya. ⁴⁰ Lino elyo mwanimunda asika, ninzi nchayochita abo balimi bamasansa ?'' ⁴¹ Bakati kulinguwe, ''Uyonyonyona abo baalumi babuyo muli imwi nzila njumu, alubo uyobatandila aanze amuunda akubika bambi basikulimina masansa, bantu bayomupa chabilo chazilimwa kuchiindi chakuyebula.'' ⁴² Jesu wakati kulimbabo, ''Sena temwakabala mumalembe, Íbbwe bayaki ndibakakaka lyakachitwa munsemo. Echi chakazwa ku Mwami, alubo zilagambya mumeso esu' ? ⁴³ Nkinkako ndamba kuti kulindinywe, bwami bwa Leza buyobwezwa kuzwa kulindinywe akuyopegwa kuchisi chiyopanga michelo yacho. ⁴⁴ Kufumbwa uwida atala abbwe eli ulakutyoka kuba tumpanzi, pesi umwi ngulitawide atala ulakupwasuka.'' ⁴⁵ Elyo bapayizi bapati aba Falisi nibakamvwa mambilambali akwe, bakamvwisisisya kuti wakalikwamba ataala ambabo. ⁴⁶ Bakayandula kumwanga, pesi bakayoowa makamu abantu, nkambo bantu bakali mujisi mbuli musinsiimi.