¹ ''Nkambo bwami bwakujulu buli mbuli mwanimunda wakazwa kuseni loko kuyotamba basikubeleka mumuunda wakwe wamasansa. ² Nikwakamana kuzuminana abasimulimu kudinali lyomwe abuzuba, wakabatuma kumunda wamasansa wakwe. ³ Alubo wakenda chindi chamahola atatu mpawo wakabona bamwi basimilimu kabayimvwi kabatakwe nchibachita kubusena bwakuuzizya. ⁴ Kuli mbabo wakati, 'Anywebo, kamuya mumuunda wamasansa alubo ndilakumupa zilikabotu.' Nkako bakayinka kumulimu. ⁵ Alimwi wakiinka kunze muhola lyamusanu alimwi amuhola lyamusanu aane, akuyochita chikozyenie. ⁶ Limbi lubo kusika kuhola lyakkumi alimwi wakazwa alimwi wakujana bamwi balimvwi katakwe nchibalikuchita. ⁷ Wakati kulimbabo, 'nkambonzi nimwimvwi awa kamutakwe nchimulikuchita zuba lyoonse ?' ''Kulinguwe bakamba kuti, 'nkambo takwe pe watutambila mulimo.' ''kulimbabo wakati, ánywebo lubo mwinke mumunda wamasansa.'' ⁸ Lino nilyakaba golezya, mwani muunda wakati kumupati wamulimo, 'Yita basikubeleka alubo ubape bulumbu bwabo, utangune abasyalizi umane akumutaanzi.' ⁹ Eelyo basimilimo bakanjila ahola lyakkumi alimwi bakeza, awumwi wabo wakatambula dinali. ¹⁰ Nibakeza basimulimo batanzi, bakalikuyeya kuti balatambula zyiingi, pesi abalabo bakatambula dinali lyomwe awumwi. ¹¹ Nibakatambula bulumbu bwabo, bakasyoloka atala mwanimunda. ¹² Bakati, 'Aba basimulimo basyalizi babeleka biyo hola lyomwe, pesi mwabachitila bvukozyenie andiswe, iswebo nitwaminwa buzuba bonse alubo muzuba lyuumpa obu.' ¹³ ''Pesi mwanimunda wakavwiila umwi wabo wati, 'mwenzuma, takwe chibi nchindamuchitila. Temwazuminene andime na ku dinali lyomwe ? ¹⁴ Amubweze zyanu mwende enzila yanu. Ndasala kupa basimulimo basyalizi zikozyenie azyenu. ¹⁵ Tazili mumulawu na kuchita mbuli m bwenjanda achintu changu? Wabasibbivwe na nkambo ndimwabi ?' ¹⁶ Nkinkako musyalizi uyoba mutanzi, amutaanzi uyoba musyalizi.'' Malembe aansiku mabotu takwe banji bayitidwe, pesi basalidwe mbache. ¹⁷ Lino Jesu nakalikuya ku Jelusalema, wakabweza abalikkumi ababili kumbali, alubo munzila wakati kulimbabo, ¹⁸ ''Amubone, tuyobuya ku Jelusalema, alubo Mwana Muntu nkwayowabwa mumaboko abapayizi bapati abalembi basimulawu. Bayomutama kusikila kulufu ¹⁹ alubo bayomutola kuli bamasi kuti bamuniake, akumuuma, akuyomubambula. Pesi mubuzuba bwatatu uyobusigwa.'' ²⁰ Mpawo banyina babana balombe ba Zebbediya bakaza kuli Jesu abana babo. Wakafugama aansi kunembo lyakwe alubo wakakumbila chimwi chintu kulinguwe. ²¹ Jesu wakati kulinguwe, ''Niinzi ncholombozya ?'' wakati kulinguwe, ''Layila bana bangu aba kuti bakkale, umwi kululyo umwi kulumwensi lwaluboko, mubwami bwako.'' ²² Pesi Jesi wakasandula wati, ''Tochizi nchokumbila. Ulakonzyana kunywa mukanywido nkindaamba kunywa ?'' Kulinguwe bakamba kuti, ''Tulakonzya.'' ²³ Wakamba kuti kulimbabo, ''Kanywido kangu mulakonzya kunywa. Pesi kukkala kululyo lwangu akuchimweensi tendime uupa pe, pesi nzizyabaabo bakabambilwa a Taata.'' ²⁴ Elyo basikwiya bamwi balikkumi nibakachimvwa echi bakanyema kapati abaaba babunyina babili. ²⁵ Pesi Jesu wakabita kulinguwe akwamba kuti, ''mulizi kuti bendelezi babamaasi balabendelezya, abalabo bapati baabo babulemu bezyanisya nguzu zyabo alimbabo. ²⁶ Pesi tazyelede kuti kube anzila eyo akati kenu. Anukuti, kufumbwa ulomboozya kuba mupati akati kenu abe mulanda wenu, ²⁷ alubo kufumbwa ulombozya kuba mutanzi akati kenu welede kuba mulanda wenu, ²⁸ mbuli Mwana Muntu mbatakazidide kukutawukilwa, pesi kukutawuka, akupa buumi bwakwe mbuli muulo wabingi.'' ²⁹ Nibakazwa ku Jelikko, inkamu mpati yakamutobela. ³⁰ Kwakali balumi babili boofu bakakkede kumbali lyamugwagwa. Elyo nibakamvwa kuti Jesu walikwiinda, bakompolola, ''Mwami, Mwana Davida, ba aluzyalo andiswe.'' ³¹ Mbungano yakaba kalalila, bababuzya kuti bawumune, pesi bakakwila chakwindilila, ''Mwami, Mwana Davida, ba luzyalo kulindiswe.'' ³² Mpawo Jesu wakayima alubo wakita kulimbabo wati, ''ninzi nchimulombozya kuti ndimuchitile?'' ³³ Bakaamba kuti kulinguwe, ''Mwami, kuti meso esu ajulike.'' ³⁴ Mpawo Jesu, kali wasungilizigwa aluzyalo, wakabaguma meso aabo, mpoonya awo bakatambula kubona akumutobela.