¹ Mumunyaka wakkumi amusanu mubweendelezi bwa Tibeliyasi Kkayisala - aawo Pontiyasi Payileti nakali mwendelezyi waku Judiya, Heloda kali mwendelezyi waku Galilii, mwana wakwabo Filipo kali mweendelezi wachisi chaku Ituliya a Tilankonitisi , a Lisaniyasi kali mwendelezyi waku Abilene, ² kuzwa kubupayizyi bwa Anasi aKkefasi - ijwi lya Leza lyakasika kuli Joni mwana wa Zakaliya munkanda. ³ Wakeenda muzisi zyoonse zizyuungulukide Joodani kakambauka lubbabbatizyo lwakusanduka akulekelela kwazibi. ⁴ Mbuli mbukulembedwe mubbuku lyamakani aIsaya musinsimi, ''Ijwi lyasikompolola munkanda, 'Amubambenzila yamwami, amululamike nzila zyakwe ⁵ Yonse mimpata iyozuzukizigwa, a zilundu zyoonse atulundu tuyoba ansi amigwagwa ipilingene iyo lulamikwa, amasen aatabambinkene ayooyakwa akuba migwagwa , ⁶ bantu boonse bayoobona lufutuko lwa Leza.'" ⁷ Mpawo Joni wakati kumakamu akalikuza kuzo bbabbatizigwa anguwe, ''Nywebo nobana bachipile! ngwani wakamuchenjezya kuti muchije kuzwa kubukali bulokuza? ⁸ Aaboobo, muzyale michelo mibotu iitondezya kusanduka alimwi mutataliki kwaamba mukati kanu, ''Tula Abulahamu kali taata wesu; mbundamwambila kuti Leza ulakonzya kusumpula bana ba Abulahamu kuzwa kumabwe aya. ⁹ Alino kaleba kalibikidwe kale kumiyanda yamisamu. Aboobo kufumbwa musamu utazyali muchelo mubotu ulawugonkela kunsi akuuwalila mumulilo.'' ¹⁰ Alimwi makamu akendelela kunembo akumubuzya bakati, ''Niinzi mpawo nzitutachite?'' ¹¹ Wakasandula akuti kulimbabo, ''Na kulumwi uujisi twakuzwata tubili, uleelede kwabana amuntu utakwe ayooyo ujisi chakulya ayiite mbobo.'' ¹² Abasimutelo abalabo bakaza kuzo bbabbatizigwa, akwamba kuli nguwe kuti, ''Muyisi, niinzi nchitweelede kuchita?'' ¹³ Wakati kulimbabo, ''Mutakabwezi mali nyiingi njimutabuzizigwe kubweza." ¹⁴ Bamwi basilumamba abalabo bakamubuzya, bakati, ''Aniswe ninzi nchitweelede kuchita?'' Wakati kulimbabo, ''Mutakabwezi mali kufumbwa kulumwi changuzu, alimwi mutakapenzyi omwe chakubeja. amukakutisikane amiholo yanu.'' ¹⁵ Lino bantu nibakachili kulindila chakupekezya kusika kwa Kkilisto boonse bakali kugamba mukati kamooyo yabo aatala aJoni, kutii ngunguwe Kkilisto. ¹⁶ Joni wakasandula wakati kuliboonse, ''Imebo lwangu ndamubbabbatizya amanzi, pele kulumwi ulobuza ulanguzu kwiinda ndime, aboobo nsikonzyi nikuba nkwangununa misungo yansangu zyakwe. Uyomu bbabbatizya aMuya Uusalala antomwe amulilo. ¹⁷ Kajisi pologwe yakupupuluzya mujanza lyakwe chakusalazya lubuwa lwakwe akubunganya bbali munganda yakwe. Pele uyowumpa buungu amulilo alimwi mulilo tukoyoozima pe." ¹⁸ Mubwingi bwakumusumpula Joni wakalikwambula makani mabotu kubantu. ¹⁹ Alimwi Heloda kali mwendelezyi wakazumizigwa kukukwata mwanakazi wamwana wakwabo Helodiyasi azyoonse zintu zibi Heloda nzyakachitide, ²⁰ wakayungizya ezi kulimbabo boonse, akujalila Joni muntolongo. ²¹ Lino nichakasika chiindi aawo bantu boonse bakabbabbatizigwa Jesu alakwe wakabbabbatizigwa, nibakachili kukomba, majulu akajulika, ²² aMuuya Uusalala muchimo chamubili wakaza mbuli nziba, alimwi jwi lyakazwa kujulu ''Ulimwana wangu ngwendiyandisisya. Ndabotelwa anduwe." ²³ Mpawo Jesu naakatalika mulimu wakwe wakali amyaaka yakuzyalwa makumi aatatu. Wakali mwana mulombe (mbuli mbukwakaklikuyelelwa) kuti Josefa mulombe waHeli, ²⁴ mwana waMatati, mwana waLevi, mwana Melichi, mwana wa Janayi, mwana waJosefa. ²⁵ Josefa wakali mwana wa Matatiyasi, mwana wa Amos, mwana wa Naumi, mwana wa Esili, mwana wa Nagayi, ²⁶ mwana wa Mati, mwana wa Matatiyasi, mwana wa Simiyoni, mwana wa Josekki, mwana wa Juda. ²⁷ Joda wakali mwana waJowanani, mwana wa Lesa, mwana wa Zelubbabbeli, mwana wa Salatiyeli, mwana wa Neli, ²⁸ mwana wa Melikki, mwana wa Elimadamu, mwana wa Eli, ²⁹ mwana wa Joshuwa, mwana wa Eliyeza, mwana wa Jolimu, mwana wa Matati, mwana wa Levi ³⁰ Levi wakali mwana wa Simiyoni, mwana wa Juda, mwana wa Josefa, mwana wa Eliyakim, mwana wa ³¹ Meliya, mwana wa Mena, mwana Matata, mwana wa Natani, mwana wa Davida, ³² mwana wa Jese, mwana wa Obbeti, mwana wa Bbowazi, mwana wa Salimoni, mwana wa Nasiyoni. ³³ Nashoni wakali mwana wa Aminadabu, mwana Adimini, mwan wa Alini, mwana wa Heziloni, mwana wa Perez, mwana wa Juda, ³⁴ mwana wa Jakkobo, mwana wa Isakka, mwana wa Abbulamu, mwana wa Tela, mwana wa Nawoli, ³⁵ mwana wa Selugi, mwana wa Lewu, mwana wa Pelegi, mwana wa Ebba, mwana wa Shela. ³⁶ Sila wakali mwana wa Kkayinani, mwana wa Alipazada, mwana wa Semu, mwana wa Nowa, mwana wa Lameki, ³⁷ mwana wa Metusela, mwana wa Inoki, mwana wa Jaledi, mwana wa Mahalaleli, mwana wa Kkayini, ³⁸ mwana wa Inosi, mwana wa Seti, mwana wa Adamu, mwana wa Leza.