¹ Jesu wakalanga wabona balumi bavubi kabalokubikka zipo munkomo yakubikkila mali. ² Wakabona umwi muka mufu ufwaba kalokubikka tunini tobile. ³ Lino wakati, ''Kasimpe ndamba obu kulindunywe, oyu muchete mukamufu wapa kwinda boonse. ⁴ Boonse bapa zipo mukwindilila mukuvula kwazyo. Pesi mukamufu, kwinda buchete bwakwe, wabikka toonse twayelede kupona ato''. ⁵ Abamwi bakali kwambula achikombelo, yasamika mabwe mabotu azituuzyo, wakamba, ⁶ ''kulizezi zintu nzimubwene, izuba liyosika nikuyochala katachikwe bbwe lilatala abbwe nyina liyochala kalitawidide ansi.'' ⁷ Bamumuzya bati, ''Muyisi, ndilili niziyochitika zintu ezi?'' Alubo nchiinzi chiyoba chitondezyo chakuti zintu ezi zyaamba kuchitika?'' ⁸ Jesu wakasandula, ''Amuchenjele kuti muteenwi. Nkambo bayosika muzina lyangu kabati 'ndime oyoo'a 'chindi chaba afwifwi' mutakabatobeli. ⁹ Mwakumvwa nkondo ampyompyongano mutakayowi, nkambo zintu ezi zyelede kuchitikana kusanguna, pele mamanino takayochitika kufwambana''. ¹⁰ Mpawo wakati kulimbabo, ''Chisi chiyolwana achisi nyina. ¹¹ Kuyooba mizuzumino mipati munyika, anzala mumasena asiyenesiyene azilwazi, kuyoba ziyosya azitondeezyo zipati zizwa kujulu. ¹² Pesi kakutanachitika ezi zintu, bayobikka manza abo alindinywe akumupenzya, bamwabe muzikombelo amuntolongo, akumweeta kunembo lyabami abendelezi nkambo kazina lyangu. ¹³ Kuyoba bukamboni kulindinywe. ¹⁴ Nkambo kako amukanze mumyoyo yanu kuteezeezya makani ngimuyowamba, ¹⁵ nkambo ndime usikamupe majwi abusongo kuti boonse basinkondo nyokwe bakachilwe kukaka akukazya. ¹⁶ Pele muyozipegwa atala abazyali, bakulana, nzubo, abenzuma alimwi bayobikwa bamwi bana mulufu. ¹⁷ Muyosulwa moonse nkambo kazina lyangu. ¹⁸ Pele takukoyooba kasusu kakumitwe yanu kayooloba. ¹⁹ Kumakatazyo muyoobujana bumi bwanu. ²⁰ ''Nimwakubona Jelusalema yazyungulukwa ampi, lino muyoziba kuti kusaalwa kwabo kwaba afwifwi. ²¹ Lino abo bali muJudiya abachijile mumalundu, alubo bali mudolopo abazwe, abo alabo bali anze achisi tabelede kunjila mudolopo. ²² Nkambo aya mazuba akubwedzya chibi, kuti zintu zyoonse zilembedwe ziyoozuzikizigwe. ²³ Mawee kuli babo bamisi akulibabo banyonsya kumazuba ayo! Nkambo kuyoba mapenzi mapati munyika, ayendelana abantu aba. ²⁴ Bayojegwa apanga, bayootolwa baange kuzisi zyoonse a Jelusalema uyoozunganisigwa abamasi kusikila chindi chabamasi chizulile. ²⁵ Kuyooba zitondeezyo kuzuba, akumwezi, amunyenyezi. Amunyika, nyika iyoba akakukatazigwa nkambo kakuvuuma kwamayuwe amulwizi. ²⁶ Kuyoba bantu bayoomana nguzu akuyowa akuyeya zintu zitasikile nyika. Nkambo nguzu zyakujulu ziyozunganisigwa. ²⁷ Mpawo bayomubona Mwana mulombe wa Muntu kaboola mujoba munguzu amubulemu bupati. ²⁸ Pele zintu ezi zyakutalika kuchitika, amunyampuke akulungumika mitwe yanu, nkambo lwangunuko lwanu lwaba afwifwi''. ²⁹ Jesu wakabambila muzikozyano, ''Mulange mukuyu amasamu onse. ³⁰ Lino na asyuuka ndelema, anga mwabona lwanu akuziba mayinza aba afwifwi. ³¹ Lino aboobo, na mwabona zintu ezi kazichitika, muyoziba kuti bwami bwaLeza bwaba afwifwi. ³² Kasimpe ndamwambila obu nywe, olu lunyungu talukayindi mane zintu ezi zikachitike. ³³ Ijulu anyika ziyoyinda, pele ijwi lyangu talikoyomana pe. ³⁴ Pesi amuswilile lwanu, kuti myoyo yanu italemenwi akwindilizya kunywa akukolwa akulipenzya abuumi, azuba elyo talikoyomujana kufwambana pe ³⁵ mbuli kakole. Nkambo chiyosikila kuli boonse bapona kubusyu bwanyika yoonse. ³⁶ Pesi amulibambile chindi choonse, mukombe kuti mube anguzu akuchija zintu ezi zitachitike, akwiima kunembo lya Mwana mulombe wa Muntu''. ³⁷ Lino kuzwa kuseni kusikila goko wakali kuyiisya muzikombelo, munsi wakali kuzwa anze akuyokkala kutegwa Oliveti. ³⁸ Bantu boonse balikusika kuseni kuzomuswilizya mutempele.