¹ Lino pobwe lyachinkwa chitakwe bumena chakali chaamba kusika, litegwa Pasika. ² BaPayizi bapati alimwi abalembi bakalikuyaandula mbubanga balabika Jesu kulufu, nkaambo bakalikuyoowa bantu. ³ Lino Satani wakanjila muli Judasi Isikkaliyoti, ooyo wakali umwi wabalikkumi ababili. ⁴ Judasi wakayinka kubapayizi bapatki akubapati babasilumamba waakubaambila mbanga ulapeda Jesu kulimbabo. ⁵ Bakabotelwa alimwi bazuminana kuti bamupe mali. ⁶ Wakazumina alimwi wakayaandula mweenya wakubapa kule abantu. ⁷ Nibwakasika buzuba bwachinkwa chitakwe bumena, aawo nikwakeelede kupayigwa kabelele kakwiindilila. ⁸ Jesu wakatuma Pita a Joni kaamba kuti, "Mweende mukatubambile chakulya cha Pasika kuchitila kuti tzolye." ⁹ Bakabuzya kulinguwe bati, "Nkookuli nkoyanda kuti tukachite mabambe aaya?" ¹⁰ Wakabasandula kuti, "Amulange naa mwanjila mumuunzi, mulaswaana mwaalumi utukkide nongo yamanzi. Mukamutobele mung'anda eeyo njatakanjile. ¹¹ Amukatedi kuli muna ng'anda, "Muyiisi wati kulinduwe, ilikuli ng'anda yakulida, oomo munditalide Pasika abasikwiiya bangu?" ¹² Uyokutondezya n'anda mpati yakulala yakujulu iili aazyoonse. Kachite mabambe ooko.'' ¹³ Aboobo bakiinka, alimwi bakujana zyoonse mbuli mbakali waamba kulimbabo. Mpawo bakabamba kulya kwa Pasika. ¹⁴ Eelyo chiindi nichakasika, wakakkala aansi abasikwiiya. ¹⁵ Mpawo wakati kulimbabo, ''Ndalikuyandisya kapati kulya Pasika andinywe nkesinapenzegwa, ¹⁶ Nkaambo ndati kulindinywe, nsikoyoolya lubo kusikila zyazuzikizigwa mubwaami bwa Leza.'' ¹⁷ Mpawo Jesu wakabweza nkomeki, alimwi eelyo nakapa kulumba, wakati, ''Mubweze eechi, alimwi mukachaabane aakati kanu. ¹⁸ Nkaambo ndati kulindinywe, nsikoyoonywa muchelo wa musaansa lubo kusikila bwaami bwa Leza bwasika.'' ¹⁹ Mpawo wakabweza chinkwa, alimwi eelyo nakapa kulumba, wakachikwamuna, alimwi wakabapa, kati, '''Ooyu mubili wangu, ooyo wapegwa akaambo kanu. Mukachite eechi mukuyeya ndime.'' ²⁰ Wakabweza nkomeki munzila yeeelene musule lya chilalilo, kalikuti, '''Eeyi nkomeki nchizuminano changu chipya mu gazi lyangu, lyatilwa akaambo kanu. ²¹ Pesi muswiilile. Ooyo undiwuzya uli andime antafula. ²² Nkaambo Mwana mulombe wa Muntu nchobeni uliinka mbuli mbuzyakabambwa. Pesi mawe kuliwoyo muntu uyonduuzya!'' ²³ Bakatalika kuzuwisyania chabochabo kuti ngwani unga uyookonzya kuchita eechi. ²⁴ Mpawo kwakaba kukazyania aakati kabo aatala akuti nguuli wabo wakalikubwezwa kali mupati. ²⁵ Wakati kulimbabo, ''Baami ba bamaasi mbasimalelo aatala ambabo, alimwi aabo bali aabweendelezi aatala ambabo babonwa mbuli baabo bachita bubotu kubantu babo. ²⁶ Pesi tazyeelede kuba boobu pe andinywe. Anikuti, muleke ooyo mupati aakati kanu abe mbuli muniini, alimwi muleke ooyo uli alugwasyo abe mbuli ooyo ubeleka. ²⁷ Nkaambo ngwani mupati, ooyo uukkala antafula, na ooyo ubeleka? Nikubaboobo ndili aakati kanu mbuli woyo uubeleka. ²⁸ Pesi ndinywe nimwakiinkilila kunembo andime mumasukukusyo aangu. ²⁹ Ndapa kulindinywe bwaami, mbuli Taata wangu mbakapa bwaami kulindime, ³⁰ kuti mukonzye kulya akunywa aantafula lyangu mubwaami bwangu, alimwi uyookkala azyuuno kolikubeteka mikowa iilikkumi ayibili ya Izilayeli. ³¹ Sayimoni, Sayimoni, chenjela, Satani wakukumbila, kuti amwi walikukonzya kukupupulula mbuli witi. ³² Pesi ndakukombela, kuti lusyomo lwako lutakachilwi. Niwabweda msule lubo, simwa bakulana bako.'' ³³ Pita wakati kulinguwe, ''Mwaami, ndililibambilide kwiinka ayebo koonse kuntolongo alimwi a kulufu.'' ³⁴ Jesu wakamusandula, ''Ndakwaambila, Pita, mukuku takoyookokolika buzuba obuno, iwebo kotanandikaka tutatu kuti tondizi pe.'' ³⁵ Mpawo Jesu wakati kulimbabo, ''Eelyo nindakamutuma aanze kamutakwe chikkwama chemali, chikkwama chazyoonse, na nsangu, mwakakubula chintu na?'' Bakasandula, ''Takwe pe.'' ³⁶ Mpawo wakti kulimbabo, '''Pesi lino, ooyo uli echikkwama, mumuleke achibweze, alimwi lubo chikkwama chazyoonse. Ooyo utakwe panga weelede kuzya chikobela chakwe alimwi awule limwi. ³⁷ Nkaambo ndati kulindinywe, eezyo zilembedwe aatala andime zyeelede kuzuzikizigwa, 'Wakabalwa aantomwe abatakwe mulawu.' ³⁸ Mpawo bakati, ''Mwaami, langa! Ngaya mapanga obile.''wakati kulimba, kwakkwana.'' ³⁹ Jesu wakiinka, mbuli mbakalikukkala kachita chiindi chiingi, ku Chilundu cha Olivi, alimwi basikwiiya bakamutobela. ⁴⁰ Eelyo nibakasika, wakati kulimbabo, ''Mukombe kuti mutanjili mumasukusyo.'' ⁴¹ Wakazwa aakati kabo afwifwi aasikila bbwe lyakuwala amaboko, alimwi wakafugama aansi alimwi wakakomba, ⁴² kati, ''Taata, na kamuyanda, mugwisye nkomeki eeyi kuzwa kulindime. Nikubaboobo pe pe lwangu luyando, pesi lwanu ngalukachitwe.'' ⁴³ Mpawo mungelo kuzwa kujulu wakaboneka kulinguwe, kalikumusimya. ⁴⁴ Kali mukulila kupati, wakakombesya loko chanchobeni, alimwi nkasaalo yakwe yakaba mbuli malosi mapati agazi kayilikulokela anyika. ⁴⁵ Eelyo nakazwa kukukomba kwakwe, wakaya kui basikwiiya bakwe alimwi wakabajana kabalikoona akaambo kabuusu bwakwe ⁴⁶ alimwi wakababuzya, '''Nkaambonzi nimulikoona? Mubuke mukombe, kuti mutakanjili mumasukuusyo.'' ⁴⁷ Aawo nakachilikwaambula, bona, inkamu yakaboneka, aantomwe a Judasi, umwi wa bali kkumi ababili, kali kubazulwida. Wakaza afwifwi a Jesu kuzomumyonta, ⁴⁸ pesi Jesu wakati kulinguwe, ''Judasi ulikuuzya Mwana mulombe wa Muntu alumyonto?'' ⁴⁹ Eelyo bakazyungulukide Jesu nibakabona zyakali kuchitikana, bakati, ''Mwaami, tuume na apanga?'' ⁵⁰ Mpawo umwi wabo wakawuma mulanda wa mupayizi mupati, alimwi wakakwapula kutwi kwakwe kwachilisyo. ⁵¹ Jesu wakati, ''Eezyo zyakkwana!'' Wakaguma kutwi kwakwe, alimwi wakamuponia. ⁵² Jesu wakati kuli silutwe wa bapayizi ba muchikombelo, alimwi akubapati bakamubukila, ''Muza mbuli kumubbi, kamuli amapanga a nkoli? ⁵³ Eelyo nindakali aandinywe mazuba oonse muchikombele, takwe nimwakabika maboko aanu alindime. Pesi eeli ndihola lyanu, alimwi bweendelezi bwamumudima.'' ⁵⁴ Kabamukwensa, bakamubweza alimwi bamutola kun'anda yamupayizi mupati. Pesi Pita wakalikutobela kulekule. ⁵⁵ Musule lyakudukula mulilo aakati kabbetekelo alimwi kabali bakkala aansi aantomwe, Pita wakakkala aakatai kabo. ⁵⁶ Umwi mulanda mwanakazi wakamubona aawo nakakkende mumumuni wamulilo alimwi wakalanga kulinguwe chakumudunamina alimwi wakati, ''Ooyu mwaalumi alakwe wakali aanguwe.'' ⁵⁷ Pesi Pita wakakaka, kati, ''Mwanakazi, nsimwizi pe.'' ⁵⁸ Musule lyakayindi kaniini loko umwi wakamubona, alimwi wakati, ''Nduwe umwi wabo.'' Pesi Pita wakati, ''Mwaalumi, tensi ndime.'' ⁵⁹ Nikwakiinda hola lyomwe uumbi mwaalumi wakasisimpizya alimwi wakati, ''Nchobeni mwaalumi ooyu alakwe wakali aanguwe, nkaambo ngwaku Galili.'' ⁶⁰ Pesi Pita wakati, ''Mwaalumi, nsizi pe eecho ncholikwaamba.'' Chakufwambaana, nakachilikwaambula, mukuku wakakokolika. ⁶¹ Wakachebuka, Mwaami wakalanga Pita, alimwi Pita wakayeya ijwi lya Mwaami, eelyo nakati kulinguwe, ''Mukuku katanaakokolika sunu uyondikaka tutatu.'' ⁶² Pita wakiinka aanze alimwi wakakulila kapati. ⁶³ Mpawo baalumi bakalindide Jesu bakamuseka alimwi bakamuuma. ⁶⁴ Bakabika chivumbyo aatala lyakwe alimwi bakamubuzya, kabati, ''Sinsima! Ngwani ooyo wakuuma?'' ⁶⁵ Bakaambula zimwi zyiingi zintu aatala a Jesu, kabalikumutuka. ⁶⁶ Chakufwambaana mbuli mbulyakali zuba, bapati babantu bakaswaanana aantomwe, bapayizi bapati alimwi abalembi. Bakamutola mu Nkuta ⁶⁷ alimwi bakati, ''Na koli Kkilisito, twaambile.'' Pesi wakati kulimbabo, ''Na ndamwaambila, tamukoyoondisyoma pe, ⁶⁸ alimwi na ndamubuzya, tamukoyoosandula pe. ⁶⁹ Pesi kuzwa lino kaziya kunembo, Mwana mulombe wa Muntu unoyokkede kuchilisyo chamanguzu aa Leza.'' ⁷⁰ Boonse bakati, ''Nkokwaamba kuti uli Mwana mulombe wa Leza?'' Jesu wakati kulimbabo, ''Mwaamba kuti ndime.'' ⁷¹ Bakati, ''Nkaambonzi nituchiyanda mukamboni? Nkaambo lwesu tobweni twalimvwida kuzwa kumulomo wakwe.''