¹ Musule akufwa kwa Ewudi, bantu ba Izilayeli bakabisya lubo kubusyu bwa Jehova. ² Jehova wakabawuzya kujanza lya Jabbini mwami wa Kkenani wakeendelezya mu Haza. Silutwe wampi yakwe wakali kutegwa Sisela, alimwi walikukkala mu Halosyeti Hagoyimu. ³ Bantu ba Izilayeli bakitilila lugwasyo kuli Jehova, nkambo Sisela wakalijisi myaanda yosanwe ayine yankalaki zyalubulo alimwi wakadyamizya bantu ba Izilayeli changuzu kwamyaaka ilimakkumi obile. ⁴ Lino Dibbola, mwanakazi musinsimi (mwanakazi wa Lapidoti), nguwakali mubetesi mupati mu Izilayeli muchiindi eecho. ⁵ Wali kuyandisya kukkala aansi akakunka ka Dibbola akati ka Lama a Bbeteli mukalundu kamunyika ya Efulemu, alimwi bantu ba Izilayeli bakeza kuli nguwe kuzogwasiwa zyambo zyabo. ⁶ Wakatumina Bbalakki mwana mulombe wa Abbinoyamu kuzwa ku Kkedesyi mu Nafutali. Wakati kuli nguwe, ''Jehova, Leza wa Izilayeli, ulikukulayilila, 'Koya ku Chilundu Tabba, alimwi ubwezelezye baalumi balizyuulu zilikkumi kabazwa ku Nafitali aku Zebbulani. ⁷ Ndiyogwisya Sisela aanze, silutwe wampi ya Jabbini, kuyoswanana ayebo amulongo wa Kkisyoni, kali aankalaki zyakwe aampi yakwe, alimwi ndiyokupa kuzunda aalinguwe.''' ⁸ Bbalaki wakamba kuti kulinguwe, ''Naa weenda ambebo, ndiyoyenda, pesi naa tetweenda antomwe, tandikoyinka pe.'' ⁹ Wakaamba kuti, ''Nchobeni ndiyoyinka ayebo. Nekubaboobo, mugwagwa nguyoyendela tukwe kuyokutola kubulemu bwako pe, nkambo Jehova uyowuzya Sisela mujanza lya mwanakazi.'' Mpawo Dibbola wakanyampuka akwenda a Bbalakki kuKkedesyi. ¹⁰ Bbalakki wakiita baalumi bakuZebbuluni abaku Nafutali kuti baze antomwe ku Kkedesyi. Zyuulu zilikkumi zyabaalumi bakamutobela alimwi Dibbola wakeenda aamwi anguwe. ¹¹ Lino Hebba (mu Kkenayiti) wakali pambula kuzwa kuba Kkenayiti- bakali balunyungu lwa Hobbabbu syanyinazyala wa Mozesi - alimwi wakayaka tente lyakwe munsi lyamubanga muli Zaananimu afwifwi a Kkedesyi. ¹² Nibaakambila Sisela kuti Bbalakki mwana mulombe wa Abbinoyamu wakali waya kuchilundu cha Tabba, ¹³ Sisela wakayita nkalaki zyakwe zyoonse, myaanda ilimusanu azine nkalaki zyalubulo, alimwi abasilumamba boonse mbaakalabo, kuzwa ku Halosyeti Hagoyimu kuyosika ku Mulona Kkisyoni. ¹⁴ Dibbola wakamba kuti kuli Bbalakki, ''Koya! Nkambo oobu mbuzuba Jehova mbwakupa kuzunda ali Sisela, sena Jehova tali kukuzulwida kale naa?''' Lino Bbalakki wakaseluka kuzwa muchilundu cha Tabba abaalumi balizyuulu zilikkumi bakali kumutobela. ¹⁵ Jehova wakazela Sisela ankalaki zyakwe zyoonse abasilumamba bakwe boonse abbemba lyapana. Alimwi Sisela wakaseluka kuzwa munkalaki yakwe akuchija amawulu. ¹⁶ Pesi Bbalakki wakali kwandilila ankalaki aba silumamba kuya ku Halosyeti Hagoyimu, alimwi impi yakwe yoonse ya Sisela bakajazigwa abbemba lyapanga, alimwi taakwe nikuba mwalumi wakafutuka. ¹⁷ Pesi Sisela wakachija amawulu kuya kutente lya Izilayeli, mukayintu wa Hebba mu Kenayiti, nkambo kwakali luumuno akati kaba Jabbini mwami wa Haza antomwe abalunyungu lwa Hebba mu Kkenayiti. ¹⁸ Jaweli wakazwa anze kuyotambula Sisela akwamba kuti, kuli nguwe, ''Leya ambali, simalelo wangu; leyela kulindime alimwi utayoowi pe.'' Aboobo wakaleyela kuli nguwe akunjila kutente lyakwe, alimwi wakamuvumba achilivumbyo. ²⁰ Wakati kulinguwe, ''Weenche mundipe twaanzi twakunywa, nkambo ndaba anyota.''' Wakajula chibikilo chachikwiye chakali amalili alimwi wakamunywisya, eelyo wakamuvumba lubo. ¹⁹ Wakamba kuti kulinguwe, ''Yimikila kumulyango watente naa kuli umwi wasika kuzokubuzya, 'Kuti kuli umwi naa uliwaano? utedi 'Pepe'.'' ²¹ Mpawo Jaweli (mwanakazi wa Hebba) wakabweza nkanka yatente, a nsando mujaanza lyakwe akunjila chuumunizi kuli nguwe, nkambo lwakwe wakali ang'onzi mpati, alimwi wakagankamina nkaanka yatente kulubazu lwamutwe mane do kubbila munyika, alimwi wakafwa. ²² Mbuli Bbalaki mbwali kwandilila Sisela, Jaweli wakazwa anze kukumutambula akwamba kuli nguwe kuti, ''Boola, nkutondeezye mwalumi nguulya Sisela ulilede kafwide, kali a nkaanka yatente kulubazu lwamutwe wakwe. ²³ Aboobo mubuzuba obo Leza wakazunda Jabbini, mwami wa Kkenani, kunembo lyabantu ba Izilayeli. ²⁴ Inguzu zyabantu ba Izilayeli zyakayungizigwa kusima akuvula kukulwisya Jabbini mwami wa Kkenani, mane do kumunyonyoona.