¹ Angelo wa Jehova wakazwa ku Giligalu wakasika ku Bbokkimu, alimwi wakaamba kuti, ''Ndakamugwisya mu Ijiputi, mpawo ndakamugwisya kunyika njindakakonkezya kupa kuli bamawuso. Ndakaamba kuti, ''Nsikoyotyola chizuminano changu andinywe. ² Tamwelede kuchita chizuminano abaabo bakkala munyika eeyi. Mwelede kumwaya zipayililo zyabo.' Pesi taakwe nimwakaswiilila jwi lyangu. Niinzi eechi nchimwachita? ³ Aboobo lino ndaamba kuti, 'Nsikoyobatanda ba Kkanani kunembo lyenu pesi bayooba mamvwa mumabazu aanu, alimwi baleza babo bayomubeda tukkole.''' ⁴ Angelo wa Jehova nakaambula majwi aaya kubantu boonse ba Izilayeli, bantu bakoompolola akukwila. ⁵ Bakawulika busena obo kuti Bbokkimu. Nkukonya bakapayila kuli Jehova. ⁶ Lino Josyuwa nakamaninsya bantu anzila yabo, bantu ba Izilayeli umwi awumwi wakinka kubusena mbwakabilwa, kuyovuba nyika yabo. ⁷ Bantu bakalekela Jehova chiindi choonse Josyuwa nchakapona achabapati aabo bakachili kupona kaliwafwa, aabo bakabona milimo mipati yoonse ya Jehova njakachitila ba Izilayeli. ⁸ Josyuwa mwana mulombe wa Nuni mulanda wa Jehova, wakafwa kali waba aamyaka iili 110. ⁹ Bakamuzikka kumugaano wanyika njakabilidwe mu Timunati Helesi, munyika yatulundu twa Efulemu, kunyika ya Chilundu Gasyi. Izyalane eelyo lyoonse alyalo lyakabungana kuli bamawisi. ¹⁰ Zyalane alimwi lyakabuka usule lyabo elyo lyaatakwe lyakalizi Jehova naa echo nchakachitila ba Izilayeli. ¹¹ Bantu ba Izilayili bakachita bubi mumenso aa Jehova akubelekela ba Bbaalu. ¹² Bakali sosolosya kuzwa kuli Jehova, Leza wabamawisi, wakabagwisya kunyika ya Ijiputi. Bakatobela baleza baambi, baleza babantu aabo bakabazyungulukide, alimwi bakabakotamina. Bakakalazya Jehova mukunyema nkambo ¹³ bakasosoloka kuli Jehova akukomba Bbaalu aba Asyitoleti. ¹⁴ Bukali bwa Jehova bwakabukila ba Izilayeli, alimwi wakabapeda kabasali bakababbida lukono lwabo kuzwa kulimbabo. Wakabasambala mbuli bazike aabo bakalijiswi anguzu zyabasinkondonyina baka bazyungulukide, aboobo tebakachili kukonzya kuli kwabilila aatala abasinkondonyina. ¹⁵ Konse nkubakali kwinka ba Izilayili kuyolwana, kuboko kwa Jehova kwakali atala ambabo kukubazunda, mbubonya mbuli mbwakakonkezya kuli mbabo mpawo bakali mumafwabi mayumu. ¹⁶ Eelyo Jehova wakabusya babetesi, aabo bakafutulwa kuzwa kujanza lyabaabo bakali kubabbida lukono lwabo. Nikubaboobo tebakaswilila pe kubabetesi babo. ¹⁷ Tebakasyomeka pe kuli Jehova mpawo bakalipeda mbuli bavuule kuli baleza bambi akubakomba. Bakafwambana kupambuka kuzwa kunzila bamawisi njibakaponena - aabo bakaswilila milazyo ya Jehova - pesi lwabo tebakachita oobo pe. ¹⁸ Jehova nakababusizya babetesi, Jehova wakagwasya babetesi akubavuna kuzwa kujanza lyaba sinkondonyina mazuba woonse mubetesi ngakapona. Jehova wakababeda aluse mbuli mbubakali kutongela nkambo kabaabo bakali kubapenzya akubafwabya. ¹⁹ Pesi mubetesi nakafwa, bakapambuka akuchita zintu ezyo zyakali zibi loko kwinda nzibakachita bamawisi. Bakali k utobela baleza bambi kukubabelekela akubakomba. Bakakaka kuleka kufumbwa yansotoko yabo yabubi naa inzila zyabo zyabusichinguni. ²⁰ Bukali bwa Jehova bwakabukila ba Izilayili; wakaamba kuti, ''Nkaambo chisi eechi chatyola milawo yachizuminano changu echo nchindakabambila kubusena bwa bamawisi - nkambo tebakaswilila pe kujwi lyangu - ²¹ Kuzwa lino kaziya kunembo, nsikoyotanda limbi pe kunembo lyabo kufumbwa wamaasi aayo Josyuwa ngakasiya nakafwa. ²² Ndiyochita eechi kuchitila kuti ndikasunke ba Izilayeli, nikuba na pe bayolondola inzila ya Jehova akweenda mulinjiiyo, mbuli bamawisi mbubakilondola.'' ²³ Nchiicheecho Jehova nchakaleka maasi aayo akubatanda chakufwambana akubapeda mujanza lya Josyuwa.