¹ Musule alufu lwa Josyuwa, bantu ba Izilayeli bakabuzya Jehova, kabaamba kuti, ''Nguni utakasangune kutwiinkila kuba Kkanani, kukuyolwana ambabo?'' ² Jehova wakamba kuti, ''Juda uyoyinka. Langa, ndabapa inguzu zyanyika eeyi.'' ³ Baalumi ba Juda bakaamba kuti kubaalumi ba Simiyoni, bakkulana babo, ''Atweende aamwi andiswe muchaabilo chesu echo chakapegwa kulindiswe muchaabilo chesu eecho chakapegwa kulindiswe kuti antoomwe tukalwane aba Kkanani. Andiswe tuzoyinke aandinywe kuchaabilo eecho chakapegwa kulindinywe.'' Aboobo mukowa wa Simiyoni wakiinka aambabo. ⁴ Baalumi ba Juda bakiinka, alimwi Jehova wakabapa luzundo aatala aba Kkanani aba Pelizi. Bakajaya bamwi babo bali zyuulu zili kkumi ku Bbezekki. ⁵ Bakajana Adoni-Bbezekki ku Bbezekki, alimwi bakamulwisya akuzunda ba Kkanani aba Pelezi. ⁶ Pesi Adoni-Bbezekki wakachija, mpawo bakamwandilila akumujata, alimwi bakamudunswida zyaala zyakwe zyakumawulu zipati. ⁷ Adoni-Bbezekki wakaamba kuti, ''Baami bali makkumi musanu aabili, aabo bakadunswiidwe zyaala azyaala zyakumawulu, bakabungika chakulya chabo kuzwa munsi aatebuli lyangu. Mbuli mbundakachita, mbubonya Leza mbwachita kulindime.'' Bakamuleta ku Jelusalema, alimwi wakafwa nkuko. ⁸ Baalumi ba Juda bakalwana aamunzi wa Jelusalema akuubweza. Bakawusikila apanga libosya akuumpa munzi. ⁹ Kumana kwaboobo, baalumi ba Juda bakaseluka kuyolwisya ba Kkanani aabo bakali kukkala munyika yazilundu, mu Negevi, amunyika zikunukide. ¹⁰ Ba Juda bakalwisya ba Kkanani aabo bakali kukkala mu Hebbuloni ( ichindi zina lya Hebbuloni lyakali Kkiliyati Alibba) alimwi bakazunda Syesyayi, Ahimani, a Talumayi. ¹¹ Kuzwa oko baalumi ba Juda bakiinka kuyolwana abakkali baku Debbili ( chiindi zina lya Debbili lyakali Kkiliyati Sefa). ¹² Kkalebbu wakaamba kuti, ''Kufumbwa ulwanisya Kkiliyati Sefa akuubweza, ndiyomupa, Akkisa, mwana wangu musimbi, kuti abe mwanakazi wakwe.'' ¹³ Otiniyeli, mwana mulombe wa Kkenazi ( mwanike wa Kkalebbu) wakazunda Debbili, aboobo Kkalebbu wakamupa Akkisa, mwana wakwe musimbi, kuti abe mwanakazi wakwe. ¹⁴ Akkisa asike biyo kuli Otiniyeli, mpawo wakamusungwazya kuti akumbile wisi kuti amupe muunda. Mbubonya mbwakaseluka ambongolo Kkalebbu wakamubuzya kuti, ''Nchiinzi nchendinga ndilakuchitila?'' ¹⁵ Wakaamba kuti kulinguwe, ''Kondipa chilongezyo. Mbwiinga wandipa nyika ya Negevi, alubo kondipa atusensa twameenda.'' Aboobo Kkalebbu wakamupa tusensa twaatala atwamunselelo. ¹⁶ Lunyungu lwa Syanyinazyalaa Mozesi mu Kkenayiti wakatanta kuzwa kumuunzi wa Tukunka abantu ba Juda, iili mu Negevi, kukuyokkala abantu ba Juda afwifwi a Aladi. ¹⁷ Baalumi ba Juda bakiinka abaalumi ba Simiyoni abakulana babo akuyolwanisya ba Kkanani bakakkede mu Zefati mpawo bakawunyonyoona chakumaninina. Zina lyamuunzi lyakali Homa. ¹⁸ Aliwi bantu ba Juda bakazunda Gaza anyika zizyungulukide, Asyikkeloni anyika iyizyungulukide, alimwi Ekkiloni anyika iyizyungulukide. ¹⁹ Jehova wakali abantu ba Juda mpawo bakabweza lukono lwanyika yazilundu, pesi tebakakonzya kutanda bakkali bamuntandabale nkambo bakali aankalaki zyalubulo. ²⁰ Kkalebbu wakapegwa Hebbuloni ( mbuli Mozesi mbwakaambide), alimwi wakatanda kuzwa ooko bana balombe batatu ba Anakki. ²¹ Pesi bantu ba Bbenjamini tebakabatanda pe ba Jebbusi bakakkede mu Jelusalemu. Aboobo ba Jebbusi bakachikkede abantu ba Bbenjamini mu Jelusalemu kusikila sunu. ²² Bang'anda ya Jozefu bakalibambila kukuyolwisya Bbeteli, alimwi Jehova wakali aambabo. ²³ Bakatuma baalumi kukutweela aali Bbeteli ?( muunzi ooyo walikwambwa kuti Luzi Lutanzi). ²⁴ Basikutweela bakabona muntu kazwa mumuunzi, alimwi bakaamba kuti kulinguwe, ''Weenche, tutondezye, mbotunga tulanjila mumuunzi, alimwi tuyokufwida luzyalo.'' ²⁵ Wakabatondeezya nzila injila mumuunzi, alimwi bakalwisya muunzi apanga libosya, pesi bakalekela muntu kwiinka ampuli yakwe yoonse. ²⁶ Eelyo muntu wakaya kunyika yaba Hiti mpawo wakakuyaka munzi akuulika kuti Luzi, ndendlyo zina lyawo ambulisunu. ²⁷ Bantu ba Manase tebakatanda bantu pe bakakkede mumyunzi ya Bbeti-Syani amagunzi aawo, na Tanakki amagunzi aawo, naa abo bakakkede mu Doli amagunzi aawo, na abo bakakkede mu Ibbuliyamu amagunzi aawo, aabo bakakkede mu Megido amagunzi angawo, nkaambo ba Kkanani bakakakatila kukukkala munyika eeyo. ²⁸ Ba Izilayili nibakabangunzu, bakamanikizya ba Kkanani kubabelekela mulimu muyumu, pesi tebakabatanda pe chkumaninina. ²⁹ Efulemu tewakabatanda pe ba Kkenani aabo bakakkede mu Gezeli, aboobo ba Kkanani bakendelela kukkala mu Gezeli akkati kabo. ³⁰ Zebbuluni tewakabatanda pe bantu bakakkede mu Kkitiloni, na bantu bakakkede mu Nahalolu, aboobo ba Kkanani bakeendelela kukukkala akati kabo, pesi Zebbuluni wakamanikizya ba Kkanani kukubabelekela mulimu muyumu. ³¹ Asyeli takabatanda pe bantu bakakkede mu Akko, na bantu bakakkede mu Sidoni, naa aabo bakakkede mu Ahibbu, Akkizibbu, Helubba, Afekki na Lehobbu. ³² Aboobo mukowa wa Asyeli wakalikkede akkati kaba Kkanani. (aabo bakakkede munyika ), nkambo tekabatanda pe. ³³ Mukowa wa Nafutali tewakabatanda pe abo bakakkede ku Bbeti Syemesyi a Bbeti Anati bakabamanikizigwa mulimo muyumu nkambo ka Nafutali. Nkinkaako bamukowa wa Nafutali bakakkala akati kaba Kkanani ( bantu bakakkede munyika eyo). Nekubaboobo, bakkali bamu Bbeti Syemesyi aba Bbeti Anati bakamanikizigwa mumilimu miyumu ya Nafutali. ³⁴ Ba Amoli bakamanikizya mukowa wa Dani kukkala munyika yazilundu, tebakazumizya pe kuselukila kuntandabale. ³⁵ Aboobo ba Amoli bakakkala ku Chilundu cha Helesi, mu Ayijaloni, alimwi mu Syalubbimu, pesi basilumamba basinguzu beng'anda ya Jozefu bakabazunda alimwi bakamanikizigwa kukubabelekela amulimu muyumu. ³⁶ Mugano waba Amoni wakali kuzwa kuchilundu cha Akkilabbimu ku Sela kuunjila munyika yazilundu.