¹ Samisoni wakaya kuGaza alimwi wakabona mwanakazi simamambe, mpawo wakoona awe. ² BaGaza bakaambilwa, ''Samisoni wasika ookuno.'' BaGaza bakabuzyunguluka busena oobo alimwi mukusisikizya bakamulindila busiku boonse kumanjililo aagunzi. Bakalyuumunizya busiku boonse. Bakali bati, ''Atulindile mane buche, mpawo tumujaye.'' ³ Samisoni wakalilede aabulo do aakati kabo busiku. Aakati kabusiku wakabuka alimwi wakajata kkoma lyamanjililo aagunzi amasamu mupati obile mpulyakajisilidi. Wakaamojola kuzwa munyika woonse akkoma lyawo, wapikula aamakuko aakwe, waabweza waatola aajulu lyachilundu kunembo lyaHebbuloni. ⁴ Musule aazezi, Samisoni wakaza kulisangalizya amwanakazi wakali kukkala muMumpata waSoleki. Zina lyakwe kali Delila. ⁵ Beendelezi babaFilisitiya bakaza kulinguwe, bakati kulinguwe, ''Na mweeneene Samisoni ubone aalede nguzu zyakwe mpati, alimwi kuti inga tulamuzunda biyeni, kuti tumwaange tumufwisye bweeme. Zichite eezi alimwi umwi awumwi wesu ulakupa zibela zyansiliva zili chuulu amwaanda (1,100).'' ⁶ Mpawo Delila wakati kuli Samisoni, ''Inche kaka ndaambile kuti nkaambonzi noli enguzu mpati zilibobu, alimwi muntu kubona wakwaanga biyeni kuti azyololoke?'' ⁷ Samisoni wakati kulinguwe, ''Kuti bandaanga amakole matete aali musanu aabili aatana yanikwa mpawo ndilamana nguzu ndikozyanie abantu boonse.'' ⁸ Mpawo beendelezi babaFilisitiya bakeeta kuli Delila makole aali musanu aabili atanayuma, alimwi wakaanga Samisoni angawo. ⁹ Lino wakali aabaalumi bakayubide mukusisikizya, kabakkala mung'anda yamukati. Wakati kulinguwe, ''BaFilisitiya mbabo bakusikila Samisoni!'' Pesi wakadunsula makole mbuli busumyo bwaguma mulilo. Aboobo insiswa yenguzu zyakwe teyakabbutulwa pe. ¹⁰ Mpawo Delila wakati kuliSamisoni, ''Oobu mbuwandeena akundaambila zyakubeja. Ikaka nche ndaambile mbunga ulazundwa.'' ¹¹ Wakati kulinguwe, ''Kuti bandaanga amakole mapya aatana belesegwa aamulimu, ndilamana nguzu ndibe mbuli baalumi boonse.'' ¹² Aboobo Delila wakatola makole mapya akumwaanga angawo, alimwi wakati kulinguwe, ''BaFilisitiya mbabo bakusikila Samisoni!'' Baalumi bakayubide bakali mung'anda yamukati. Pesi Samisoni wakadunsula makole kuzwa kumaboko aakwe anooti akali chibeela chabusumyo. ¹³ Delila wakati kuli Samisoni, ''Kusikila lino ulikundeena akundaambila manwa. Ndaambile kuti inga ulazundwa biyeni.'' Samisoni wakati kulinguwe, ''Kuti waluka susu lyangu muzimpusa zili musanu azibili alimwi mpawo uzyaange aamwi zisime, ndilaba mbuli bantu boonse.'' ¹⁴ Aawo nakali koona Samisoni, Delila wakaluka zimpusa musanu azibili zyasusu lyakwe akuzyaanga aamwi zyasima, eelyo wakati kulinguwe, ''''BaFilisitiya mbabo bakusikila Samisoni!'' Wakabuka kuzwa kung'onzi zyakwe mpawo wakaangununa zimpusa zyoonse. ¹⁵ Wakati kulinguwe, ''Ulaamba buti kuti, 'Ndakuyanda,' aawo kotaabilani ambebo insiswazyako? Kwaba tutatu kolikundichita chisesyo kotandaambili aawo nguzu zyako mpati mpuzilede.'' ¹⁶ Buzuba abuzuba wakamoongelezya loko mane wakasika mpayeeya kuti chali kubota kafwa zwakwe. ¹⁷ Aboobo Samisoni wakamwaambila zyoonse, alimwi wakti kulinguwe, ''Nsina buunsi ninyoolwa susu mumutwe wangu, nkaambo chiindi choonse ndakali muNazali waLeza mbundakali kuzwa mwida lyabaama. Na mutwe wangu wanyoolwa mpawo nguzu zyangu zilandisiya, alimwi ndiyoobula nguzu mbuli bantu boonse.'' ¹⁸ Aawo Delila naakabona kuti lino wamwaambila masimpe aatala amakani woonse, wakatuma ijwi akwiita beendelezi babaFilisitiya, kati, ''Amuboole alimwi, nkaambo lino wandaambila zyoonse.'' Mpawo beendelezi babaFilisitiya bakiinka kulinguwe, kabaletelezya ansiliva mumaboko aabo. ¹⁹ Wakamulazika aazibelo zyakwe mane woona. Wakiita umwi mwaalumi kuti amunyoole zimpusa zyasusu lyakwe zili musanu azibili, mpawo wakamuzunda, nkaambo nguzu zyakwe zyakali zyamusiya. ²⁰ Wakati, ''BaFilisitiya mbabo bakusikila Samisoni!'' Wakabuka kuzwa kung'onzi zyakwe wakati, ''Ndilazwa aanze mbuli mulizimwi zyiindi nkalizakamune chakwaangunuka.'' Pesi taakaziba kuti Jehova wakali wamusiya. ²¹ BaFilisitiya bakamujata akumunonkoola menso. Bakamweeta kuGaza akumwaanga anketani zyamundalila. Nguwakali kuziya kuziyo lyakuntolongo katonta bbwe lyakuziya aalyo. ²² Pesi susu lyamutwe wakwe lyakatalika kulampa alimwi musule aakunyoolwa. ²³ Beendelezi babaFilisitiya bakabungana aantomwe kuti bape chipayizyo chabo chipati kuli Dagoni leza wabo aloimwi akusekelela. Bakati, ''leza wesu wazunda Samisoni, sinkondoma, akumubika mumaboko eesu.'' ²⁴ Eelyo bantu nibakamubona bakalumbayizya leza wabo nkaambo bakati, ''Leza wesu wazunda sinkondoma alimwi wamupa kulindiswe - munyonyooni wanyika yesu, wakajaya biingi besu.'' ²⁵ Eelyo nibakali kusekelela, bakati, ''Amumwiite Samisoni azotusesye.'' Bakamwiita Samisoni kuzwa kuntolongo alimwi wakabasesya. Bakamuchita kuti ayimikile aakati kamayako mapati. ²⁶ Samisoni wakati kumulombe wakamujisi luboko, ''Ndizumizye kujata mayako aayo aajisi ng'anda, kuti ndiyaame kulingawo.'' ²⁷ Lino ng'anda yakalizwide baalumi abanakazi. Boonse beendeleze babaFilisitiya bakaliwo. Mung'anda yeejulu mwakali baalumi abanakazi bakali kukonzya kusika zyuulu zyotatwe bakali kweebela aawo Samisoni nakali kubasangalizya. ²⁸ Samisoni wakiita kuli Jehova wati, ''Mwami Jehova, amundiyeeye! Inche kaka amukandisimwe aaka komwe biyo, Leza, kuti ndikkwichizye kubaFilisitiya akaambo kamenso angu obilwe ngibakabweza.'' ²⁹ Samisoni wakajata mayako obile aakati aakajisi ng'anda akwatonta, limwi jako kululyo lwakwe alimwi kuchimweensi. ³⁰ Samisoni wakati, ''Andifwe abaFilisitiya!'' Wakatonta anguzu zyakwe alimwi ng'anda yakawida beendelezi abantu boonse bakali mulinjiyo. Aboobo bafu mbakajaya aawo nakafwa bakali biingi kwiinda mbaakajaya kachipona. ³¹ Mpawo bakulana bakwe aboonse beeng'anda yawisi bakaselukila nkuko. Bakamutola, akumuboozya alimwi bakamuzika aakati kaZola aEsitawoli kumaanda aManowa, wisi wakwe. Samisoni wakabeteka Izilayelikwaminyaka makumi obile.