¹ Bantu ba Izilayeli bakachita zintu zibi kumenso aa-Jehova, mpawo wakabaaba mumaanza aaba-Filisitiya myaaka iili makumi oone. ² Kakuli umwi mwalumi uuzwa ku-Zola, waluzubo lwaba-Dani, izina lyakwe kali Manowa. Mukayintu wakwe kali musundi alimwi katazyede pe. ³ Angelo wa-Jehova wakaboneka kumwanakazi akumwambila kuti, ''Bona lino, tona kuminta pe, mpawo tona kuzyala, pesi uyominta akuzyala mwana mulombe. ⁴ Lino chenjela utanywi wayini pe naa chintu chikola, mpawo utalyi chintu chimwi chisofweede. ⁵ Bona, uyominta akutumbuka mwana mulombe. Takoyonyoolwa abunini mumutwe wakwe, uyooba mu-Nazili wa-Leza mazuba kuzwa kuzyalilo lyakwe, mpawo ngonguwe uuti vune ba-Izilayeli mumaanza aaba-Filisitiya.'' ⁶ Mpawo mwanakazi wakasika akwambila mulumi wakwe kuti, ''Kwandizida muntu wa-Leza, abwiime bwakwe bwakali mbuli bwiime bwaangelo wa-Leza, bwakayoosya loko. Teendakabuzya nkwakazwa pe, alimwi taakandambila izina lyakwe. ⁷ Wakandaambila kuti, 'Bona! Uyominta, akuyotumbuka mwana mulombe. Aboobo atanywi wayini nichiba chimwi chisofweede, nkambo mulombe uyooba mu-Nazili wa-Leza kuzwa kubuzyale bwakwe kusikila kubuzuba bwalufu bwakwe.''' ⁸ Mpawo Manowa wakakomba kuli - Jehova akwaamba kuti, ''Aakaka, mwami, weenche lekela muntu wa-Leza nguwakatuma aboole kuli ndiswe alwabili kuti atuyiisye mbutweelede kuchita amwana amuntu uuti zyalwe.'' ⁹ Leza wakaswilila ijwi lyakwe Manowa, mpawo angelo wa-Leza wakaboola lubo alimwi kumwanakazi wakakkede mumuunda. Pesi Manowa mulumaakwe takaliko pe. ¹⁰ ASboobo mwanakazi wakachijana chakufwambana akuyowambila mulumi wakwe, ''Bona! Kwaboneka ooyu muntu wakandizida buzuba obo!'' ¹¹ Manowa wakabuka akutobela mwanakazi wakwe. Eelyo naakasika nkwakabede ooyo wakaamba kuti, ''Sena nduwe muntu wakambuula amwanakazi wangu?'' Muntu wwakati, ''Ndime.'' ¹² Aboobo Manowa wakti, ''Lino makani aako aabe anchoonzyo. Njiili milawo yamwana, mpawo njiili milimu yakwe?'' ¹³ Angelo wa-Jehova wakambila Manowa kuti, ''Welede kuchita chakuchenjela zyoonse nzindakamwambila. ¹⁴ Teelede kulya chintu chimwi chizwa kuwayini, mpawo teelede kulya chintu nichiba chimwi chisofweede. Uleelede kulemeka zyoonse nzindamulayilila kuti azichite.'' ¹⁵ Manowa wakaambila angelo wa-Jehova kuti, ''Weenche kolindila kuti ndiswe bunini, kuti utupe chiindi tukujikile kapongo.'' ¹⁶ Angelo wa-Jehova wakaambila Manowa kuti, ''Nikuba ndalindila, nsikoyoolya zyakulya zyako pe. Pesi na ulayanda kubamba chituuzyo chakuumpa, utule kuli Jehova.'' ( Manowa takalizi kuti ngu-Angelo wa-Jehova.) ¹⁷ Manowa wakaamba kuti kuli angelo wa-Jehova, ''Nduweni izina lyako, kuti tulemeke majwi aako naayoba nchobeni?'' ¹⁸ Angelo wa-Jehova wakamwaambila kuti kulinguwe, ''Nkambonzi wandibuzya izina lyangu? Lilagambya!''' ¹⁹ Aboobo Manowa wakabweza kapongo azilyo zyachipayililo mpawo aatala andomba lyachipayililo cha-Jehova. Wakachita zyoonse zyeebeka aawo Manowa amukayintu wakwe kabalokulangilizya. ²⁰ Kuchiindi mulilo wachipayililo niwakali kuya kujulu, angelo wa-Jehova wakaya kujulu mukati kamulilo wachipayililo. Manowa amukayintu wakwe nibabona eechi bakoona buvundeeme anyika. ²¹ Angelo wa-Jehova takazoboneka limbi kuli Manowa naa kukukakwe pe. Mpawo Manowa wakaziba kuti ngu-angelo wa-Jehova. ²² Manowa wakaambola mukakwe kuti, ''Nchobeni tulafwa, nkambo twabona Leza!'' ²³ Pesi mukaakwe wakamwambila kuti, ''Naa Jehova nakayanda kutujaya, takalikuno tambula chipayizyo chakutenta chazilyo nzitwakamupa alimwi takali kutubonia aya makani pe, naa chindi eechi talikunotulekela kumvwa zintu eezi pe.''' ²⁴ Kumazuba akatobela mwanakazi wakatumbuka mwana mulombe, mpawo wakamuniika izina lyakuti Samisoni. Mwana mulombe wakakomena alimwi Jehova wakamulongezya. ²⁵ Muuya wa-Jehova wakatalika kumubusya ku-Mahane Dani, aakati ka Zola a Esitawoli.