¹ Mompololo wakaza kubantu ba Ifulemu; bakayinda mu Zafoni mpawo bamba kuti kuli Jefuta, ''Nkambonzi niwazubikila kuyolwania abantu ba Amoni mpawo tewakatwiita pe kuti twiinke anduwe? Tuyowuumpa ng'anda yako.'' ² Jefuta wakamba kuti kulimbabo, ''Mebo abantu bangu twakali munkondo mpati loko abantu ba Amoni. Nindakakwiita tewakandivuna kuzwa kuli mbabo. ³ Nindakabona kuti tewandivuna ndakabikka buumi bwangu mujaanza lyangu mpawo ndakayinda mubantu ba Amoni, alimwi Jehova wakandipa kuzunda. Nkamboonzi niwasika sunu kuzolwana andime sunu?'' ⁴ Jefuta wakabunganisya aamwi bantu boonse ba Gliyadi akulwanisya Ifulemu nkambo bakaamba kuti, ''Nywebo nuba Giliyadi muli basikuchija mu Ifulemu-mu Ifulemu a Manase.'' ⁵ Ba Giliyadi bakabwezya zito zya Jodani zitola ku Ifulemu. Kufumbwa wakafutuka wa Ifulemu wakaamba kuti, ''Mundileke ndizubuke mutala lyamulonga,'' bantu ba Giliyadi bayowamba kuti kulinguwe, ''Sena uli mu Ifulemu? 'Na wamba kuti pe,'' ⁶ eelyo bayowamba kuti kulinguwe, amba kuti: ''Sibboleti'' ( nkambo takali kulyamba obotu ibbala), ba Giliyadi balikumujata akumujaya kuzito zya Jodani. Ba Ifulemu bai zyuulu zili makumi oone azibili bakajiigwa kuchiindi eecho. ⁷ Jefuta wakabeleka mwaaka musanu awumwi kuba Izilayeli mbuli mubetesi. Eelyo Jefuta mu Giliyadi wakafwa mpawo wakabambwa muli umwi yamyunzi ya Giliyadi. ⁸ Musule lyakwe, Ibbizani waku Bbetelehemu wakabeleka mbuli mubetesi atala a Izilayeli. ⁹ Wakali abana balombe bali makkumi aatatu. Wakapa bana basimbi mumakwatano bali makkumi atatu mpawo wakeetela bana bakwe balombe basimbi babamwi bantu bali makkumi aatatu. Wakabeteka ba Izilayeli kwamyaaka musanu ayibili. ¹⁰ Ibbizani wakafwa akuzikwa mu Bbetelehemu. ¹¹ Musule lyakwe Eloni mu Zebbuloni wakabeleka mbuli mubetesi aatala lya Izilayeli. Wakabeteka ba Izilayeli kwamyaaka iilikkumi. ¹² Eloni mu Zebbuloni wakazofwa akuzikwa mu Ayijaloni munyika ya Zebbuloni. ¹³ Musule lyakwe mwana mulombe wa Hileli mu Pilatoni wakabeleka mbuli mubetesi aatala aba Izilayeli. ¹⁴ Wakali abana balombe balimakkumi aane abazukulu balombe bali makkumi aatatu. Bakatanta mbongolo zilimakkumi musanu aabili alimwi wakabeteka ba Izilayeli kwamyaaka musanu ayitatu. ¹⁵ Abbidoni mwana mulombe wa Hileli mu Pilatoni wakafwa mpawo wakazikwa kunyika yachilundu chaba Amalekki.