¹ Mpawo Jakobo wakayita bana bakwe balombe alimwi wakati,: ''Amulibunge nywebo antomwe, kuti ndimwambile nywebo echo chiyochitika kulindinywe mubuzuba buza. ² Amubungane lwenu akuswilila, inywe nobana ba Jakobo. Amuswilile kuli Izilayeli, wuso wanu. ³ Lubbeni, ulimwana wangu mutanzi, inguzu zyangu, amatalikilo akusima kwangu, uyimvwi mubulemu, amunguzu. ⁴ Utayimikiziki mbuli manzi alokwenda, tokoyoba abupati pe, nkambo winka atala lya buulo bwa wuso. Aboobo wusofwazya; winka ataala lyamukaintu wangu. ⁵ Simiyoni a Levi mbanyina. Zilwisyo zyalumamba zyaabo ngemapanga aabo. ⁶ Omuuya wangu, utanjili mumvwiyo zyabo; Utaswanani mumibunga yabo, nkambo moyo wangu uli abulemu kulizezyo. Amunyemo zyabo bakajaya bantu. Amukunyema kwabo bakatyola musune. ⁷ Alunyemo lwabo lutukwe, abobo lwakali kuyoosya - alimwi akunyema kwabo kwabo kwakali kuyumu. Ndiyoba pambula muli Jakobo aa kubamwayusya muli Izilayeli. ⁸ Juda, ibakkulana bako bayokutembawula. Ikuboko kwako kuyoba atala ansingo zyaba sinkondonyokwe. Ibana bawuso bayokukkotamina kunembo lyako. ⁹ Juda mwana wa mulavu. Mwanangu mulombe wazunda kuli basinkondonyokwe.Wakakotama aansi, wenda mbuli mulavu, mbuli mulavu muzyazi. Ngwani unga uyomubusya ? ¹⁰ Inkoli tikoyomana kuzwa kuli Juda, Nuuba mufunko wabwami waakati kazituta zyakwe, mane Shilo akasike. Ngonguwe manyika ngatakaswilile. ¹¹ Uulanga mbongolo yakwe kumisansa, Amwana wembongolo yakwe inzyazi nimbotu, wasanzya zyakusama zyakwe muwayini, aa chikobela chakwe mumusinza wamasansa. ¹² Menso akwe ayoosalala pyu mbuli wayini, mpawo ameno akwe ayotuba buu mbuli malili. ¹³ Zebbuloni uyookala kunkomwe yawisi. Uyoba inkomwe yamaato, achisi chakwe. Chiosika aku Sidoni. ¹⁴ Izakkala nimbongolo isimide, iilala akati kazimpati zyambelele. ¹⁵ Wakabona nchilyokezezyo chibotu aayalo nyika ibotezya. Uyogogomeka ikkuko lyakwe kukuyumuna mpawo waba muzike kumulimo. ¹⁶ Dani uyobeteka bantu bakwe mbuli umwi wamisyobo ya Izilayeli. ¹⁷ Dani uyoba inzoka kumbali lya mugwagwa, Inzoka ilabuyoka munzila eeyo iluma mbizi kunsumba, kuti sikutanta weyo awide musule. ¹⁸ Ndalindila lufutuko lwako, Jehova. ¹⁹ Gadi - basikutanta bayokufumpa, pesi takwe uyofumpa tusimbi twabo. ²⁰ Asha zilyo zyakwe ziyonenesya, mpawo uyoopa zinono zya Mwami. ²¹ Nafutali ninsya iyangunukide; mpawo uyoopa zinono zyamwami. ²² Jozefu ngomutabi uuzyalisya michelo, mutabi uzyalisya afwifwi a kasensa, mitabi yakwe ilatandabala abulambo. ²³ Basitunta bayomufumpa mpawo akumudubula akumupenzya. ²⁴ Pesi buta bwakwe kabuchilimvwi njii, mpawo maboko ayoba enguzu wa Jakobo, nkambo kazina lya mwembeli, imwaala wa Izilayeli. ²⁵ Leza wabamawuso uyokugwasya aa Leza singuzu uyokulongezya azilongezyo zyaku julu, azilongezyo zyimikide zyaansi anyika, aa zilongezyo zyankolo aa-zya zyalilo. ²⁶ Izilongezyo zyawuuso nzipati kwiinda zilongezyo zyachiindi zyazilundu nanka zintu ziyandisi tulundu twachindi. Zibe amutwe wa-Jozefu, zibe atala lyamusinsimi wamutwe wabana bababunyina. ²⁷ Bbenjamini nguumpe ulanzala. Chifumo ulalya indume, alimwi igoko ulandania inyama.'' ²⁸ Eyii njemisyobo ilikkumi ayibili yaba Izilayeli. Eechi nchenchicho nchibakambilwa kuliba mawisi nakabalongezya. Awumwi-awumwi wakalongezegwa achilongezyo chmwelede. ²⁹ Nkinkako wakabalayilila mpawo wabambila, ''Ndamba kwiinka kubantu bangu. Mukandizike kuli bamataata musempo lili mumuunda wa Efuloni mu Hititi, ³⁰ Musempo eelyo lilimumunda wa Machipela, lili kufwifwi aku Mamule munyika yaKkenani, muunda oyo Abbulahamu ngwakawulide kuti ube mawumbwe kuzwa ku Efuloni mu Hitite. ³¹ Nkuko nkuba vwikila Abbulahamu a Sla mukakwe; nkuko nkubakavwikila Ayizeki a Lebeka mukakwe; mpawo nkuko ndavwikila Liiya. ³² Muunda aa musempo lilimunguwo lyakawulidwe kuzwa kubantu ba Heti.'' ³³ Lino Jakobo nakamaninsya kulayilila banabakwe, wakaboozya zituta zyakwe abulo wafwa, wayinka kulibasinsiku bakwe.