¹ Chakasika aatala lyazintu eezi, kuti umwi wakaambila Jozefu kuti, ''Langa, wuso ulichisidwe.'' Aboobo wakabweza bana bakwe balombe bobile, Manase a Ifulemu. ² Eelyo Jakkobbu nakaambilwa, ''Langa, mwana wako mulombe Jozefu wasika kuzokubona,'' Izilayeli wakaliyumya-yumya alimwi wakkala abulo. ³ Jakkobbu wakati kuli Jozefu, ''Leza Singuzuzyoonse wakalibonia kulindime ku Luzi munyika ya Kkenani. Wakandilongezya ⁴ alimwi wakati kulindime, 'Bona, ndiyokuchita kuti ukabe amichelo, alimwi ndiyokuvuzya. Ndiyochita kuzwa mulindime imbungano yamanyika. Ndiyoopa nyika eeyi kulunyungu lwako mbuli buvubi bwalyoonse.' ⁵ Lino bana bako balombe babili, aabo bakatumbukwa kulinduwe munyika ya Ijipiti nkesinaasika kulinduwe munyika ya Ijipiti, mbibangu. Ifulemu a Manase bayooba bangu, mbuli Lubbeni a Simiyoni mbubali bangu. ⁶ Bana mbolaabo musule lyabo bayooba bako; bayoolembwa munsi lyamazina abakulana babo bachaalumi mulukono lwabo. ⁷ Pesi lwangu, eelyo nindakazwa ku Padeni, kukuusa kwangu Lakkeli wakafwa munyika ya Kkenani munzila, nkakuchili musinzo kuya ku Efulati. Ndakamuzika nkuko munzila yaku Efulati'' (njenjiyo Betelehemu). ⁸ Eelyo Izilayeli nakabona bana balombe ba Jozefu, wakati, ''Mbaani aaba?'' ⁹ Jozefu wakaambila wisi, '''Mbana bangu balombe, abo Leza mbakandipa okuno.'' Izilayeli wakati, "Beete kulindime, ikuti ndibalongezye.'' ¹⁰ Lino menso a Izilayeli akali aagubilizi akaambo kaminyaka yakwe, aboobo takachilikubona pe. Aboobo Jozefu wakabeeta afwifwi kulinguwe, alimwi wakabamyonta akubakumbata. ¹¹ Izilayeli wakati kuli Jozefu, ''Tendakalikuyeeyela kubona busyu bwako pe limbi, pesi Leza wandizumizya kuti ndibone bana bako.'' ¹² Jozefu wakabeeta kuzwa aakati kamazwi a Izilayeli, alimwi wakavundama a busyu bwakwe kunyika. ¹³ Jozefu wakabatola boonse babili, Ifulemu muluboko lwakwe lwachilisyo kunembo lya luboko lwa Izilayeli lwachimweensi, alimwi Manase muluboko lwakwe lwachimweensi kunembo lya luboko lwa Izilayeli lwa chilisyo, alimwi wakabeeta afwifwi kulinguwe. ¹⁴ Izilayeli wakasikila luboko lwakwe lwachilisyo alimwi walutandabika aatala lyamutwe wa Ifulemu, wakali muniini, alimi luboko lwakwe lwachimweensi aatala lyamutwe wa Manase. Wakapiyania maboko aakwe, nkaambo Manase mwana mutanzi. ¹⁵ Izilayeli wakalongezya Jozefu, nkali kuti, ''Leza ooyo nkubakeenda kunembo lyakwe bamataata Abbulahamu a Ayizekki, Leza ooyo uchindibambide ambuli sunu, ¹⁶ mungelo wakandivuna kulizyoonse zichisa, ngalongezye balombe aaba. Izina lyangu ngalikawuzikwe alimbabo, alimwi azina lyamataata aangu Abbulahamu a Ayizekki. Ngabakomene akuba nkamu enyika.'' ¹⁷ Eelyo Jozefu nakabona wisi kabikide luboko lwakwe aatala amutwe wa Ifelemu, tezyakamubotezya pe. Wakaweza luboko lwawisi lwachilisyo kuzwa ku mutwe wa Ifulemu kuya kumutwe wa Manase. ¹⁸ Jozefu wakaambila wisi, ''Tensi mbubo, taata wangu; nkaambo ooyu ngonguwe mwana mutanzi. Bika luboko lwako lwachilisyo aatala amutwe wakwe.'' ¹⁹ Wisi wakakkaka alimwi wakati, ''Ndilizi, mwana wangu mulombe, ndilizi. Alakwe uyooba muntu, alimwi alubo uyooba mupati. Pesi mwanike wakwe uyooba mupati kwiinda nguwe, alimwi lunyungu lwakwe luyooba makkamu amanyika.'' ²⁰ Izilayeli wakabalongezya buzuba oobo amajwi aaya, ''Bantu ba Izilayeli bayowamba zilongezyo kwiinda mumazina aako nkabati, 'Leza akuchite kuti ube mbubonya mbuli Ifulemu a mbuli Manase.''' Muli yeeyi nzila, Izilayeli wakabika Ifulemu kunembo lya Manase. ²¹ Izilayeli wakati kuli Jozefu, ''Bona, ndaamba kufwa, pesi Leza uyooba andinywe, alimwi uyomuboozya kunyika yabamawuso. ²² Kulinduwe, mbuli ooyo uli aatala lyabakulana bakwe, ndilakupa chilundu chinkuneme nchindakabweza kuzwa kuma Amoliti apanga lyangu a kanta kangu.''