¹ Yawe wakaswiilila Sala mbuli mbaakaamba kuti uyoochita, alimwi Jehova wakachitila Sala mbuli mbakali wasyomezya. ² Sala wakamita alimwi wazyalila Abbulahamu mwana mulombe kubuchembele bwakwe, kuchiindi chili mbuli eecho chakabambidwe Leza nchaakali waamba kulinguwe. ³ Abbulahamu wakawuzika mwana wakwe mulombe, ooyo umwi ngwaakazyalilwa, ooyo Sala ngwaakazyala, Ayizekki. ⁴ Abbulahamu wakapalula mwana wakwe Ayizekki naakali waba aamazuba musanu aatatu, mbuli Leza mbaakamulayilila. ⁵ Abbulahamu wakali aaminyaka iili mwaanda yakuzyalwa nakazyalilwa Ayizekki. ⁶ Sala wakati, ''Leza wandichita kuti ndiseke; woonse uumvwa uyooseka aantomwe andime.'' ⁷ Alubo wakati, ''Ngwani wakali kuyoowamba kuli Abbulahamu kuti Sala uyoolela bana, alimwi ndamuzyalila mwana mulombe ku buchembele bwakwe!'' ⁸ Mwana wakakkomena akulesegwa, alimwi Abbulahamu wakabamba ipobwe pati mubuzuba Ayizekki nakalesegwa. ⁹ Sala wakabona mwana wa Hagayi mu Egepita, ngwakazyalila Abbulahamu, kamuseka. ¹⁰ Akaako wakati kuli Abbulahamu, ''Mutande mwanakazi muzike amwana wakwe, nkaambo mwana ooyu wa mwanakazi muzike takabi sikulya lukkono amwana wangu, Ayizekki.'' ¹¹ Eechi chintu chakamuchisa kapati Abbulahamu akaambo kamwana wakwe mulombe. ¹² Pesi Leza wakati kuli Abbulahamu, ''Utalili akaamboka ka mwana mulombe, alimwi akaambo ka mwanakazi muzike. Swiilila majwi aakwe woonse ngaawamba kuli nduwe aatala akaka kaambo, nkaambo kwiinda muli Ayizekki izyalane lyako muliyoovuzigwa. ¹³ Ndiyoochita alubo mwana mulombe wa mwanakazi muzike kuba chisi, nkaambo ndizyalane lyako.'' ¹⁴ Abbulahamu wakabuka chifumofumo, wabweza chibunge, achinkuli cha maanzi, alimwi wapa Haga, wabika aakkuko lyakwe. Wamupa mulombe akumwaanda. Wakeenda akuzelengana mulusaka lwa Bbeyasebba. ¹⁵ Aawo maanzi akali mu chinkuli nakamana, wakasiya biyo mwana munsi lyachimwi chiteyo. ¹⁶ Mpawo wakayinka, alimwi waakaukkala aansi kulekule anguwe, wakasibe mbuli wakuwaala kavwi, nkaambo wakati, ''Nditalangi aatala alufu lwa mwana.''Mbuli nakakkede kuzwa kulinguwe, wakanyampula ijwi lyakwe alimwi walila. ¹⁷ Leza wakamvwa ijwi lya mwana mulombe, alimwi angelo wa Leza wakayita Haga kuzwa kujulu, alimwi wakati kulinguwe, ''Niinzi chikukataazya Haga? Utayowi, nkaambo Leza wamvwa ijwi lya mulombe nkwabede. ¹⁸ Nyampuka, busya mwana mulombe, alimwi musungwaazye, nkaambo ndiyoomuchita kuba chisi chipati.'' ¹⁹ Mpawo Leza wakajula menso aakwe, alimwi wakabona chikala chamaanzi. Wakayinka alimwi wazuzya maanzi muchinkuli, alimwi wapa mulombe aakunywa. ²⁰ Leza wakali aamulombe, alimwi wakakkomena. Wakakkala munkanda akuba sikavwi. ²¹ Wakali kukkala munkanda ya Palani, alimwi banyina bakamujanina mukayintu kuzwa kunyika ya Egepita. ²² Kwakasika kuchiindi eecho Abbimeleki a Pikkolu muzuluzi wabasilumamba bakwe nibakaambula kuli Abbulahamu, bakati, ''Leza uli aanduwe kulizyoonse nzyochita. ²³ Lino akaako konkezya aLeza aano kulindime kuti tokoyooyendelezya chakubeja kulindime, nikuba kubana bangu, nikuba kulunyungu lwangu. Tondeenzya kulindime alimwi akunyika njiwakakkede kusyomeka kuchizuminano nchindakatondeezya kulinduwe.'' ²⁴ Abbulahamu wakati, ''Ndilakonka.'' ²⁵ Abbulahamu alubo wakanyontawukila Abbimeleki aatala achikkala chamaanzi babelesi ba Abbimeleki nchibakabweza kuzwa kulinguwe. ²⁶ Abbimeleki wakati, ''Tandimwizi pe wakachita chintu eechi. Tewakandaambila pe lutaanzi kusikila lino; takwe nchindalinaamvwa pe do sunu.'' ²⁷ Akaako Abbulahamu wakabweza imbelele alimwi abasune akuzipa kuli Abbimeleki, alimwi bantu babili bakabumba chizuminano. ²⁸ Mpawo Abbulahamu wakabamba bana bambelele bazyazi bali musanu ababili abaliike kuzwa mubutanga. ²⁹ Abbimeleki wakati kuli Abbulahamu, ''Mbupanduluzi buli buti oobu bwabana bembelele bali musanu ababili mbuwabika aabalike?'' ³⁰ Wakasandula, ''Aaba bana bembelele bazyazi bali kusanu ababili mbuyootambula kuzwa ku luboko kwangu, kuti chikabe bukamboni bwangu, kuti ndakasya chikkala eechi.'' ³¹ Akaako wakuuzika busena oobo Bbeyasebba, nkaambo ooko kabali babili bakakonka chikonke. ³² Bakabumba chizuminano ku Bbeyasebba, alimwi mpawo Abbimeleki a Pikkolu, muzuluzi wabasilumamba bakwe, bakabweeda kunyika ya baFilisitiya. ³³ Abbulahamu wakabyala musamu wa Tamalisiki mu Bbeyasebba. Ooko wakakomba Jehova, Leza walyoonse. ³⁴ Abbulahamu wakakkala kali mweenzu munyika ya baFilisitiya mazuba miingi.