¹ Abbulahamu wakeenda kuzwa ooko kaya kunyika yaNegevi, alimwi wakakkala aakati ka Kkadesyi a Suli. Wakali muzwakule wakali kukkala mu Gela. ² Abbulahamu wakaamba aatala aSala banakwe, ''Muchizi wangu.'' Aboobo Abbimeleki mwaami wa Gela wakatumwa alimwi wakamubweza Sala. ³ Pesi Leza wakaza kuli Abbimeleki mansiku muchiloto, alimwi wakati kulinguwe, ''Bona, ulimwaalumi uufwide nkaambo kamwanakazi nguwatola nkaambo mbana muntu.'' ⁴ Lino Abbimeleki taakalinaasika pe aafwifwi anguwe alimwi wakati, ''Mwaami, kujana wajaya na nyika iiluleme? ⁵ Taakamba na lwake mwini kulindime, 'Muchizi wangu?' Nikuba we lwakwe wakaamba, 'Munyaandumi wangu.' Ndakazichita eezi mubuntu bwamoyo amukubula mulandu kumaanza aangu.'' ⁶ Mpawo Leza wakati kulinguwe muchiloto, ''Iyii, ndalizi kuti mubuntu bwamoyo wako wakachita eechi, alimwi ndakakukasya kuti undibisizye. Nkinkaako tendakakuzumizya pe kuti umugume. ⁷ Nkinkaako, bwedezya mukayintu wamuntu, nkaambo musinsimi. Uyookukombela, alimwi uyoopona. Pesi ikuti tewamubwedezya, ziba kuti iwe abako boonse nchobeni muyoofwa.'' ⁸ Abbimeleki wakabuka chifumo loko alimwi wakayita balanda bakwe boonse kulinguwe. Wakabaambila zyoonse zintu eezi, alimwi bantu bakayowesya loko. ⁹ Mpawo Abbimeleki wakayita Abbulahamu akwaamba kuti kulinguwe, ''Niinzi nchimwachita kulindiswe? Ndakubisizya biyeni, kuti weete alindime alimwi akubwaami bwangu chibi chipati? Wachita eezyo ziteelede kuchitwa kulindime.'' ¹⁰ Abbimeleki wakati kuli Abbulahamu, ''Niinzi chakuchitya kuti uchite chintu eechi?'' ¹¹ Abbulahamu wakati, ''Nkaambo ndakayeya, 'Nchobeni takwe kuyowa Leza pe abusena oobu, alimwi balandijaya nkaambo kamukayintu wangu.' ¹² Nikuba boobo, nchoonzyo muchizi wangu, mwana musimbi wa taata, pesi uutali mwana musimbi wa baama; alimwi wakaba mukayintu wangu. ¹³ Aawo Lea naakandichita kuti ndisiye n'anda ya taata alimwi nkenjobweendenda kubusena abusena, ndakati kulinguwe, 'Weelede kunditondezya busyomesi oobu mbuli mukayintu wangu: Kufumbwa kubusena ooko nkutwaya, wamba aatala andime, ''Munyandumi wangu.'''' ¹⁴ Mpawo Abbimeleki wakabweza mbelele a basune, alimwi bazike baalumi a banakazi, akubapa kuli Abbulahamu. Mpawo wakabwedezya Sala, mukayintu wa Abbulahamu, kulinguwe. ¹⁵ Abbimeleki wakati, ''Langa, inyika yangu ilikunembo lyako. Kkala kufumbwa akubotezya.'' ¹⁶ Kuli Sala wakati, ''Langa, ndapa munyandumi wako chuulu cha nsiliva. Njakusitizya kufumbwa mulandu aatala anduwe kumenso aabaabo bali aanduwe, alimwi akuli boonse bali aanduwe, alimwi kunembo lyaboonse, mwachitilwa kabotu chakumaninina.'' ¹⁷ Mpawo Abbulahamu wakakomba kuli Leza, alimwi Leza wakasilika Abbimeleki, banakwe, a bazike bakwe bechanakazi kuchitila kuti bakonzye kuba aabana. ¹⁸ Nkaambo Jehova wakali wachitila banakazi boonse ben'anda ya Abbimeleki kuti batakazyali pe kwalyoonse, nkaambo ka Sala, mukayintu wa Abbulahamu.