¹ Bangelo babili bakasika ku Sodomu goko, Loti naka kkede amulyango wamunzi. Loti wakababona, wakanyampuka kuti aswaanane aabo, mpawo wakavundama abusyu bwakwe ansi. ² Wakati, ''Akaka nobasimalelo bangu, ndamukumbila kuti munyonele kun'anda yamuzike wanu, mukkale mansiku aano, akusamba ndyato zyenu. Mpawo muyobuka chifumo akutola lweendo lwanu.'' Alimwi bakati, ''Pe, tuyobuchesya mansiku katuli mubbuwa lyadolopo.'' ³ Pesi wakabakombelezya loko, mpawo bakayinka anguwe, alimwi bakanjila mun'anda yakwe. Wakabamba chakulya alimwi wabajikila chibunge chitakwe busweezyo, alimwi bakalya. ⁴ Pesi kabatana wona, baalumi bamuchisi, baalumi ba Sodomu, bakazyunguluka n'anda, baniini a bapati, bantu boonse bakayoboloka kuzwa kumabbazu woonse achisi. ⁵ Bakayita Loti, alimwi bakati kulinguwe, ''Balikuli baalumi baza kulinduwe goko? Beete kulindiswe, kuti tubazibe.'' ⁶ Akaako Loti wakazwa alimwi wajala kkoma wayinka kuli mbabo. ⁷ Wakati, ''Ndamukumbila nobakkulana bangu, mutachiti bubi. ⁸ Amubone, ndilijisi basimbi babili batanaziba nikuba mwaalumi. Amuleke, ndamukkumbila, ndibape kulindinywe, alimwi mukachite kulimbabo kufumbwa chibotu kumenso eenu. Biyo mutachiti chintu kuli baaba bantu, nkaambo baza mucheenzule chakaluli kangu.'' ⁹ Bakati, ''Bweedela musule!'' Bakati alubo, ''Ooyo wakaza kuzokkala mbuli muzwakule, alimwi lino wakaba mubetesi wesu! Lino tuyochita bubi bwiindilide alinduwe kwiinda alimbabo.'' Bakamulwisya kapati mwaalumi, kulwisyanya a Loti, alimwi bakali baamba kutyola kkoma. ¹⁰ Pesi baalumi bakatalamuna maboko aabo alimwi bakwela Loti mun'anda akujala kkoma. ¹¹ Mpawo beenzu ba Loti bakoofwazya bantu boonse bakali aanze en'anda, boonse baniini a bapati, kuchitila kuti bakawuumpulike baakuyandawula mulyango. ¹² Mpawo baalumi bakati kuli Loti, ''Ulaawumwi na uumbi omuno? Uli aabakwansa na, bana bako balombe a bana bako basimbi, a kufumbwa ngoli aawe muchisi, bagwisye omuno. ¹³ Nkaambo twaamba kunyonyoona busena obuno, nkaambo bubi bwabo kuli Jehova bwavulisya nchaatutuma kuzoochinyonyoona.'' ¹⁴ Loti wakiinka aanze alimwi wakaambula abakwansa bakwe, baalumi bakasyomezezye kukkwata bana bakwe basimbi, alimwi wakati, ''Chakufwambana, amuzwe aabusena oobu, nkaambo Jehova uyanda kunyonyoona chisi.'' Pesi bakwaansa bakwe bakabonaanga mudanta. ¹⁵ Nikwakaba kubuchedo, bangelo bakasungilizya Loti, kabati, ''Kamuya, bweza mukkazi wako a bana bako basimbi bali aano, kuti utasukutizyi muchisubulo chachisi.'' ¹⁶ Pesi wakakkala. Aboobo mwaalumi wakajata jaanza lyakwe, a jaanza lya mukkazi wakwe, a maanza a bana bakwe basimbi babili, nkaambo Jehova wakamufwida luzyalo. Bakabagwisya aanze, alimwi babakkazika aanze kwachisi. ¹⁷ Nibakabagwisya aanze, umwi wa baalumi wakati, ''Amuchije abuumi bwanu! Mutachebuki musule, nikuba kukkala mubbuwa. Mukalobokele kuchilundu kuti mutakanyonyooki.'' ¹⁸ Loti wakati kulimbabo, ''Pe, kaka, nobasimalelo bangu! ¹⁹ Mulanda wanu wajana luzyalo kumenso aanu, alimwi mwanditondeezya buuya bupati akufutula buumi bwangu, pesi nsikkonzyi kulobokela kuzilundu, nkaambo lunyonyooko luyoondeezya, alimwi ndiyoofwa. ²⁰ Langa, echiya chisi chiboneka okuya chili aafwifwi kukuchijila kuli nchicho, alimwi nchiniini. Akaka, muleke ndobokele nkuko (tachili chiniini na?), alimwi buumi bwangu buyoofutulwa.'' ²¹ Wakatim kulinguwe, ''Nchibotu, ndiyookupa chikumbizyo eechi alimwi, kuti nsikoyoonyonyoona chisi nchuwaamba. ²² Fwambaana! Lobokela nkuko, nkaambo nsikkonzyi kuchita chintu kusikila usike nkuko.'' Nkinkaako chisi chakali kutegwa Zowali. ²³ Izuba lyakali lyazwa aawo Loti nakasika ku Zowali. ²⁴ Mpawo Jehova wakawisya aatala a Sodomu a Gomola salifa a mulilo uuzwa kuli Jehova kuzwa mu mulenga-lenga. ²⁵ Wakanyonyoona zisi eezyo, amabbuwa woonse, abantu boonse bamuzisi, amisamu yoonse iimena aanyika. ²⁶ Pesi mukkazi wa Loti, wakali musule lyakwe, wakachebuka musule, mpawo wakaba chuulu chamwinyo. ²⁷ Abbulahamu wakabuka chifumo loko alimwi wayinka kubusena nkwakayimvwi kunembo lya Jehova. ²⁸ Wakalanga aansi ku Sodomu a Gomola akunyika yoonse yamabbuwa. Wakalanga alimwi wakabona, busi bwakali kuunta kuzwa aanyika mbuli busi bwabbila lyamulilo. ²⁹ Aboobo Leza wakanyonyoona zisi zya mabbuwa, Leza wakayita Abbulahamu kumizeezo. Wakatuma Loti kuzwa aakati kalunyonyooko aawo nakanyonyoona zisi oomo Loti mwakali kukkala. ³⁰ Pesi Loti wakatanta kuzwa ku Zowali kuyookkala muzilundu abana bakwe basimbi babili, nkaambo wakayowa kukkala mu Zowali. Aboobo wakakkala munkomwe, we abana bakwe basimbi babili. ³¹ Mutaanzi kukuzyalwa wakati kumuniini, ''Taata wesu wachembaala, alimwi tatukwe mwaalumi ngutukonzya koona aawe pe mbuli kuchiyanza chanyika yoonse. ³² Koza, ngatuchite taata wesu anywe wayini, alimwi tuyowona aanguwe, kuchitila kuti tukakkomezye luzubo lwa taata.'' ³³ Aboobo bakachita wisi kuti anywe wayini mansiku aayo. Mwana mutaanzi wakanjila alimwi wawoona awisi wakwe; wisi takaziba pe kuti mwana wakalala chiindi nzi, nikuba kuti wakabuka chiindi nzi. ³⁴ Buzuba butobela mwana mutaanzi wakati kumwanike wakwe, ''Swiilila, mansiku ayinda ndakoona a taata. Atumuchite kuti anywe lubo wayini mansiku aano, alimwi weelede kunjila akoona aawe, kuchitila kuti tukomezye luzubo lwa taata. ³⁵ Aboobo bakamuchita wisi wabo kuti anywe lubo mansiku aayo, alimwi wakanjila akoona aawe. Wisi taakaziba pe kuti mwana wakalala chiindi nzi, nikuba kuti wakabuka chiindi nzi. ³⁶ Aboobo bana basimbi boonse ba Loti bakamitisigwa a wisi wabo. ³⁷ Mwana mutaanzi wakazyala mwana mulombe, alimwi wakamuuzika kuti Mowabbu. Wakaba wisi wabaMowabbu basunu. ³⁸ Kumwana musimbi muniini, alakwe wakazyala mwana mulombe, alimwi wakamuuzika kuti Bbeni Ami. Nguwe wakaba wisi wabantu ba Amoni basunu.