¹ Yawe waklibonya kuli Abbulahamu aakati kamasamu aa Mamule, nakakkede amulyango watente sikati mukupya kwe zuba. ² Wakalanga kujulu alimwi, langa, wakabona baalumi batatu kabiimvwi kuzwa kulinguwe. Eelyo nakabona, wakachijaana kuyobatambula kuzwa kumulyango watente alimwi wavundama aansi aanyika. ³ Wakati, ''Mwaami, na ndajana luzyalo mumenso aako, utayindi mbali akusiya mulanda wako. ⁴ Muleke kweetwe twaanzi, musambe ndyato, alimwi mulyookezye munsi lyamunsamu. ⁵ Amuleke ndilete chakulya chiche, kuchitila kuti mulibukulusye lwanu. Kuzwa aawo mulayinka anzila yenu, mbukunga mwaza kumuzike wenu.'' Limwi bakati, ''Chita mbuli mbuwamba.'' ⁶ Mpawo akufwambana Abbulahamu wakanjila mutente kuli Sala, akuti, ''Fwambana, bweza zyeelesyo zitatu zyabusu bunante bwa fulawa, kkopa, upange chibunge.'' ⁷ Mpawo Abbulahamu wakachijanina kubutanga, alimwi wabweza chana cha n'ombe chiteteete chibotu, akupa mubelesi, ooyo wakafwambana kuchibamba. ⁸ Wakabweza masase, amalili, alimwi amwana wen'ombe wakali wabambwa, a kubika kulya kunembo lyabo, alimwi wakiima kumbali lyabo munsi lyamusamu bo kabali kulya. ⁹ Bakati kulinguwe, ''Ulikuli Sala mukayintu wako?'' Wakasandula, ''Omiya, mutente.'' ¹⁰ Wakati, ''Nchobeni ndiyooboola chakutaleka kulindinywe muchiindi chakulwaaka, alimwi bona, Sala mukkazi wako uyooba amwana mulombe.'' Sala wakalikuswiilizya kali aamulyango watente, lyakali musule lyakwe. ¹¹ Lino Abbulahamu a Sala bakali bachembaala, bakali biindilila loko kuminyaka yakuzyala, alimwi Sala wakali wiinda minyaka yamwanakazi njakkonzya kuzyala bana.Nkinkaako ¹² Sala wakaliseka, akulyaambila kuti, ''Kandili ndazakala oobu a simalelo wangu wakkomena, kujana lino ndakujana na kubotelwa ooku?'' ¹³ Yawe wakati kuli Abbulahamu, ''Nkaambonzi Sala naseka akwaamba kuti, 'Ndiyomuzyala na nchobeni mwana, kendi ndachembaala'? ¹⁴ Sena kuli chintu chiyumu kuli Jehova? Kuchiindi nchindaamba, kulwaaka, ndiyoboola kulinduwe. Kuchiindi chakasibe mbuli cheechi mumunyaka uza Sala uyooba a mwana mulombe.'' ¹⁵ Mpawo Sala wakazikaka alimwi wati, ''Tendaseka pe,'' nkaambo wakali wayowa. Wakasandula wati, ''Pe, waseka.'' ¹⁶ Mpawo baalumi bakanyampuka akweenda kabakunuka kabalangide Sodomu. Abbulahamu wakiinka aambabo kubabona munzila yabo. ¹⁷ Pesi Jehova wakati, ''Ndisise na kuli Abbulahamu kuti niinzi ncheyanda kuti ndichite, ¹⁸ mbuli kuti Abbulahamu chanchobeni uyooba chisi chipati alimwi chili aanguzu, alimwi zisi zyoonse zyenyika ziyoolongezegwa mulinguwe? ¹⁹ Nkaambo ndakamusala kuchitila kuti alayilile bana bakwe aben'anda yakwe kuti bakalondole inzila ya Jehova, akuchita bululami a bubotu, kuchitila kuti Jehova nga ulaleta aatala a Abbulahamu eezyo nzyakaamba kulinguwe.'' ²⁰ Mpawo Jehova wakati, ''Akaambo kakulila aatala a Sodomu a Gomola kupati, alimwi akaambo chibi chabo chipati loko, ²¹ ndiyooyinka aansi aawo a kubona kulila kuli aatala anguwe ooko kwakasika kulindime, na kuti bakazichita nchobeni. Na pe, ndiyoziba.'' ²² Nkaako baalumi bakachengunuka kuzwa ooko, alimwi biinka kabalangide Sodomu, pesi Abbulahamu wakachaala kayimvwi kunembo lya Jehova. ²³ Mpawo Abbulahamu wamusikila wati, ''Uyoonyonyoona na baluleme a basizibi aantomwe? ²⁴ Amwi kuli makkumi musanu baluleme mudolopo. Uyoolinyonyoona na akutalondola busena akaambo ka bali kkumi baluleme balimo oomo? ²⁵ Akukabe kule kuzwa kulinduwe kuyoochita chintu chili boobo, kujaya baluleme a babi, kuti baluleme bajatwe bweelene ababi. Akukabe kule anduwe! Sena sikubeteka wanyika yoonse takoyoochita chibotu?'' ²⁶ Jehova wakati, ''Kuti na ndajana mu Sodomu baalumi bali makkumi aali musanu baluleme mukati ke dolopo, mpawo ndiyoyokola busena boonse akaaambo kambabo.'' ²⁷ Abbulahamu wakasandula alimwi wati, ''Langa, ndalipeda kwaaambula ku Mwaami wangu nikuba kuti ndilibiyo lusuko adota! ²⁸ Ani kuti kwalela musamu ku makkumi musanu baluleme? Uyoonynyoona na dolopo lyoonse akubulila kwa musanu?'' Alimwi wakati, ''Tandikoolinyonyoona pe, na ndajana nkuko makkumi aane amusanu.'' ²⁹ Wakaambula kulinguwe alubo, a kuti, ''Ani kuti kakuli makkumi aane aajanika nkuko?'' Wakasandula, ''Tandikwe kuyoochichita pe akaambo kamakkumi aane.'' ³⁰ Wakati, ''Inche kaka utanyemi pe, Mwaami, kuti ndaambule. Amwi makkumi atatu balajanika nkukooko.'' Wakasandula, ''Tandikwe kuyoochichita na ndajana makkumi atatu nkuko.'' ³¹ Wakati, ''Langa, ndalipeda kwaambula ku Mwaami wangu! Amwi makkumi aabili balakujanika nkuko.'' Wakasandula, ''Tandikoyoochinyonyona pe akaambo ka makkumi abili.'' ³² Wakati, ''Inche kaka utanyemi, Mwaami, alimwi ndiyowambuula aaka kamamanino. Amwi kkumi liyojanika nkuko.'' Mpawo wakati, ''Tandikoyooyinyonyoona pe akaambo ka bali kkumi.'' ³³ Jehova wakeenda anzila yakwe mpawawo nakamana kwaambula a Abbulahamu, alimwi Abbulahamu wakabweda kumunzi.