¹ Lino Abbulamu naakaba aaminyaka ili makkumi musanu aane aali aaminyaka misanu ayine, Jehova wakalibonya kuli Abbulamu alimwi wakaamba kuti kulinguwe, ''Ndime Leza Singuzu zyoonse. Enda kunembo lyangu, alimwi ukabule kampenda. ² Mpawo ndiyoosimya chizuminano changu aakati kangu anduwe, alimwi ndiyokuvuzya chakwiindilila. ³ Abbulamu wakakkotamika busyu bwakwe aansi alimwi Leza wakaambula anguwe, wakati, ⁴ ''Mbuli lwangu, kolanga, chizuminano changu chilaanduwe. Uyooba wisi wamanyika miingi. ⁵ Tachikwe pe zina lyako nilichiyooba Abbulamu, pesi izina lyako liyooba Abbulahamu - nkaambo ndakusala kuti ube wisi wamakkamu mukkamu aamanyika miingi. ⁶ Ndiyookuchita kuti ukazyalisye, alimwi ndiyoochita zisi zyiingi zyako, alimwi baami bayoozwa kulinduwe. ⁷ Ndiyoosimwa chizuminano changu aakati kandime anduwe alunyungu lwako musule lyako, kwiinda mumazyalane aabo woonse kuchizuminano chitamani, kubaLeza wako akulunyungu lwako musule lyako. ⁸ Ndiyoopa kulinduwe, akulunyungu lwako musule lyako, inyika oomo mumwakali kukkala, nyika yoonse yaKkenani, kuti ikabe buvubi butamani, alimwi ndiyooba Leza wabo.'' ⁹ Lino Leza wakati kuli Abbulahamu, ''Mbuli lwako, weelede kubamba chizuminano changu, webo alunyungu lwako musule lyako kwiinda mumazyalane aabo woonse. ¹⁰ Eechi nchizuminano changu, nchimweelede kubamba, aakati kandime a nduwe abalunyungu lwako musule lyako: Woonse mwaalumi aakati kenu weelede kupalulwe. ¹¹ Mweelede kupalulwa munyama yalukanda lwe ndomo zyanu, aboobo eechi chiyooba chitondeezyo chachizuminano changu aakati kandime a nduwe. ¹² Woonse mwana mulombe uli aamazuba aakutumbukwa ali musanu aatatu weelede kupalulwa, kumazyalane abantu bako woonse. Eechi chibikilizya muntu woonse uuzyalya mu'anda yako awooyo wakawulwa kuzwa ku muzwakule uutali umwi wabalunyungu lwako. ¹³ Ooyo uuzyalwa mu'anda yako alimwi awooyo woonse wuulwa amali yako uleelede kupalulwa. Akaako chizuminano changu chiyooba munyama yako kuchizuminano chitamani. ¹⁴ Kufumbwa mwaalumi utapalwidwe pe nyama yalulomo lwakwe uyoowandanisigwa kuzwa kubantu bakulimbabo. Watyola chizuminano changu.'' ¹⁵ Leza wakati kuli Abbulahamu, ''Mbuli Salayi mukkazi wako, utazomwiiti kuti Salayi limbi. Pesi, izina lyakwe liyooba Sala. ¹⁶ Ndiyoomulongezya, alimwi ndiyokupa mwana mulombe kwiinda kulinguwe. Ndiyoomulongezya, alimwi uyooba banyina bazisi. Baami ba bantu bayoozwa kulinguwe.'' ¹⁷ Mpawo Abbulahamu wakakkotamika busyu bwakwe aansi, alimwi wakaseka, alimwi wati mumoyo wakwe, ''Kujana mwana wazyalwa na amwaalumi uli aaminyaka ili mwaanda? Alimwi kujana Sala, uli aaminyaka makkumi musanu aane azyale mwana mulombe? ¹⁸ Abbulahamu wakati kuli Leza, ''Oo kuti Isyumayeli apone kunembo lyako!'' ¹⁹ Leza wakati, ''Pe, pesi Sala mukayintu wako uyookuzyalila mwana mulombe, alimwi weelede kuyoomuzika kuti Ayizekki. Ndiyosimya chizuminano changu anguwe mbuli chizuminano chitamani alunyungu lwakwe luchiza musule lyakwe. ²⁰ Mbuli Isyumayeli, ndakumvwa. Langa, ndiyoomulongezya alimwi ndiyomuchita kuti akazyalisye alimwi ndiyomuvuzya chakwiindilila. Uyooba wisi wa baami bali ikkumi ababili alimwi ndiyomuchita kuti akabe chisi chipati. ²¹ Pesi chizuminano changu ndiyochiimika a Ayizekki, ooyo Sala ngwatakazyale kulinduwe kuchiindi eechino kumunyaka uuza.'' ²² Lino nakamaninsya kwaambula anguwe, Leza wakazwa kuli Abbulahamu. ²³ Mpawo Abbulahamu wakabweza Isyumayeli mwana wakwe mulombe, aboonse aabo bakazyalilwa mu'anda yakwe, abaabo boonse bakawulwa amali yakwe, woonse mwaalumi aakati kabaalumi ban'anda ya Abbulahamu, alimwi bakapalula inyama yalulomo lwabo buunsi mbubo oobo, mbuli Leza mbaakamwaambilide. ²⁴ Abbulahamu wakali aaminyaka iili makkumi musanu aane aali aminyaka ili musanu ayine nakapalulwa munyama yalulomo lwakwe. ²⁵ Alimwi Isyumayeli mwana wakwe mulombe wakali aaminyaka iili kkumi ayitatu aawo nakapalulwa munyama yalulomo lwakwe. ²⁶ Mubuzuba mbubonya oobo Abbulahamu a Isyumayeli mwana wakwe mulombe boonse bakapalulwe. ²⁷ Boonse baalumi been'anda yakwe bakapalulwa aantomwe anguwe, kubikilizya abaabo bakazyalilwa mugunzi alimwi abaabo bakawulwa kubazwakule.