¹ Kwakaba kuti nikwakayinda zintu eezi Leza wakasunka Abbulahamu. Wakaamba kutikulinguwe, ''Abbulahamu!'' Abbulahamu wakati, ''Ndili aano.'' ² Mpawo Leza wakati, ''Bweza mwana wako mulombe, mwana wako mulombe uumwi biyo, ooyo ngoyanda, Ayizekki, alimwi uyinke kunyika ya Moliya. Ukamupede nkuko ooko mbuli chipayizyo chakutenta aatala aachimwi chazilundu ooko, nchindiyookwaambila.'' ³ Akaako Abbulahamu wakabuka chifumofumo, waanga mbon'olo yakwe, alimwi wakabweza babili balanda bakwe baalumi bachiniini, aantomwe a Ayizekki mwana mulombe wakwe. Wakatema inkuni zya chipayizyo chatununkilizyo, mpawo wanjila mulweendo lwakwe kaya kubusena oobo Leza mbwakali wamwaambila aatala. ⁴ Mubuzuba bwatatu Abbulahamu wakatambya menso aakwe alimwi wabona busena kabuchili kule. ⁵ Abbulahamu wakati kubaalumi bachiniini bakwe, ''Muchaale aawa ambon'olo, alimwi ime a mulombe tuyooyinka kunembo ookuya. Tuyookomba alimwi tukaboole lubo kulindinywe.'' ⁶ Mpawo Abbulahamu wakabweza inkuni zyachipayizyo wazibika aali Ayizekki mwana wakwe mulombe. Wakabweza mumaboko aakwe mulilo a chipanga; alimwi bakiinka aatomwe kabali babili. ⁷ Ayizekki wakaambuula kuli wisi wakwe Abbuahamu alimwi wati, ''Taata wangu,'' alimwi wakati, ''Mpaano, mpundili mwana wangu mulombe.'' Wakati, ''Bona, ngoyu mulilo a nkuni, pesi ani ilikuli imbelele yachipayizyo chakutenta?'' ⁸ Abbulahamu wakati, ''Leza lwakwe mwini uyoopa imbelele yachipayizyo chakutenta, mwana wangu.''Aboobo bakayinkilila kunembo, aantomwe kabali babili. ⁹ Nibakasika kubusena ooko Leza nkwaakamwaambila azyankuko, Abbulahamu wakayaka chipayililo nkuko ooko alimwi wakabika inkuni aali nchicho. Mpawo wakaanga Ayizekki mwana wakwe mulombe, wamulazika aachipayililo, aatala aankuni. ¹⁰ Abbulahamu wakatandabika luboko lwakwe wabweza ipanga kuti ajaye mwana wakwe mulombe. ¹¹ Mpawo angelo wa Jehova wakamwiita kuzwa kujulu wati, ''Abbulahamu, Abbulahamu!'' alimwi wakati, ''Ndili aano.'' ¹² Wakati, ''Utabiki jaanza lyako aatala a mulombe, nikuba kuchita chimwi chintu chimuchisa, nkaambo lino ndaziba kuti ulamuyoowa Leza, nkaambo takwe niwakakila amwana wako mulombe, mwana wako mulombe uumwi biyo, kulindime.'' ¹³ Abbulahamu wakatambya menso aakwe kujulu alimwi wakabona, musule lyakwe kmwakali mugutu wambelele wakapatide meja aakwe mumasamu. Abbulahamu wakayinka wabweza mugutu wamupeda mbuli chipayizyo chakutenta aabusena bwa mwana wakwe mulombe. ¹⁴ Aboobo Abbulahamu wakiita busena oobo kuti, ''Jehova uyoopa,'' alimwi mbubwaambwa ambuli sunu, ''Aachilundu cha Jehova kuyoopegwa.'' ¹⁵ Angelo wa Jehova wakayita Abbulahamu lwabili kuzwa kujulu ¹⁶ alimwi wati - mbubo oobu mbwaamba Jehova, ''Alwangu ndakonkezya kuti nkaambo kakuti wachita eechi chintu, akuti tewakaka amwana wako mulombe, mwana wako mulombe uumwi biyo, ¹⁷ nchobeni ndiyookulongezya alimwi ndiyoovuzya izyalane lyako mbuli nyenyeezi zyakujulu, alimwi mbuli museele uuli kunkomwe yalwizi; alimwi balunyungu lwako bayoovuba milyango yabasinkondonyina. ¹⁸ Kwiindila mubana bako zisi zyoonse zyaansi zyoolongezegwa, nkaambo waswiilizya ijwi lyangu.'' ¹⁹ Akooko Abbulahamu wakabweeda kubaalumi bakwe baniini, alimwi bakanyampuka aantomwe baya ku Bbeyasebba, alimwi wakaakukkala ku Bbeyasebba. ²⁰ Kwakaba kuti musule lyazeezi Abbulahamu wakalwiidwa kuti, ''Alakwe Milika wazyalila mwana wakwanu Naholi bana.'' ²¹ Bakali Uzi mwana wakwe mutaanzi, Bbuzi mukulana wakwe, Kemuyeli wisi wa Alamu, ²² Kkesedi, Hazo, Pilidasyi, Jidilafu, a Bbetuyeli. ²³ Bbetuyeli wakaba wisi wa Lebeka. Aaba mbana bali musanu abatatu Milika mbaakazyalila Naholi, mukulana wa Abbulahamu. ²⁴ Simamambe wakwe, ooyo izina lyakwe lyakalikutegwa Lewuma, alakwe wakazyala Tebba, Gahamu, Tahasyi, aantomwe a Maaka.