¹ Mpawo wakakwila chakongolola kumatwi angu, alimwi ndakati, ''Kobiita aabo batisubule muunzi, umwi awumwi mujanza lyakwe kajisi chilwanisyo chakwe chakubelesya kukunyonyoona.'' ² Mpawo langa! baalumi balimusanu awumwi bazwa kubbazu lyamulyango waajulu uulangide kunyika, umwi awumwi kajisi chilwanisyo chakwe chakujazya mujanza lyakwe. Kwakali mwalumi umwi akati kabo iwakazweete chisani chuba wuba kajisi nkomo yazilembyo yamulembi muchikungu. Aboobo bakanjila mukkati alimwi bakiima kumbali achipayililo chamukkuba. ³ Eelyo nulemu bwa Leza wa Izilayeli bwakaya kujulu kuzwa awo mpobwakabede ajulu akkelebbimu akuya kumanjililo aang'anda. Wakiita mwalumi wakazweete chisani chuuba wuba, ooyo wakajisi chibikilo chazilembyo zyamulembi muchibuno chakwe. ⁴ Jehova wakamwaambila kuti, ''Koyinda mumunzi -- mu Jelusalemu -- ubikke chitondezyo ankumu zyabantu ibakwiila akutongela akambo kazintu zyoonse zisesemya zichitika mumunzi.'' ⁵ Mpawo wakambila bamwi nkandimvwide amatwi aangu kuti, ''Mwiinde mumunzi mumutobele akujaya. Menso eenu ateetezegwi pe, alimwi mutabafwidi lubomba pe ⁶ naba muneene, naba mulombe nakalindu, naba mwana mucheche naa mwanakazi. Mubajaye boonse! Pesi mutasiki afwifwi amuntu ulachitondezyo ankumu yakwe. Bakatalika kubapati aabo bakali kunembo lyang'anda. ⁷ Wakabambila kuti, ''Amwisofwazye ing'anda, alimwi mwizuzye mabuwa abantu bajiidwe. Kamuya!'' Aboobo bakiinka akujaya bantu mumunzi. ⁸ Nebakali kubajaya, ndakasyaala biyo andilikke alimwi ndakagodamika busyu bwangu mpawo akukwilila kuti, ''Ikaaka, Mwami Jehova, aate ulabanyonyoona ma Izilayeli basyeede boonse chindi notila bukali bwako mu Jelusalemu?'' ⁹ Wakandaambila kuti, ''Chinyonyoono chamung'anda ya Izilayeli amaJuda nchipati loko. Nchisi chizwide bumpelenge lwabo bwini, nkambo bakati, 'Jehova wakachiluba chisi,' alimwi Jehova taboni pe!' ¹⁰ Nikuba bbobo, linso lyangu taliko betelela pe, alimwi nsikoyobafwida lubombo pe. Ndilabapa bulumbu bwanzila yabo amitwe yabo beeni.'' ¹¹ Langa! Mwaalumi uuzwete chisani chuuba-uba iwakajisi chinyumpwido chazilembyo muchikungu chakwe wakaboola musule. Wakaamba kuti, ''Ndachita mbubo mbuli mbwandilayilila.''