¹ Lino mumunyaka wamusanu awumwi, amumwezi wamusanu awumwi, amubuzuba bwamusanu abumwi bwamumwezi, nindakakkede mung'anda yangu abalabo bapati bamu Juda nibakakkede kunembo lyangu, ijanza lyaMwami Jehova lyakandijata alimwi nkukoko. ² Alimwi ndakalanga, alimwi ndakabona, akulangisisya, ndakabona chiimo chamuntu. Chilibonia mbuli mulilo muchikungu chakwe. Alimwi kuzwa muchikungu chakwe kuyakujulu wakali kumweka, mbuli insiliva ivweledwe angolide. ³ Mpawo wakatandabika eecho chakali kulibonia anga ndijaanza akubweza masusu amutwe wangu; muuya wakanditola kujulu akkati kanyika ajulu, alimwi amuzilengano zya Leza, wakandisisya ku Jelusalemu, wakanditola dokumanjililo amulyango wamukkati, ooko chitombe chabuzuba echo chipa kubamunyono nkuchakimvwi. ⁴ Mpawo amulange, bulemu bwa Leza wa Izilayeli bwakaliwo, mbuli chilengano nchindakabona ajulu lyantandabale. ⁵ Mpawo wakati kuli ndime, ''Omwanamuntu, kowala menso aako kunyika.'' Aboobo ndakawala menso angu kunyika, alimwi kunyika kwamilyango wakuchipayililo, kwakali chikozyanisyo chabuzuba kumanjililo. ⁶ Aboobo wakandaambila kuti, ''Omwana amuntu, wazibonana nzibalo kuchita? Eezi nzisesemyo zipati loko ezyo mung'anda ya Izilayeli nzilokuchita aano kuchita kuti mebo njekule amubusena bwangu. Pesi ulabona alimwi akubonesesya zimbi zisesemyo.'' ⁷ Mpawo wakandeeta kumanjililo alubuwa, alimwi ndakalanga, kwakali chipulo mubwaanda,.'' ⁸ Wakandaambila kuti, ''Omwana muntu, donkola chipulo mubwanda.'' Aboobo ndakadonkola chipulo mubwanda, alimwi ndakabona manjililo. ⁹ Mpawo wakandambila kuti, ''Koya alimwi ukabone zintu zibi zisesemya nzibachita okuno.'' ¹⁰ Aboobo ndakanjila mukati alimwi ndakalanga akubona, ndakabona zikozyanio zyamisyobo yoonse yazilenge zikkala aansi azyabanyama, alimwi amituni yoonse isesemya yamung'anda ya Izilayeli. ¹¹ Makkumi musanu aabili abapati bamung'anda yaba Izilayeli bakaliko, alimwi a Jazaniya mwana mulombe wa Safani wakalimvwi akkati kabo. Bayimvwi kunembo lyazitombe, alimwi umwi awumwi wakajisi chakuumpila tununkilizyo mujanza lyakwe kuchitila kuti mweemw wajoba lyamununkilizyo liye kujulu. ¹² Wakandambila kuti, ''Omwanamuntu, wakubona nakuti bapati bang'anda ya Izilayeli balikuchita zyamumudima? Umwi awumwi mutwaanda twamituni yakwe moyibikkidwe, nkambo baamba kuti, 'Jehova tatubwene pe! Jehova wachisiya chisi.''' ¹³ Mpawo wakandambila kuti, ''Langa lubo alimwi ulabona zimbi zipati zisesemyanzibalokuchita.'' ¹⁴ Aboobo wakandatola kumanjililo amulyango wang'anda ya Jehova yakali kubbazu kunyika, alimwi akubona! Elyo banakazi bakalikkede akulila chileza chitegwa Tamuzi. ¹⁵ Aboobo wakandaambila kuti, ''Wachibona na eechi, omwana muntu? Chengunuka lubo alimwi ulabona zimbi zisesemya kwiinda eezi.'' ¹⁶ Aboobo wakanditola kulubuwa lwamukati lwang'anda ya Jehova, alimwi langa! kumanjililo antempele ya Jehova aakati kakkoche achipayililo, kwakali balumi basika kumakkumi aabili amusanu bakafutatilide ntempele lya Jehova alimwi masyu abo kaalangide kujwe, alimwi kavundamina zuba. ¹⁷ Wakandambila kuti, ''Wachibona na echi, omwana muntu? Naa nchintu chinini na kuti mung'anda ya Juda kabachita zisesemyo eezi nzibalokuchita aawa? Bazuzya chisi ankondo alimwi akuzumanana kundinyemya, kubikka mutabi kumpemo zyabo. ¹⁸ Aboobo ndilachita chabula aakati kabo; linso lyangu taliko beetelela pe, alimwi tandikoyo bafwida insoni lubo pe. Nikuba kuti bakwile kumatwi aangu chakompolola, nsikoyobamvwa pe.''