¹ Lino ijwi lya Jehova lyakandisikila, kalyamba kuti, ² ''Iwebo, mwana muntu- mbubobu Mwami Jehova mbwawamba kunyika ya Izilayeli.'' 'Asika mamanino! Asika mamanino kumabbazu aanyika woonse aane. ³ Yino magolelo amusikila, lino ndaamba kutumina bukali bwangu kuli ndinywe, njomubwedezya bulumbu bwanu mbubonya mbuli inzila zyanu, milimu yenu isesemya nichili akkati kenu, lino muyoziba kuti ndime Jehova. ⁴ Nkambo menso aangu takoyomufwida insoni, alimwi nsikoyomuleka pe. Anukuti, njomubwedezya bulumbu bwenu alindinywe, alimwi azisesemyo zyenu ziyoba akkati kenu, kuchitila kuti mukazibe kuti ndime Jehova Leza wenu. ⁵ Mwami Jehova mbuboobu mbwawamba: Mapenzi ! Mapenzi alasika aatala lyamapenzinyina! nchobeni alasika. ⁶ Magolelo nchobeni asika. Mamanino asika amubukila kuli ndinywe. Amujatisye, mamanino asika! ⁷ Malweza asika kuli ndinywe nemukkede munyika. Chiindi chasika; buzuba bwakumwayula bwaba afwifwi, alimwi zilundu tazikoyobotelwa limbi. ⁸ Kabe kayindi ndaamba kumutilila bukali bwangu akuzuzikizizya lunyemo lwangu kulindinywe eelyo njomubeteka mbubonya mbuli inzila zyako akukubwedezezya bulumbu bwamilimu yako isesemya. ⁹ Nkambo menso aangu takoyomufwida insoni, alimwi nsikoyomufwida luzyalo pe. Mbuli ndinwe ndamaninsya, ndiyochita kulindinywe; milimu yenu isesemya nichili akkati kenu lino muyoziba kuti ndime Jehova, ulikumupenzya. ¹⁰ Langa, izuba! Kolanga, lizobuza! Malweza ayinka kule! Musako wasyuuka, bukali mukulisumpula bwafulula! ¹¹ Inkondo yakomenesya loko kuba musako wabulewusi-takwe naba umwi wabo, alimwi takwe naba omwe mubwingi bwabo, naba wamuvubi bwabo, alimwi takwepe naba omwe wamubupati bwabo uyowangola! ¹² Chiindi chasika; buzuba bwasika afwifwi loko. Mutachiti kuti sikuula atasekeleli, alakwe sikuuzya atalili, nkambo bukali bwasikila boonse biyo. ¹³ Sikuuzya takoyoboola kunyika yakwe uyowuzya kwachindi chilamfu. Nikuba kuti boonse bachili bawumi nkambo nchilengano chilamba amakamu abo boonse; nkambo kazibi zyabo nkabela takuyooba naba umwi uliyumya! ¹⁴ Balizya mweembo akubamba zintu zyoonse, nekuba boobo takwe uuyinka kuyolwisya; nkambo bukali bwangu bwasikila makamu aabo woonse. ¹⁵ Ipanga lyaboneka aanze, malweza anzala zyaboneka mukati kang'anda. Ooyo ulimumaanda uyojayigwa ipanga, nzala amalwazi nzeziyomujaya mumunzi. ¹⁶ Pesi nkubali bamwi akati bachija, bayooba atala amalundu. Bayoba mbuli inziba zyamukkuti, balavuluvuta umwi-- awumwi nkambo kamilandu yakwe. ¹⁷ Maanza woonse akompama mazwi woonse ateeta mbuli maanzi, ¹⁸ alimwi bazwata zisamo zyamasaka, kuyoowa kwabavumba; bweeme bulaboneka kubusyu bwabo boonse, alubala mpoluli amitwe yabo yoonse. ¹⁹ Bayosowa insiliva zyabo mumigwagwa aboobo ingolida zyabo ziyooba mbuli chintu chisofweede. Ingolida zyabo ansiliva zyabo zyoonse zilakachilwa kubavuna mubuzuba bwabukkali bwa Jehova. Mawumi aabo takatambulika pe, tebakakkutisikana nikuba kuzuzya mala aabo, nkambo nzenzizyo zyaba chilebyo chakubawisya muzibi. ²⁰ Bakali kulitondezya bwebesi bwazyo, bakali kuzichitya zikozyanio zibi zisesemya, aboobo ndachita kuti zibabede mbulikuti nchintu chisofweede. ²¹ Njozipa mumaanza abazwakule kuti bazisale, abalabo basizibi benyika bayozitola, nkabela bayozisofwazya. ²² Ndiyofutatika busyu bwangu kuzwa kuli mbabo nkabela bayosofwazya chiyobwedo changu; bafumpi bayonjila muli nchicho bayochisofwazya. ²³ Inyika ilizwide milandu yabulowa, amuunzi uzwide inkondo. ²⁴ Lino njoyeeta basizibi babamasi kuti bakavube maanda abo, njomaninsya kulisumpula kwabayumu, amasena aabo aasalalisya ayosofwaazigwa! ²⁵ Kuyoowa kuzosika! Balayandula luumuno, pele tabakoyolujana pe. ²⁶ Malweza alasika aatala lyamalwezanyina, makani ayoosya alamvwigwa chakutobela makaninyina. Bayoyanduula chilengano kumusinsimi, pele mulawu uyoloba kubapayizi alulayo luyoloba kubanene. ²⁷ Mwami ulalila basilitwe balasama chibaki chansoni, maanza aabantu bachisi alakankama. Njoobachitila mbubonya mbuli inzila zyabo! njobabeteka mbubonya mbubabeteka bamwi nkabela bayoziba kuti ndime Jehova.''