¹ ''Mpawo webo, mwana mulombe wamuntu, bweza ipanga libosya mbuli mbeli yasikugela ulibwezele, alimwi uyinzye mbeli aajulu lyamutwe wako antomwe akuzilezu, mpawo ukabweze cheelesyo kuti ukapime bulemu, alimwi ukapambuule susu lyako. ² Ukateente chimpanzi chatatu mumulilo akkati kadolopo kuchiindi mazuba akusinkilizigwa akumana, eelyo ukabweze chimpanzi chatatu chamasusu alimwi ukachuumye ipanga chonseni chakunzeemuka dolopo. Mpawo ukamwaye chimpanzi chatatu chamasusu kumuuwo, alimwi ndiyogwisya aanze ipanga kuti nkatandanie bantu. ³ Pesi ubweze kampanzi kanini kuzwa kumasusu alimwi ukalyaange mumoombe wachizwato chako. ⁴ Mpawo uyungizye limbi lyamasusu alimwi uliwale akkati kamulilo; alimwi ulitente mumulilo; kuzwawo mulilo uyoozwa kuya kung'anda yonseni ya Izilayeli.'' ⁵ Mwami Jehova nguwamboobu, ''Eeyi ni Jelusalemu akkati kabamaasi, oko nkondakamubikka, alimwi oko nkundakabazyunguluka azimwi zisi. ⁶ Pesi mukukachilwa kwakwe wakakaka imbeta zyangu kwinda bamaasi mbubakachita, alimwi amalayilile aangu kwinda manyika abazyungulukide. Bantu bakakaka imbeta zyangu alimwi tebakeenda mumalayilile angu pe.'' ⁷ Nkiinkako Mwami Jehova waamba oobu, ''Nkaambo muli basikupilingania kwinda zisi ezyo zimuzyungulukide alimwi temwakeenda mumalayilile aangu nikuba kuchita mbuli mbeta zyangu mbuzyaamba pe, nikuba kuchita mbuli zichito zyazisi zimuzyungulukide lwanu,'' ⁸ nkinkaako Mwami Jehova wamba obu, ''Langa! Imebo lwangu njokulwiisya. Ndiyomujaya ambeta akkati kanu kuchitila kuti zimwi zisi zibone. ⁹ Ndiyochita kuli ndinywe ezyo nzyesina kuchita alimwi azezyo nzyesikabule kuchita lubo pe, akambo kazichito zyenu nzyensulide. ¹⁰ Nkiinkako mawisi bayolya bana akati kanu, alimwi abana bayolya bamawisi, mbokunga ndiyobika lubeta alindinywe alimwi akuyo mumwayisya kuya kumabbazu woonse nywebo monseni nimucheede. ¹¹ Nekubaboobo, mbuli mbwempona--aya ngimajwi akaambwa a Mwami Jehova--kuli mbubo loko nkaambo mwakasofwaazya busena bwangu azintu zyenu zyonseni zindinyemya antomwe anchito zyenu zindisesemya, zyakuti mebo ndiyomuchesya kumweelwe; linso lyangu talikoyomufwida nsoni pe, alimwi tandikoyo muleka pe. ¹² Chimpanzi chomwe chamweelwe wenu chatatu chiyofwa amalwazi, alimwi bayomenwa abbalangwe lyanzala akati kanu. Chibeela chanu chatatu chiyoowa akafulo aako kamuzyungulukide. Mpawo njomwayisya bamwi kumabbazu asiyene siyene wonseni, alimwi njogwisya ipanga kuti ndika baandile alimwi. ¹³ Mpawo bukali bwangu buyomana, alimwi njochita kuti bukali bwangu bukamanine alimbaabo. Njokkutisikana, alimwi bayochiziba eechi kuti Mebo, nde Jehova, ndakaambula mubukali bwangu awo nindakamaninsya bukali bwangu alimbabo. ¹⁴ Ndiyomuchita kuti mukawuumbale alimwi mukawuse kumisyobo yoonse eyo imuzyungulukide mumenso aboonse abo banakwenda. ¹⁵ Elyo Jelusalemu iyooba chimwi chintu kubantu bamwi kuti biisole alimwi biniake, ninchenjezyo alimwi zilayoosya kuli bamaasi bamuzyungulukide. Ndiyobika lubeta alinduwe mubukali amukunyema, alimwi ankalalilo inkali -- Lwangu mebo, nde Jehova ndime ndazyamba ezi! ¹⁶ Njotuma miivwi mikkali yabbalangwe lyanzala aatala lyenu alimwi akuyomwayula bulilu bwenu bwachinkwa. ¹⁷ Ndiyotumina bbalangwe lyenzala antenda aatala lyanu zyakuti muyosyaala kamutachikwe bana pe. Intenda zyamalwazi abulowa ziyomuwida, alimwi njoyeta ipanga aatala lyanu -- Lwangu, ndime Jehova, ndazyamba ezi.''