¹ ''Pesi webo, mwana mulombe wamuntu, libwezele chitina lwako alimwi ukachibike kunembo lyako. Mpawo ukanengulule chisi cha Jelusalemu alinchicho. ² Mpawo uyale lubaya lulangene anjiyo, alimwi uyake malambo alinjiyo. Mukanyampule chisubwido chilangeene anjiyo alimwi mukabambe tubunga twiizyungulukide. ³ Mpawo webo kuzwaawo kolibwezela kkwalibba lyabutale alimwi ulibelesye mbuli bulambo akkati kako adolopo mpawo ukalanzike busyu bwako nkuko, nkambo liyoba munsi lyakusinkilizigwa. Eechi chiyooba chitondezyo kung'anda ya Izilayeli. ⁴ Mpawo, webo ulale ebbazu lyakochimweensi alimwi ukabikke chibi chang'anda ya Izilayeli alinchicho; uyobweza zibi zyabo kwamazuba ayo ngoyolala aansi kolangene ng'anda ya Izilayeli. ⁵ Imebo lwangu ndizotumina buzuba bomwe butakiminine umwi wamunyaka yakusubulwa kwabo: mazuba ali 390! Munzila eyi, uyobweza chibi chang'anda ya Izilayeli. ⁶ Muchiindi noyomaninsya mazuba aya, mpawo ukalale aansi lwabili kubbazu lyachilisyo, nkambo uyobweza chibi chang'anda ya Juda kwamazuba makkumi aane. Ndakupa lwako izuba lyomwe kumunyaka womwe. ⁷ Lanzika busyu bwako ku Jelusalemu eyo ilimunsi lyakusinkilizigwa, alimwi akuboko kwako kusamununwe chisinsimi aatala anjiyo. ⁸ Nkambo bona! Ndilabika zyakukumanikizya kuti utasandukili kuzwa kuli limwi bbazu kuti ulange kulilimbi mane do ukamaninsizye mazuba akusinkilizigwa kwako. ⁹ Ukalibwezela lwakpo wiiti, bbaali, nyangu, anyeemu, amabede amayila; ukazibike muchibikilo alimwi mukabike muchibikilo choomwe alimwi mukapange chibunge chanu kazyendelana amweelwe wamazuba ayo ngotalale aansi kolimbide limwi bbazu. Kwamazuba 390 uyoyilya. ¹⁰ Chakulya nchoyolya chinoli abulemu, makkumi aabili amasyekeli abuzuba, alimwi uyochilya muzyiindi zibikidwe zuba ezuba. ¹¹ Alimwi uyoonywa manzi, anopimidwe kucheleko chankomeki, alimwi uyowanywa kuzyiindi zitalidwe. ¹² Uyochiilya mbuli chibunge chabbaali, pesi uyochijika achijikilo aatala amazyu aabantu kunembo lyabo kabakubwene!'' ¹³ Nkaambo Jehova wati, ''Echi chaamba kuti chinkwa eecho bantu bakwa Izilayeli nchibayoolya chinosofweede, oko akati kabamaasi nkwebatandilide beni.'' ¹⁴ Pesi mebo ndakati, ''Alasi, Mwami Jehova! Takwepe nindakali ndasofwaala! Takwepe nindakali ndalya nikuba chintu echo chakali chafwa nikuba chintu chakajiigwa abanyamankala, kuzwa kubunini bwangu kusikila linobu, niiba ntundulu takwepe niyakanjide mukkanwa lyangu!'' ¹⁵ Eelyo wakati kuli ndime, ''Langa! Ndakupa webo bufumba bwa ng'ombe kwinda mazyu abantu kuchitila kuti ukajike obotu chinkwa chako ajulu alinchicho.'' ¹⁶ Alimwi wakati kuli ndime, ''Mwana muntu! Langa! Ndiyokwamuna chiinkwa mu Jelusalemu, alimwi bayoolya chinkwa kabapima pima mumakatazyo alimwi akuyoonywa maanzi chakwapima mukuteketa. ¹⁷ Nkambo bayobula chinkwa amanzi, muntu woonse uyogambilwa kumukulana wakwe alimwi banoya bukotela nkambo kabubi bwabo.''