¹ Naa kowaala inkakata zyakwanzanya inyika mbuuli lukono, uyelede kuchita chipayizyo kuli Jehova; eechi chipayizyo chiyooba chimpanzi chisalala chanyika, zyuulu zili makumi obile amusanu watukokola mubulamfu, azyuulu zilikkumi zyatukokola mubusasa. Iyosalala, woonse masena ayizyungulukide. ² Kuzwa aawo kuyooba myaanda iilimusanu yatukokola amyaanda iilimusanu yatukokola bwelene kuzyunguluka busena busalala, amugaano uuzyungulukide makumi aali musanu aatukokola mubusasa. ³ Kuzwa kubusena oobu uyoyeela achimpanzi chili zyuulu zyobile amusanu tukokola mubulamfu azyuulu zilikkumi mubusasa; buyooba busena busalala, busena busalalisya. ⁴ Buyooba busena busalala munyika yabapayizi babelekela Jehova, baza munsi lya Jehova kukumubelekela. Buyoba busena bwang'anda zyabo abusena busalala. ⁵ Eelyo buyoba zyuulu makumi obile amusanu tukokola mubulamfu amyaanda ilikkumi mubusasa, alimwi buyooba madolopo aaba Levi babeleka mung'anda. ⁶ Uyoosala busena bwachisi zyuulu musanu tukokola mubusasa azyuulu makumi obile amusanu bulamfu, oobo buyotobelena abusasa bubambidwe bwabusena busalala; eechi chiyooba chang'anda ya Izilayeli yoonse. ⁷ Inyika yamwana mwalumi wamwami inoli kumabazu oobile aabusena bulondwedwe bwabusena busalala abwachisi. Iyoba kumbo kwayo akujwe kwayo. Bulamfu buyoyendelana abulamfu bumwi bwazeezyo zimpanzi, kuzwa kumbo kuyosika kujwe. ⁸ Eyi nyika iyooba kumwana wamwami wachaalumi mu Izilayeli. Bana balombe bamwami wangu tabakoyopenzya limbi bantu bangu; kwwinda kuti, bayopa inyika kung'anda ya Izilayeli, kumikowa yabo. ⁹ Mwami Jehova waamba oobu: zyakkwana kuli ndinywe bana balombe bamwana wa Izilayeli! Gwisya lupyopyongano ankondo; chita bululami abusalali! Gwisya lupyopyongano lwako kubantu bangu! - Aaya malayilile aa Mwami Jehova. ¹⁰ Uyelede kubaazipimyo zilikabotu, achisuwo chakwelesya chiluleme, alimwi anongo iiluleme! ¹¹ Ichisuwo anongo iyoba mweelwe uyelene, aboobo nongo iyooba chakkumi chahoma; chisuwo chiyooba chekkumi chahoma. Cheelesyo chabo chiyoyendelana ahoma. ¹² Isyekeli iyoba makumi obile a gelasi; makkumi musanu alimwi amasyekeli ayochita bulemu bwa mayina yako. ¹³ Aka kasangesange nkoyelede kutondezya: Zisuwo makumi musanu achimwi chisuwo chahoma imwi ayimwi yabbali, alimwi uyopa chisuwo chamusanu achimwi cha homa yabbali. ¹⁴ Mulawu wachipayizyo chamafuta uyoba chakkumi yachakusamba kuliimwi ayimwi nongo (chamba kusamba kkumi), na kulimwi ayimwi homa, mbukunga homa ilendelana akusamba kkumi. kufumbwa nongo yachekkumi. ¹⁵ Imbelele yomwe na impongo kuzwa mubutanga kuzwa mubutanga kumwanda iibili yoonse yabanyama kuzwa kumasena alamanzi a Izilayeli ayoobelesegwa kufumbwa zyazipayizyo zyuumpidwe na zi[payizyo zyaluumuno kuchitila kuti bamanie milandu yabantu - aya ngemalayilile a Mwami Jehova. ¹⁶ Boonse bantu benyika bayopa kasangesange kumwana amwami mulombe mu Izilayeli. ¹⁷ Chiyoba chelelo chamwana wamwami kukupa banyama bazipayiizyo zyakutentela, zilyo zyazipayizyo, azipayizyo zyakunywa kumapobwe akusekelela kwamwezi mupya, amumazuba ategwa Sabata - woonse mapobwe aabambidwe aa ng'anda ya Izilayeli. Uyoopa zipayizyo zyazibi, zipayizyo zyazilyo, zipayizyo zyakutentela azipayizyo zyaluumuno kuti bamanie milandu yabantu kwiminina ng'anda ya Izilayeli. ¹⁸ Mwami Jehova waamba oobu: mumwezi mutanzi, mubuzuba butaanzi bwamumwezi, uyobweza mupule wang'ombe utakwe chibi kuzwa mubutanga akumuchita chipayizyo chazibi chabusena busalala. ¹⁹ Mupayizyi uyobweza bulowa bumwi bwachipayizyo chazibi akububika aminsende yang'anda akumabazu aane kusika kulubuwa lwamukkati. ²⁰ Eezi muyozichita mumwezi wamusanu ayibili nkaambo kazibi zyamuntu umwi awumwi uubisya chakutaziba naa chakubula maanu; munzila eyii muyomania milandu akusalazya chikombelo. ²¹ Mumweezi mutanzi mubuzuba bwakkumi atune, kuyooba pobwe lyako, ibuzuba bwamusanu atubili bwamapobwe. Uyoolya chinkwa chitakwe busweezyo. ²² Mubuzuba oobo, mwana wachalumi wamwami uyolibambila lwakwe abantu boonse bamunyika imusune mbuli chipayizyo chazibi. ²³ Alimwi kumazuba musanu aabili amapobwe, mwana mwalumi wamwami uyoobamba chituuzyo chazyumpilizyo zya Jehova: Basune bali musanu ababili abagutu batakwe pe chibi bali musanu ababili, a mupule wempongo mubuzuba bumwi abumwi mbuli chipayizyo chazibi. ²⁴ Elyo mwana mwalumi wamwami uyochita chipayizyo chakulya chisuwo kumusune umwi awumwi anongo kumbelele imwi ayimwi aantomwe a hini lyamafuta kuli chimwi achimwi chisuwo. ²⁵ Mumwezi wamusanu ayibili mubuzuba bwakkumi amusanu bwamwezi, kumapobwe, mwana mwalumi wamwami uyochita zipayiizyo kumazuba aaya alimusanu aabili: zipayizyo zyazibi, zipayizyo zyakutentela, zipayizyo zyazilyo, antomwe azipayizyo zyamafuta.