¹ Eelyo balumi bakandeeta kumulyango ooyo wakajulidwe kujwe. ² Langa! Bulemu bwa Leza wa Izilayeli bwazwa kujwe: ijwi lyakali mbuli muzuzumo wamanzi miingi alimwi nyika yalikumweka abulemu bwakwe. ³ Zyakali mukwindila kwakuboneka kwachilengano echo nchindakabona awo nakali wasika kuzonyonyoona dolopo, aazilengaano zyakali mbuli chilengano echo nchindakabona ku Kkebba kkanulu - alimwi ndakavundama abusyu bwangu. ⁴ Abo bulemu bwa Jehova bwakaza ku Ng'anda anzila yamulyango ooyo wakajulidwe kujwe. ⁵ Mpawo muuya wakandinyampula akundeta mukati mulubuwa lwamukati. Langa! Bulemu bwa Jehova bwakali kuzula ng'anda. ⁶ Mwalumi wakimvwi kumbali lyangu, alimwi ndakamvwa umwi kalikwambula andime kuzwa mung'anda. ⁷ Wakati kuli ndime, ''Mwana muntu, oobu mbusena bwachuuno chabulemu changu abusena bwazituta zyamawulu aangu, aawo mpesikakkale akati kabantu ba Izilayeli lyoonse. Ng'anda ya Izilayelitabayosofwazya limbi zina lyangu lisalala - lwabo na baami babo - alusyomo lwabo na amitunta ya baami babo kumasena abo alajulu. ⁸ Tabayosofwazyi limbi izina lyangu ilisalala kukubika zitabilizyo kumbali azitabilizyo zyangu, aminsende yayo kumbali aminsende yangu ambabo. Basofwazya zina lyangu lisalala azisesemyo zyanchito zyabo, aboobo ndakabasyukuta akunyema kwangu. ⁹ Lino ngabagwisye kubula lusyomo aa mitunta ya baami babo kuzwa kunembo lyangu, alimwi ndiyokkala akati kabo lyonse. ¹⁰ Mwana muntu, iwe nomwini welede kubuzya ng'anda ya Izilayeli aatala ang'anda eeyi aboobo bayoofwa bweme nkambo kamilandu yabo. Belede kuyeeya aatala abobu bupanduluzi. ¹¹ Nkambo kuti balabweme kuli zyonse nzibachita eelyo yubununa kuli mbabo bwiime bwang'anda, mbwibede, milyango yakuzwa, milyango yakunjilila aabwime bwayo boonse, amalayilile aayo woonse aamilawu. Mpawo lemba eezi aansi kunembo lyamenso aabo ababo bayoba mubwime bwayo boonse aa milawu yayo yoonse kuti bayitobelezye. ¹² Eeyi milawu yang'anda: kuzwa ajulu akalundu kuyosika kumigano yonse iyizyungulukide, inosala loko. Langa! Aaya malayilile ang'anda. ¹³ Eezi ziyoba zipimyo zyachipayililo mukakokola - akakokola kalaba milawo yakakokola mubwaanze bwajanza mubulamfu. Abobo ziyumbilo zyamanzi zyakazyungulukide chipayililo iyoba kakokola kububbila, abusasa bwacho bunoli tukokola mugano ulikumamanino abusena bulafwifwi uyoba muchikozyano chomwe. Eechi chiyoba zeteko lyachipayililo. ¹⁴ Kuzwa kuchiyumbilo chamanzi chaansi kukuya kuchanzikilo chaajulu lyachipayililo mutukokola tobile, alimwi bwaamba bwacho bwakali kakokola komwe mubusasa. Mpawo kuzwa kuchanzikilo chiniini kakuya kuchipati chamamanino achipayililo, ntukokola toone, alimwi mamanino mapati nkakokola mubusasa. ¹⁵ Chikko chachipayililo kukutentela zipo ntukokola toone mukuyakujulu, alimwi kuli meja oone atondekede kujulu kuchikko. ¹⁶ Chikko ntukokola tuli kkumi atubili kubulamfu atukokola kkumi atubili kubusasa, mabbazu ayelene. ¹⁷ Miigano wacho ntukokola kkumi atune mubulamfu, aatukokola kkumi atune busasa kumabbazu acho oone, alimwi muntendenene wacho nkakokola musasa kakuzyungulukide koonse mubusasa kakuzyungulukide konse aamatantilo kakulangide kujwe.'' ¹⁸ Chitobela wakati kulindime, ''Mwana muntu, Mwami Jehova waamba eezi: Aaya ngawo malayililo akuchipayililo mubuzuba nibazochichita, kukunyampula zipayililo zyakutenta kulinchicho, akukusansila bulowa alinchicho. ¹⁹ Uyopa mupule muniini kuzwa kutanga mbuli aabo balunyngu lwa Zadokk, aabo baza afwifwi kuli ndime kuzondimanina mulimu - eezi Mwami Jehova nzyawamba. ²⁰ Mpawo uyobweza bumwi bulowa bwabo aa kukubika achipayililo ameja oone amabbazu oone kumamanino aacho akumutendelele uzyungulukide; uyochisalazya alimwi uyochichita kubwedululana kwacho. ²¹ Mpawo ubweze mupule wachipayizyo chazibi akutenta mubusena busalidwe bwachikombelo aanze abusena busalala. ²² Mpawo mubuzuba bwabili uyopa mupule wampongo uutakwe kampenda kuzwa kumpongo mbuli zipayizyo zyachibi: bapayizi bayosalazya chipayililo mbuli mbakachisalazizye amupule. ²³ Aawo nimwayomaninsya kusalazya, peda mupule utanaba akampenda kuzwa mubutanga. ²⁴ Ubapede kunembo lya Jehova; bapayizi bayowala mwinyo ambubo akubanyampula mujulu mbuli chipayizyo chakutenta kuli Jehova. ²⁵ Welede kubamba mupule wampongo mbuli chipayizyo chazibi abuzuba abuzuba kwamazuba aalimusanu aabili, alimwi bapayizi beelede kubamba mupule utanaba akampenda kuzwa kubutanga. ²⁶ Belede kumaninsya milandu kuchipayililo kwamazuba alimusanu aabili aa kuchisalazya, alimwi muleyinzila aakuchibamba. ²⁷ Beelede kumaninsya mazuba aaya, alimwi mubuzuba bwamusanu aatatu kaziya kunembo chiyosika aatala azezyo bapayizi bayobambila zipayizyo zyakutenta zyenu azipayizyo zyanu zyaluumuno achipayililo, alimwi ndiyotambula - ooku nkwamba kwa Mwami Jehova.''