¹ "Lino iwebo, mwana mulombe wamuntu, sinsima aatala a Gogu akwaamba kuti, 'Mwami Jehova waamba echi: Bona! Ndilaatala anduwe, Gogi, simwami wa Mesyechi antomwe a Tubbalu. ² Ndiyokunyona akuyokuzulwida; ndiyomweeta kuzwa kunyika akumweeta kuzilundu zya Izilayeli. ³ Mpawo ndiyowuma adantambwa lyako kuzwa kukuboko kwachimweensi akuchita tuunta kati tuwe kuzwa kukuboko kwalulyo. ⁴ Uyoowa kuchilundu chaIzilayeli-lwako antomwe ankamu zyako alimwi abasilumamba bali anduwe. Ndiyokwaaba kutuyuni akubanyama bamusokwe kuti ubechakulya. ⁵ Uyowida amunda ulantanganana, nkambo lwangu mbundaamba -- oku nkwamba kwa Mwami Jehova. ⁶ Mpawo ndiyotuma mulilo kuli maGogu alimwi akulibabo bakkala kulikabotu akunkomwe, alimwi bayoziba kuti ndime Jehova. ⁷ Nkambo njochita izina lyangu lisalala kuti lizibinkane akati kabantu bangu ba Izilayeli, alimwi nsikoyolekela zina lyangu lisalala kuti lyuubuke; ziisi ziyoziba kuti ndime Jehova, Usalala Omwe wa Izilayeli. ⁸ Bona! Buzuba buzobuza, alimwi buyotola busena - oku nkwamba kwa Mwami Jehova. ⁹ Umwi ukkala mumunzi wa Izilayeli bayoyinka kunze akubelesya zibelesyo zyakudukuzya mulilo akuzyuumpa-ntoobo, izinini antobo mpati, adantambwa, mivwi, nkoli amasumu; bayochita mililo akati kabo kwamyaaka ili musanu ayibili. ¹⁰ Tabakoyoyaandula nkuni kuzwa mumyuunda na kuyogonka minsamu kuzwa mulusaka, mbuli kuti bayowumpa zibelesyo; bayobeza kulabo bayanda kubeza kuzwa kulimbabo, bayobabwezela abo baliyandide kubabwezela oku nkwamba kwa Mwami Jehova.'' ¹¹ Mpawo ziyochitika mubuzuba oobo njochita busena obo bwa Gogu-kabanda mu Izilayeli, mumpata wabaabo beenda kabaya kujwe lya lwizi. Chiyokachizya abo balachiyandisyo chakuzubuka. Oko bayozikka Gogu abantu bakwe boonse biingi. Bayoyita kuti Mumpata wa Hamoni Gogu. ¹² Kwamyeezi ilimusanu ayibili ng'anda ya Izilayeli iyobazika kuchitila kuti basalazye nyika. ¹³ Nkambo bantu boonse bamunyika bayobazika, liyoba zuuba lyachiyibalusyo kuli mbabo elyo ndayopegwa bulemu-aya ngimajwi a Mwami Jehova. ¹⁴ Mpawo kuyobikwa bantu kabeenda mukati anyika, kuti bajane aboo bakali kwenda anyika kwalyoonse, pesi bakafwa alimwi mibili yabo yakachaala ajulu anyika, aboobo bakayiozikide, kuchitila kuti basalazye nyika kumamaninsizyo mwezi wamusanu ayibili bayotalika kuyanduula. ¹⁵ Aba balumi nibakayinda munyika nibaboona nikuba fuwa lyamuntu, bayobikka chitondezyo alinchicho, kusikila basikusya tubanda bakasike akumvwikka mumu Mpata wa Hamani Gogi. ¹⁶ Kuyoba munzi oko utakawuzikwe kuti Hamona. Munzila njiyeyi bayosalazya nyika. ¹⁷ Lino kuli nduwe, Mwami Jehova wamba eechi: amba kutuyuni toonse tulamababa akubanyama boonse bamumyuunda; mwakabungane antomwe mukoze. Mwakayandula - kuzwa kuli abo bali afwifwi kuti bakalipede kuti imebo lwangu ndilikumuchitila, kulipeda kupati kupati kuchilundu chaIzilayeli, kuchitila kuti ukalye nyama akunywabulowa. ¹⁸ Uyolya nyama yabasilumamba alimwi uyonywa bulowa bwamwana musimbi wa mwami wanyika, kunoli bagutu, bana bambelele, mpongo abasipule, zyonse zyakasaninwa ku Bbasyani. ¹⁹ Mpawo muyolya mafuta kuti mukkutisikane, muyonywa bulowa kusikila mukakolwe; eechi chinoli chipayizyo nchindiyomujayila. ²⁰ Muyokkusikana atebuli lyangu amabbiza, nkalaki, basinkondo, awumwi mwalumi wankondo-oku nkwamba kwa Mwami Jehova. ²¹ Ndiyopa bulemu akati kazisi, alimwi zyoonse zisi ziyobona kubeteka kwangu nkwendichita akuboko kwangu ndabikka atala ambabo. ²² N'ganda ya Izilayeli iyoziba kuti ndime Jehova Leza wabo kuzwa muzuba eelyo kaziya kunembo. ²³ Zisi ziyoziba kuti ng'anda ya Izilayeli yakaya kubuzike nkambo kazibi zybo ezyo nzibaka ndaaba anzizyo, aboobo ndakasisa busyu bwangu kuli mbabo akubaaba kumaanza abasinkondonyina kuchitila kuti boonse bakawe apanga. ²⁴ Ndakachita kulimbabo zyendelana akutasalala kwabo azibi zyabo, nindakasisa busyu bwangu kuzwa kulimbabo. ²⁵ Nkinkaako Mwami Jehova wamba echi: lino ndiyobwedezya buzike bwa Jakobo, alimwi njoba aluse kung'anda ya Izilayeli yoonse, nindichita chiyandisyo kuzina lyangu lisalala. ²⁶ Mpawo bayoba akuusa alimwi amilandu yoonse eyo njibaka ndaaba ayo. Bayoluba zyoonse eezi nibayolyokezya munyika yabo yalwangunuko, nkakutakwe umwi ubayoosya. ²⁷ Nindibagwisya kuzwa kubantu akubabungania kuzwa kunyika zyaba sinkondonyina, njolitondezya ndemwini kuba musalali kumenso azisi zyiingi. ²⁸ Mpawo bayoziba kuti ndime Jehova Leza wabo, nkambo ndakabatola mubuzike akati kazisi, pesi ndiyoba bungania lubo kunyika yabo. Tandikoyosiya nikuba umwi. akati kazisi. ²⁹ Nsikoyosisa busyu bwangu limbi kulimbabo chiindi nenjotila Muuya wangu ku ng'anda ya Izilayeli - oku nkwamba kwa Mwami Jehova.''