¹ Ijwi lya Jehova lyakandisikila, kaliti, ² ''Mwana muntu , bamba busyu bwako kulangana Gohu, nyika ya Magogu, mwana wamwami mupati wa Masekki a Tubbalu; alimwi sinsima kulwisyania anguwe. ³ Wamba, 'Mwami Jehova waamba eechi: Langa! ndalwisyania anduwe, Gogu, mwana wamwami mupati wa Masekki a Tubbalu. ⁴ Aboobo ndiyokuzyungulusya akubamba tulabwi mumuya wako; Ndiyokutuma kunze abasimpi bako, mbong'olo, abasimbong'olo, boonse babo kabasamide zilwanisyo zizulide, imbunga mpati ilantobo mpati antobo niini, boonse baaba kabajisi mapanga! ⁵ Peziya, Kkusyi, a Libbiya balambaabo, boonse bajisi ntobo angowani! ⁶ Goma ankamu zyaba silumamba bakwe boonse, alimwi Bbeti Togama, kuzwa kumabazu alikule kunyika, abasikulwana bakwe boonse! Bantu biingi bamisyobo bali anduwe! ⁷ Libambile! Iyii, libambile abasikulwana babungene anduwe, alimwi ube silutwe wabo. ⁸ Uyoyitwa kukumana kwamazuba miingi, alimwi kwakumana imwi myaaka uyoyinka kunyika eyo yakafutuka kuzwa kupanga ayeyo yakayobolwa kuzwa kumisyobo yabantu, bakayobolwa kuboola kuzilundu zya Izilayeli ezyo zyakali kwendelela kaali matongo. Pesi bantu benyika bayogwisigwa kuzwa mubantu, akuyolikkalila kabotu, boonse babo! ⁹ Aboobo uyoyinka aatala mbuli mvula ilamuuwo mbwitanta; unoli mbuli joba livumbide basilumamba biingi bali anduwe. ¹⁰ Mwami Jehova waamba echi: chiyochitika mubuzuba oobo kuti makanze ayooba mumoyo wako, alimwi uyopanga nzila zyabubi.' ¹¹ Mpawo uyowaamba, ' Ndiyoyinka aatala kunyika ilantanganana; Ndiyoyinka kubantu bawumwine bakkede kabotu, boonse babo bakkala oko kutakwe malambo naa mankolo, alimwi oko kutakwe milyango yamtuunzi. ¹² Ndiyobweza mbono akubba butebuzi, kuchitila kuti ndikakulete janza lyangu kukulwisya matongo ayo akayakululwa, akulwisyana abantu bakabunganisigwa kuzwa kumaasi, bantu balikujana zivuubwa abuvubi, alimwi abo balikukkala akati aakati kanyika.' ¹³ Syebba a Dedani, alimwi abasambazi baku Tasisi antomwe abasikulwana babo baniini bayooti kulinduwe, wazida kuzobweza butebuzi na? Wabungania na impi zyako kukubweza zitalikabotu, kukubweza nsiliva angolide, kukubweza zivuubwa abuvubi alimwi akuyoola butebuzi bwingi?' ¹⁴ Nkinkaako sinsima, mwana muntu, akwamba kuti kuli Gogu, 'Mwami Jehova waamba eechi: mubuzuba oobo, elyo bantu bangu ba Izilayeli bakupona kabakwabilidwe, tukoyoyiya na atala ambabo? ¹⁵ Uyooza kuzwa kubusena bwako buli kule kunyika ampi mpati, boonse kabatantide mbongolo, nkamu mpati. ¹⁶ Uyolwisya bantu bangu ba Izilayeli mbuli joba livumba nyika. Mumazuba alikunembo ndiyokuleta kukulwisyana enyika yangu, kuti zisi zikandizibe ndakulitondezya kwinda mulinduwe, Gogu, kusalala kunembo lyamenso aabo. ¹⁷ Mwami Jehova waamba echi: Teensi nduwe na oyo ngundakaamba mumazuba akiinda mujanza lyabalanda bangu, basinsimi ba Izilayeli, bakasinsima muchindi chabo kwamyaka kuti ndiyomuleta kukulwisyana ambabo? ¹⁸ Aboobo kuyoba obo mubuzuba obo elyo Gogu aakulwisya nyika ya Izilayeli - oyu Mwami Jehova wamba obo -- bukali bwangu bwangu buyokomenesya kukunyema. ¹⁹ Muchiyandisyo changu antomwe amumulilo wakunyema, Ndamwambila kuti mubuzuba kuyoba muzuzumo mupati munyika ya Izilayeli. ²⁰ Bayokankama kunembo lyangu -- inswi zyamulwizi abayuni bamajulu, banyama bamusokwe, azilengwa zyonse ziyavula anyika, alimwi amuntu wonse oyo uli antabale yanyika. Zilundu zilakuwalilwa aansi abweenga bulakuwa, kusikila malambo woonse awida aanyika. ²¹ Ndiyotuma ipanga kulwisyania anguwe muzilundu zyangu zyoonse--oku nkwaamba kwa Mwami Jehova- ipanga lyamwami mwalumi liyolwisyania amunyina. ²² Mpawo ndiyomubeteka amalwazi abulowa; alimwi mvula iyindilide achivulamabwe a salufa iiyaka ndiyoziwisya aansi alinguwe abasikulwana azisi zyingi ezyo zilanguwe. ²³ Nkaambo ndiyotondezya bupati bwangu abusalali bwangu mumenso azisi zyingi, alimwi balakuziba kuti ndime Jehova.''''