¹ Ijanza lya Jehova lyakali alindime, alimwi wakanditola amuuya wa Jehova mpawo akunditula aansi akati kamumpata; mwakazwide zifuwa. ² Eelyo wakandichita kuti njinde akati kabo konse konse. Bona! Zyingi zyabo zipati zyakali mumumpata. Bona! Zyakali ziyumu loko. ³ Wakaamba kuti kuli ndime, ''Mwana amuntu, sa eezi zifuwa zilakonzya kupona?'' Lino ndakamba kuti, ''Mwami Jehova, nduwe awulike uzi.'' ⁴ Mpawo wakamba kuti kuli ndime, ''Sinsima aatala azifuwa eezi akwamba kuti kuli nzizyo, 'Zifuwa ziyumu. Swilizya kujwi lya Jehova. ⁵ Mwami Jehova uwamba oobu kumafuwa aaya: Bona! Ndaamba kweta kuyoowa kuli nywe, alimwi muyopona. Alimwi ndamubikila milambi kuli ndinywe akumwetela nyama muli ndinywe. ⁶ Ndiyomusamika chikumba akumubikka muya aboobo muyopona. Nkabela muyoziba kuti ndime Jehova.'' ⁷ Aboobo ndakasinsima mbubonya mbundakalayililwa; mbuli mbundakasinsima, bona, muzuzumo wakasika, akuzungaana. Eelyo mafuwa akaswanana aantomwe-chimwi achimwi chifuwa kuchifuwanyina. ⁸ Ndakalanga alimwi, ndakabona, milambi lino yakaba alingawo, alimwi yakasyuuka achikumba chakavumba. Pesi tikwakali muuya pe alingawo. ⁹ Eelyo Jehova wakamba kuti kuli ndime, ''Sinsimina kumuuya, sinsima, mwanamuntu, wamba kuti kumuuya, 'Mwami Jehova wamba kuti: Muuya, kobola kuzwa kumyuuwo yone, amuuya kulibabo bakalibajayigwa, kuti bapone.''' ¹⁰ Aboobo ndakasinsima mbuli mbundakalayililwa; nkabela muuya wakasika kulimbabo alimwi akupona. Eelyo bakimikila amawulu aabo, nkamu yabasilumamba mpati. ¹¹ Eelyo Jehova wakaamba kuti kuli ndime, ''Mwana amuntu, mafuwa aaya njeng'anda ya Izilayeli yoonse. Bona! Baamba kuti, 'Mafuwa eesu akayuma, alimwi bulangizi bwesu tabuchiwo. Twakagonkwa.' ¹² Nkiinkako sinsima akwamba kuti kulingawo, 'Mwami Jehova waamba kuti: Bona! Ndiyojula tubanda twenu akumubusya kuzwa mulintuto, nobantu bangu. Ndiyomubwedezya kunyika ya Izilayeli. ¹³ Eelyo muyoziba kuti ndime Jehova, ninjojula tubanda twenu alimwi akumugwisya muli ntuto, nobantu bangu. ¹⁴ Njobikka muuya wangu mulindinywe aboobo muyopona, ndiyochita kuti muyolyokezya munyika yenu nimuyoziba kuti ndime Jehova. Nchindaamba alimwi njochichita-ooku nkwamba kwa Jehova.'''' ¹⁵ Lino ijwi lya Jehova lyakandisikila, kaliti, ¹⁶ ''Aboobo, lino webo mwana muntu, bweza kasako kamwi awulikke akukalemba alinkako, 'Kuti Juda aabantu ba Izilayeli, ambayenda aabo. 'Eelyo bweza kasako kambi akukalemba alinkako, kuti Jozefu, ntabi ya Efulemu, akubantu boonse ba Izilayeli, ambayenda aabo.' ¹⁷ Kotuswanizya antomwe kukasako komwe, aboobo tube kasako komwe mujanza lyako. ¹⁸ Lino bantu bako mbaambula kulinduwe, 'Tokonzyi kutubuzya eezi zintu zyako mbuzyaamba?' ¹⁹ aboobo baambile kuti, 'Mwami Jehova waamba oobu: Bona! Ndabweza ntabi ya Jozefu eelyo ilimujanza lya Efulemu amikowa ya Izilayeli abeenzinyina akuswanizya kuntabi ya Juda, aboobo ntabi yomwe, alimwi bayoba uumbi mujanza lyangu.' ²⁰ Jata mujanza lyako intabi eezyo nziwakalemba kumenso aabo. ²¹ Wamba kuli mbabo, 'Mwami Jehova waamba oobu: Bona! Ndamba kuyobweza bana ba Izilayeli akati kazisi ooko nkubakaya. Njobayobolola kuzwa kunyika zizyungulukide alimwi ndiyoobeta kunyika yabo. ²² Njobachita kuti babe musyobo omwe munyika, kuzilundu zyaba Izilayeli, alimwi kuyoba mwami umwi aatala lyabo boonse, alimwi takukoyoba zisi zibili lubo pe. Takukabi kwanzana lubo kuba maami aabili. ²³ Lino tabakoyolisofwazya limbi abalikke azileza kufula zyabo, azisesemyo zyabo, azibi zyabo zimwi. Njobafutula kuzwa mukutasyomeka kwanchito zyabo zyoonse nzibakachita, alimwi njobasalazya, aboobo bayoba bantu bangu, ambebo ndiyooba Leza wabo. ²⁴ Devidi mulanda wangu nguyoba mwami wabo. Aboobo kuyoba mweembeli womwe kuli mbabo boonse, alimwi bayoyenda mumbeta zyangu akubamba milawu yangu akwichita. ²⁵ Bayokkala munyika eeyo njindakapede mulanda wangu Jakkobbu, mubakakkede bamawuso. Bayokkala mulinjiyo kwalyoonse, abana babo, abana babana babo, Devidi mulanda wangu uyooba mwami wabo walyoonse. ²⁶ Ndiyobikka chizuminano chalumuno kuli mbabo. Chiyoba chizuminano chittamani kulimbabo. Njobapa choolwe akubayungizya akubikka busena bwangu busalala akati kabo kukabe kutamani. ²⁷ Chikkalilo changu chiyooba ambabo; Ndiyoba Leza wabo, alimwi bayooba bantu bangu. ²⁸ Eelyo zisi ziyoziba kuti ndime Jehova wakapambula Izilayeli, naa busena busalala bwaba akkati kabo kwalyoonse.''