¹ "Lino webo, mwana amuntu, sinsimina zilundu zya Izilayeli kuti, 'Zilundu zya Izilayeli, swilila kujwi lya Jehova. ² Mwami Jehova waamba echi: Sinkondo wakamba kuti anduwe, "Aha!"alimwi "Masena ansiku alajulu aba buvubi bwesu."" ³ Nkiinkako sinsima akwamba kuti, 'Mwami Jehova waamba echi: Nkaambo kakumwayulwa alimwi nkambo kakulwisigwa ooko kwakasika alinduwe kuzwa kumabbazu woonse, nywebo mwakaba buvubi bwazisi zimwi, mwakaba chintu chamulomo ipilingene, atwambo twabantu. ⁴ Nkiinkako, zilundu zya Izilayeli, swilila kujwi lya Mwami Jehova: Mwami Jehova waamba echi kuzilundu akutulundu tulamfu, amifolo ambali lyatulonga amimpata amatongo atachikwe bantu amyuunzi yakabwezegwa achintu chakusesya kuzisi zimwi ezyo zibazyungulukide - ⁵ nkambo Mwami Jehova wamba eechi: ndakaambula mumulilo wabukali bwangu atala azisi zimwi, aatala a Idomu aboonse bakabweza nyika yangu kuti iibe yabo antomwe mulukondo mumyooyo yabo amyooyo isekelede chakusampawula myuuya muchindi chakundinyanzya nyika kuti ibe yamachezezyo aabo.' ⁶ Nkinkaako, sinsimina nyika ya Izilayeli akwaamba kuti kuzilundu akutulundulundu tuli aatala kulukomba akumasena, 'Mwami Jehova waamba eechi: Amubone! mubukali bwangu amulunyemo lwangu ndikwambisisya eechi nkambo wazyala matusi azisi. ⁷ Nkinkaako, Mwami Jehova waamba eechi: Lwangu mebo ndemwini ndiyonyampula kuboko ndikakonke kuti zisi ezyo zikuzyungulukide tazikoonga ziyonyampula mawuse aazyo. ⁸ Pesi webo, muzilundu zya Iziliyeli, uyomena mitabi akuzyala michelo yabantu bangu ba Izilayeli, mbokunga bayoobola lubo lino kulinduwe. ⁹ Nkambo amubone, ndili wenu, wakamujata chaluzyalo; muyolimwa alimwi akuyobyalwa ambuto. ¹⁰ Elyo ndiyomuyungizizya akati kenu mumweelwe wabantu benu, nekuba kung'anda yoonse ya Izilayeli. Myunzi iyokkalwa alimwi matongo ayoyakululwa. ¹¹ Ndiyomuyungizizya bantu antomwe abanyama alindinwe nozilundu kuchitila kuti bakavuzyanie alimwi bakazyalane. Eelyo ndiyokuchita kuti ukakkaligwe mbuli mbuwakachitidwe kukusanguna, alimwi ndiyokuchita kuti ukazwidilile kwinda mbuwakabede kutanguna, nkambo uyoziba kuti ndime Jehova. ¹² Njoyeta bantu, bantu bangu ba Izilayeli, kuti bakeende alindinywe. Bayomubweza mpawo muyoba lukono lwabo, alimwi tamukoyochita limbi bana babo kuti bafwe. ¹³ Mwami Jehova waamba eechi : Nkaambo banowamba kuti kuli ndinywe, "Mulalya bantu, akudyamizigwa chisi chabana benu," ¹⁴ nkinkaako tamuchiyolyi limbi bantu, alimwi tamuchiyo chiti kuti chisi chenu chikakwiile mfida zyabo. Ooku nkokwambula kwa Mwami Jehova. ¹⁵ Naakuti ngandichiyo kuzumizya limbi na kuti utelele matusi azisi lubo; takwe nochiyoba amawuse abantu nakuti kuyoyetelezya chisi chako kuti chiwe - ooku nkokwambisya kwa Mwami Jehova."" ¹⁶ Eelyo ijwi lya Jehova lyakasika kuli ndime, kalyaamba kuti, ¹⁷ "Mwana amuntu, ing'anda ya Izilayeli niyakkala nyika yabo, bakiisofwazya enzila zyabo anchiito zyabo. Izila zyabo zyakali mbuli mwanakazi ulikumazuba aakwe akusofwala kunembo lyangu. ¹⁸ Aboobo ndakatila anze bukali bwangu aatala ambabo nkambo kabulowa oobo mbubakatila enyika akambo kakwisofwazya a zileza zyabo. ¹⁹ Ndakabamwaya akati kazisi; bakali mwayikide mukati kamanyika. Ndakababeteka mukwinda munzila zyabo amunchito zyabo. ²⁰ Eelyo bakiinka kuzisi, kufumbwa nkubakiinka, bakasofwazya izina lyangu lisalala bantu mbaakamba kuti ambabo, 'Aaba nchobeni mbantu ba Jehova na? Nkambo bakasowelwa aanze anyika yabo.' ²¹ Pesi ndakali aluse nkambo kezina lyangu lisalala eeyo ng'anda ya Izilayeli njioyakasofwazya akati kazisi, nibakaya nkuko. ²² Nkiinkako wamba kuti ku ng'anda ya Izilayeli, 'Mwami Jehova wamba eechi: Lwangu nsikoyochita echi akambo kandinywe, mung'anda ya Izilayeli, pesi nkambo kezina lyangu lisalala, eelyo ndimwaka sofwaazya akati kezisi kufumbwa nkumwakeenda. ²³ Nkambo ndiyochita zina lyangu pati lisalale, eelyo ndimwakasofwazya akati kazisi - mukati kazisi, mwakali sofwazya. Alimwi zisi ziyoziba kuti ndime Jehova - ooku nkwaambisya kwa Mwami Jehova - muyobona kuti mebo ndilasalala. ²⁴ Ndiyomugwisya kuzisi akumubikka kufumbwa kunyika, mpawo ndiyomweeta kunyika yanu. ²⁵ Eelyo ndiyomusansa maanzi asalala kuti mukasalazigwe kuzwa kubusofwazi bwenu boonse, alimwi ndiyomusalazya kuzwa kuzileza zyenu. ²⁶ Ndiyomupa moyo mupya amuuya mupya muzizo zyanu zyamukati, mpawo ndiyogwisya moyo yabbwe kuzwa kunyama yanu. Aboobo ndiyomupa moyo wanyama. ²⁷ Ndiyobika muuya wangu mulindinywe akumuchita kuti mweende mumilayizyo yangu akubamba mbeta zyangu, kuchitila kuti mukazichite. ²⁸ Eelyo muyoyikkala nyika eeyo njindakapa bamataata banu; muyoba bantu bangu, mpawo ndiyoba Leza wenu. ²⁹ Nkiinkako ndiyomuvuna kuzwa kubusofwazi bwenu. Ndiyosompezya zilyo akuzizyaazya. Tandikabiki nzala lubo akati kenu. ³⁰ Ndiyoyungizya michelo yamusamu azizwa mumyuunda kuchitila kuti mutakubi limbi nimuba amasampuzi anzala akati kazibi. ³¹ Eelyo muyoyeeya bubi bwanzila zyenu anchito zyenu zyakatali mbotu, alimwi muyotondezya lusampawuko kumasyu aanu nkambo kazibi zyanu anchito zitaluleme. ³² Nsilimukuchitaeechi nkambo kandinywe - ooku nkwambisya kwa Mwami Jehova - Akube kuti chizibinkane eechi kuli ndinywe. Aboobo amube ansoni amawuse nkambo kenzila zyenu, yo ng'anda ya Izilayeli. ³³ Mwami Jehova waamba oobu: Mubuzuba oobo nenjomusalazya kuzwa kumilandu yenu yoonse, njomuchita kuti mukakkale mumyunzi akuyakulula masena akamwayidwe. ³⁴ Mbuunga muyolima nyika yakaba matongo kusika lumwi tichili matongo kunembo lyamenso aboonse banakwinda. ³⁵ Eelyo bayowamba oobu, "Inyika eeyi, yakali mwayidwe, pesi yaba mbuli chilili cha Ideni; myunzi imwayidwe yamatongo yakatakakkalidwe eeyo yakamwayidwe aansi ano yakwabililwa akukkaligwa.'' ³⁶ Eelyo zimwi zisi zili akkati kanu ziyoziba kuti ndime Jehova, kuti ndakazyala matongo akubyalulula masena akali lekedwe. Ndime Jehova. Mebo ndachaamba alimwi ndiyochichita. ³⁷ Mwami Jehova wamba obu: Alubo ndiyobuzigwa ang'anda ya Izilayeli kuti ndibachitile eechi, ndibavuzye mbuli butanga bwabantu. ³⁸ Mbuli butanga bwaka bikwa mbali kuba zipayizyo, mbuli butanga mu Jelusalemu kumapobwe akwe asalidwe, mbombubo kuti myunzi yakali matongo ikazuzigwe butanga bwabantu alimwi bayoziba kuti ndime Jehova.'''