¹ Mpawo ijwi lya Jehova lyakasikila kuli ndime, nkalyamba kuti, ² ''Mwana muntu, sinsima atala abeembeli ba Izilayeli. Sinsima alimwi uwambe kuti kulimbabo, ''Mwami Jehova waamba eezi kubeembeli: Mapenzi kubeembeli ba Izilayeli aabo balokulyembela lwabo beni. Tabelede na kuti beembeli balanga butanga bwambelele? ³ Mwalya zimpanzi zineneede alimwi akuzwata kwinda muboya. Mujaya butanga bwambelele buneneede. Mbumwakateembela pe abunini. ⁴ Takwepe nimwakasimya eezyo zilamalwazi, naa akusilika zimwi zichisidwe. Takwe nimwakaanga eezyo zityokede, alimwi takwepe nimwakabwedezya changuzu akunyonyongania. ⁵ Mpawo zyakasansaana nkazitakwe mwembeli, alimwi zyakaba chakulya chabanyama boonse bapona bamumyuunda, musule lyakusansaana. ⁶ Butanga bwangu bwambelele buliswekede aatala azyonse zilundu akuli toonse tulundu tulimujulu, alimwi bwakanzaana bwazulila nyika yoonse. Nikubaboobo takwe naba umwi ulokubulanguula. ⁷ Nkaambo kako, nobeembeli, amuswilizye ijwi lya Jehova: ⁸ Mbuli mbwempona -- aya malayilile a Mwami Jehova -- nkambo butanga bwambelele bwaba mbono zibwezelwa achakulya chabanyama boonse bamumyuunda, nkambo tikwalikwe mwembeli alimwi takwepe naba umwi wabembeli bangu bakayanduula butanga bwangu bwambelele, pesi beembeli bakalilingula lwabo beni alimwi tebakeembela butanga bwangu bwambelele. ⁹ Nkaambo kaako, nobembeeli, muswilile ijwi lya Jehova: ¹⁰ Mwami Jehova waamba eezi: Amulange! Ndime sinkondonyina abeembeli, alimwi ndiyoyanduula butanga bwangu bwembelele kuzwa kujanza lyabo. Mpawo ndiyobaanda kuzwa kukwembela butanga bwambelele; nakuti beembeli nikuba lili tabachiyolyembeli lwabo beni mbuli kuti ndabweza butanga bwangu bwambelele kuzwa mumilomo yabo, kuchitila kuti butanga bwangu bwembelele butachiyoobi chakulya kulimbabo. ¹¹ Nkaambo Mwami Jehova waamba eezi: Amulange! Imebo lwangu Ndiyoyanduula butanga bwangu bwambelele alimwi Ndiyobulanguula, ¹² mbuli mwembeli uyandawula butanga bwakwe bwembelele bwaanzeene. Mbwesiyanduule butanga bwangu bwembelele, alimwi ndiyobuvuna kuzwa kumasena woonse awo mpozyakaanzanina mubuzuba bwamayooba amudima. ¹³ Mpawo ndiyozigwisya kuzwa akati kabantu; ndiyozibunganisya kuzwa kumanyika akuzyeeta kunyika yazyo. Ndiyozibika mumachezezyo alikumbali lyazilundu zya Izilayeli, kumbali lyatulonga alimwi mu woonse makkalilo anyika. ¹⁴ Ndiyozibika mumachezezyo mabotu; zilundu zilamfu zya Izilayeli ziyooba masena akuchezezya. Ziyolala mumasena mAabotu akuchezezya, alimwi mubuvule bwamachezezyo, ziyochela muzilundu zya Izilayeli. ¹⁵ Imebo lwangu ndiyoyembela butanga bwangu bwembelele, alimwi Imebo lwangu ndiyozichita zilale aansi -- aaya malayilile a Mwami Jehova -- ¹⁶ Ndiyoyandawula zisweekede akuboozya zisowedwe. Ndiyowanga mbelele zityokede akusilika mbelele zichiswa, pesi zineneede azisimide ndiyozinyonyoona. Ndiyoyembela mukwelanisya. ¹⁷ Aboobo lino nywebo, nobutanga bwembelele -- eezi nzizyo zyaamba Mwami Jehova -- amulange, Ndiyooba mubetesi akkati kambelele ambelele alimwi akkati kabagutu abapule bempongo. ¹⁸ Takweleli na kuchela mumachezezyo mabotu, ngumutakalyitilile aansi amawulu enu zitakachaale kumachezezyo; akunywa manzi anzizneeme, ayo ngimutachite matope mumilonga amawulu aanu? ¹⁹ Nkujana mbelele zyangu zyalya nzimwalyatilila amawulu emu, alimwi kunywa ayo ngimwavwindingania? ²⁰ Akaako Mwami Leza waamba eezi kuli mbaabo: Amulange! Imebo lwangu ndemwini ndiyobeteka akkati kambelele zineenede azikotede, ²¹ nkambo mwakazitonta amabazu eenu amakkuko, alimwi mwakadinka zilebukide zyoonse ameja enu kusikila mwazimwayila kule kuzwa kunyika. ²² Ndiyovuna butanga bwangu bwambelele alimwi tabukoyoba lubo mbono zyakubwezela, alimwi ndiyobeteka akati kambelele yomwe ayimbi! ²³ Ndiyozibikila mwembeli alimwi, mulanda wangu Devidi. Uyozyembela, uyozicheezya, alimwi uyoba mwembeli wazyo. ²⁴ Nkaambo Imebo, Jehova, Ndiyoba Leza wazyo, alimwi mulanda wangu Devidi uyoba mwana mulombe wamwami akkati keezyo -- Imebo, Jehova, ndalayilila eezi. ²⁵ Mpawo ndiyochita chizuminano chaluumuno anzizyo alimwi akugwisya banyama bamusokwe bajisi nchito mbi kuzwa munyika, kuchitila kuti zikakkale zikabambinkane mulusaka akulala nkazikwabililidwe musokwe. ²⁶ Alimwi ndiyoyeta zilongezyo alinzizyo akumasena azyunguluka kalundu, nkaambo ndiyotumizya imvula yachilongezyo. Mpawo minsamu iyoba amvula yachilongezyo. Eyi iyoba mvula yachilongezyo. ²⁷ Mpawo minsamu yamumyunda iyozyala michelo yayo, alimwi anyika iyotebula butebuzi bwayo. Mbelele zyangu zinoyo bambinkene munyika yazyo; mpawo ziyoziba kuti ndime Jehova, eelyo ndiyotyola mitanda yamajokwe azyo, alimwi ndiyobavuna mujanza lyabaabo babajata buzike. ²⁸ Tazikoyobi alimwi lubono lwakubweza biyo amanyika, alimwi banyama bamulusaka balanyika tabakoyo chizilumi pe. Nkambo ziyokkala kazibambinkene, alimwi takwe naba umwi utakaziyoosye. ²⁹ Nkambo ndiyozipa nyika ibambinkene kukuba zilyo, aboobo tabakoyozunda nzala munyika, alimwi tabakoyo lomba chakulya kumanyika. ³⁰ Mpawo bayoziba kuti Imebo, Jehova Leza wabo, ndilambaabo. Mbantu bangu, ng'anda ya Izilayeli - aaya malayilile a Mwami Jehova. ³¹ Nkambo mulimbelele zyangu, butanga bwambelele bwamachezezyo aangu, alimwi bantu bangu, alimwi Ndime Leza wenu -- aaya malayilile a Mwami Jehova.'''