¹ Elyo ijwi lya Jehova lyakasika kulindime, kaliti, ² ''Mwana wamuntu, wamba oobu kubantu bako, 'Wamba kuti kulimbabo, 'Elyo nowakeeta panga aatala anyika niba iili, mpawo bantu bakuliyeeyo nyika batolo mwalumi anze kuzwa akati kabo akumubikka mulindizi wabo. ³ Wakalanguula panga mbulisika munyika, alimwi wakalizya lwija lwakwe kuti achenjezye bantu! ⁴ Na bantu bamvwa kulila kwalwija pesi kabataswilili, alimwi kuti panga lyasika akubajaya, eelyo bulowa bwawumwi awumwi bunoli atala amutwe wakwe. ⁵ Naa umwi wamvwa kulila kwalwija akutaswilila, bulowa bwakwe bulatala lyakwe; pesi na waswilila, uyovuna buumi bwakwe. ⁶ Nikuba oobo, naa mulindizi wabona panga kalizobuza, pesi kuti talizyi lwija, antomwe ampindu eeyo yakuti bantu tebachenjezegwa pe, alimwi kuti panga lyasika akutola buumi bwawumwi, elyo oyo muntu uyofwa muchibaka chakwe, pesi ndiyoyandawula bulowa bwakwe kuzwa kumulindizi. ⁷ Lino webo lwako, mwana wamuntu! Ndilakuchita mulindizi wang'anda ya Izilayeli; uyomvwa majwiazwa kumulomo wangu akubachenjezya muchibaka changu. ⁸ Wandaamba kumuntu sizibi, 'Sizibi atala anzila yakwe, eelyo oyo uyofwa muzibi zyakwe, pesi ndayanduula bulowa bwakwe kuzwa kujanza lyako! ⁹ Pesi webo lwako, naa wachenjezya sizibi atala anzila yakwe, aboobo kuti asanduke kuzwa kulinjiyo, alimwi kuti taleki kuzwa kunzila yakwe, elyo uyofwa muchibi, wavunan buumi bwako. ¹⁰ Aboobo iwebo, mwana wamuntu, wamba kung'anda ya Izilayeli, 'Mulokwamba eechi, 'Ndubizyo zyesu zili atala lyesu, alimwi tulokuboola mulinzizyo! Tulapona biyeni?''' ¹¹ Bambile oobu, 'Mbuli Mbwempona -- aaya ngimalayilile a Mwami Jehova -- nsibotelwi pe mulufu lwasizibi, nkambo naa sizibi wasanduka kuzwa kunzila yakwe, eelyo uyopona! Sanduka! Sanduka kuzwa kunzila zyako imbi! Akamboonzi noyanda kufwa, ng'anda ya Izilayeli?' ¹² Aboobo lino webo, mwana muntu, wamba oobu kubantu bako; 'Bululami bwamuntu ululeme tabumugwasyi pe nakuti wabisya! Buubi bwamuntu sizibi tabumuchiti kuti afwidilile pe naa wasanduka kuzwa kuchibi chakwe! Aboobo muntu ululeme takonzyi kupona nkambo kabululami na wabisya. ¹³ Naa ndamba kumululami, ''Nkasimpe uyopona!'' alimwi na wasyoma mubululami bwakwe akuchita chakutalulama, nsikoyoyeeya bululami bwakwe limbi pe. Uyofwida chibi nchakachita. ¹⁴ Aboobo na ndaamba kuli sizibi, ''Iwebo nkasimpe ulafwa,'' pesi kuti wasanduka kuzwa kuzibi akuchita chiluleme achibotu -- ¹⁵ naa wabukulusya chikwelelte nchakambilidwe eecho nchakaliyandila mukubisya, alimwi na weenda mumilazyo eyo ipa buumi akuleka kuchitazibi -- aboobo uyopona chakasimpe. Takoyofwa pe. ¹⁶ Taakwe chibi nchakachita chiluzi achibotu, alimwi. aboobo uyopona chakasimpe! ¹⁷ Pesi bantu bako baamba kuti, ''Inzila ya Mwami tayilikabotu pe!'' Pesi ninzila zyanu nzizitali kabotu pe! ¹⁸ Eelyo muntu ululeme kuti waleya kuzwa munzila yakwe yabululami akuchita chibi, mpawo uyofwida muchibi eecho! ¹⁹ Elyo kuti sizbi waleka kuzwa kububi bwakwe nkambo kazintu ezyo! ²⁰ Pesi nywebo nobantu mwaamba kuti, ''Inzila ya Leza tilikabotu pe!'' Ndiyomubeteka umwi awumwi kwindila munzila yakwe, ng'anda ya Izilayeli!''' ²¹ Zyakachitika mumwaka wakkumi ayibili, mubuzuba bwamusanu bwamweezi iwakkumi wabuzike bwesu, oolo lwangunuko lwakaza mubuzike kuzwa ku Jeluslemu akwaamba kuti, ''Dolopo lyatolwa mubuzike!'' ²² Kuboko kwa Jehova kwali atala lyangu goko kalitana sika lwangunuko amubono wangu wakali jukide kuchiindi nakasika kuli ndime kubuchedo. iAboobo mulomo wakali jukide; tendakachili syatambi pe! ²³ Mpawo ijwi lya Jehova lyakandisikila, kalyaamba kuti, ²⁴ 'Mwana wamuntu, umwi ooyo ukkala mulaayo matongo amunyika ya Izilayeli alokwambuula akuti, ''Abbulahamu wakali ngomuntu alikke, wakakona nyika, pesi tuli bayingi.' ²⁵ Nkiinkaako wamba eechi: mulalya bulowa, akunyampula menso kuzikozyanio zyanu, mpawo mwatila bulowa bwabantu. Muyoyikona na zyanchoonzyo nyika? ²⁶ Mwakasukama kumapanga anu akuchita zintu zisesemya; awumwi mwalumi wasofwazya mwanakazi wasimayakilane. Muyoyikona na nchobeni nyika?' ²⁷ Uyowamba eechi kuli mbabo, 'Mwami Jehova waamba eechi: Mbuli mbwempona, nkasimpe aboo balimumatongo bayowisigwa apanga, alimwi njoopa aabo bali mumyuunda kuzilengwa zipona mbuli chilyo, abaabo bali mumayubilo abaali mumampangala bayoofwa azilwazi. ²⁸ Elyo njosandula nyika kuba lunyonyooko achiyoosyo, alimwi kulisumpula kwanguzu zyayo kuyomana, nkambo zilundu zyaku Izilayeli ziyooba nkanda, aboobo takwe naba womwe uyoyinda mulimbabo.' ²⁹ Aboobo bayoziba kuti Ndime Jehova, na ndachita nyika ibe lunyonyooko akusowegwa nkambo kazisesemyo zyoonse eezyo nzibakachita. ³⁰ Aboobo lino webo, mwana wamuntu -- bantu bako balokwamba zintu atala anduwe kusiya malambo amilyango yamaanda, alimwi umwi ulaamba kuli umwi awumwi -- umwi mwalumi kumukulana wakwe, 'Atwinke tukaswilizye ijwi lyamusinsimi lyakasika kuzwa kuli Jehova!' ³¹ Aboobo bantu bangu bayosika kuli nduwe, mbuli mbubakachita kale, alimwi bayokkala kunembo lyako akuswilizya majwi aako, pesi tabakalemeki pe. Majwi mabotu ali mumilomo yabo, pesi myoyo yabo yinkila mpindu zitaluzi. ³² Nkambo iwebo ulimbuli lwiimbo luyandwa kulimbaabo, muzuzumo mubotu ulya usamidwe kabotu kunjeya zikweledwe zyachilizyo, aboobo bayoswilizya kumajwi aako, pesi takwe naba womwe utakalemeke. ³³ Aboobo nizyachitika -- boona! Ziyochitika! -- mpawo bayoziba kuti musinsimi wali akati kabo.''