¹ Elyo zyakachitika mumwezi wakkumi ayibili wamunyaka wakkumi ayibili, mubuzuba butaanzi bwamwezi, elyo ijwi lya Jehova lyakasika kulindime, kaliiti, ² ''Omwana muntu, wompololesya aatala aFalo mwami wa Ijiputi; wamba kuti kulinguwe, 'Waba mbuli mwana wamulavu akati kazisi, pesi waba mbuli chiyoosyo mulwizi; wakakkuvunga manzi, wakopengania maanzi amawulu aako akwavwindania maanzi aabo. ³ Mwami Jehova waamba boobu: Aboobo ndiyoyala kazamba kangu alinduwe mumbungano yabantu biingi; alimwi bayokunyampula mukazamba kangu. ⁴ Ndiyokusiya chakukutakata munyika, Ndiyokusowela mumuunda akuchita kuti bayuni bamajulu bakakkale alinduwe; inzala yabanyama boonse bapona anyika iyokkutisigwa anduwe. ⁵ Nkenkaako ndiyobikka nyama yako aazilundu, alimwi ndiyozuzya mimpata amutunta wako uuzwide mvwinyu. ⁶ Mpawo njotila bulowa bwako atala azilundu, alimwi tulonga tuyozuzigwa abulowa bwako. ⁷ Mpawo eelyo ndayokuzima, ndiyovumba akusizya nyenyeezi zyawo; Ndiyovumba zuba amayoba, alimwi mweezi tukoyomunika pe mumuni wawo. ⁸ Yoonse mimuni imunika kumajulu njoyisizya alinduwe, akuyosizya nyika yako -- aya ngemalayilile a Mwami Jehova. ⁹ Aboobo njoyoosya moyo wabantu biingi mumanyika aayo ngotazi, nendayoyeta kuwa kwako akati kazisi, akati kamanyika ngwakayitanaziba. ¹⁰ Ndiyoyoosya bantu biingi atala anduwe; baami babo bayokankama akuyoowa akambo kako nendayovukuzya panga lyangu kunembo lyabo. Kufumbwa chindi awumwi uyokankama nkambo kako, mubuzuba bwakuyowisigwa kwako. ¹¹ Nkaambo Mwami Jehova waamba ezi: Ipanga lyamwami wa Bbabbiloni liyooza alinduwe. ¹² Ndiyochita kuti makamu ako akawisigwe amapanga abasilumamba - awumwi silumamba nchiyoosyo chazisi. Aaba basilumamba bayoselezya kulisumpula kwa Ijiputi akunyonyoona makamu ayo woonse. ¹³ Nkenkaako ndiyonyonyoona zyonse ng'ombe kuzwa kumbali lyamanzi; kuulu kwamuntu takukono chikompenganyi manzi pe, neziba insumba zyang'ombe zikakope. ¹⁴ Mpawo ndiyowumuzya maanzi abo akuyochita milonga yabo kuti ikafwilime mbuli mafuta - aya ngemalayilile a Mwaami Jehova. ¹⁵ Nendayochita nyika ya Ijiputi kuti ikabe busena butakatidwe, eelyo nyika yayosyala nkitachikwe zyakizuzizye, nendayolwisya boonse bakkala mulinjiyo, bayoziba kuti ndime Jehova. ¹⁶ Kuyooba kulila; bana basimbi bazisi bayolila atala anjiiyo; bayokwila atala a Ijiputi, atala amakamu akwe bayolila -- aya ngimalayilile a Mwami Jehova.''' ¹⁷ Mpawo zyakachitika mumunyaka wakkumi ayibili; mubuzuba bwakkumi amusanu bwamweezi, awo ijwi lya Jehova lyakasika kuli ndime, kalyamba kuti, ¹⁸ ''Mwana muntu, kolilila makamu a Ijiputi akubaselezya - lwakwe abana basimbi bazisi zisumpukide - kuyosika anyika ilansi antomwe abaabo bakiinka aansi kudindi. ¹⁹ 'Mulikabotu loko na kwiinda namwi? Amwinke aansi mukale aansi abatapalwiidwe.' ²⁰ Bayowida akkati kabaabo bakajayigwa epanga. Ipanga lyakagwisigwa! Wakapedekezegwa kupanga; bayomujata amakamu aakwe. ²¹ Basilumamba balenguzu bamukabanda bayolayilila atala a Ijiputi abenzinyina, 'Bakaza ansi okuno! Bayolala antomwe abatapalwidwe, antomwe abaabo bakajayigwa epanga.' ²² Asiliya mpali ambungano yakwe yoonse. Tubanda twakwe twamuzyunguluka; boonse bakajayigwa epanga. ²³ Aabo balatubanda tupangilidwe mumalindi mpbali, ambungano yakwe yoonse. Tubanda twakwe tulizyungulukide boonse aabo ibakajayigwa, ibakawisigwa epanga, aabo bakeeta kuyosya anyika yabawumi. ²⁴ Elamu mpali amakamu akwe oonse. Tubanda twakwe tuli muzyungulukide; boonse bakajayigwa. Aabo bakawisigwa epanga, bakaya ansi bakatapalwidwe kuya kubusena bulikunsi anyika, ibakeeta kuyoosya anyika yabawumi alimwi bakabweza bweeme bwabo, antomwe abaabo bakayinka ansi kudindi. ²⁵ Bakabamba bulo bupetedwe bwa Elamu amakamu akwe woonse ali akkati kabusena bwakujayilwa; tubanda twakwe twamuzyunguluka. Boonse tabapalwidwe pe, bakayaswa amapanga, nkambo bakeeta ziyoosyo zyabo anyika yabapona. Aboobo balibwezede bweeme bwabo, antomwe abaabo baya mudindi akkati kabaabo bakajiigwa, aabo bayaaansi mudindi. Elamu ulakkati kabaabo bakajayigwa. ²⁶ Masyekki, Tubbalu, awoonse makamu aabo mpobali! Tubanda twabo twabazyunguluka. Boonse tabapalwidwe pe, bakajayigwa epanga, nkambo bakeeta ziyoosyo zyabo anyika yabawumi. ²⁷ Tabalali antomwe abasilumamba bakaya ku Tubanda antomwe azilwanio zyabo zyoonse zyankondo, alimwi amapanga aabo kawabikidwe munsi lyamitwe yabo azibi zyabo atala lyamafuwa aabo. ²⁸ Aboobo iwebo, Ijiputi, uyotyolola akkati kabatapalwidwe! Uyolala kotobezya aabo bakayaswa a panga. ²⁹ Idomu mpali abaami bakwe, abazululi bakwe boonse. Bakabikidwe munguzu zyabo abaabo bakajayigwa epanga. Bakalala antomwe abatapalwidwe, antomwe abaabo bakaya aansi mudindi. ³⁰ Bana balombe babaami bakunyika mpobali -- boonse aboonse baku Sidoni abakiinka aansi abaabo bakayaswa. Bakali anguzu akuchita bamwi kuti bayoowe, pesi lino babawo mubweeme, kabatapalwidwe antomwe abaabo bakayaswa epanga. Balibwezela bweeme bwabo, antomwe abaabo bayaansi mudindi. ³¹ Falo uyolanga akuyowombozegwa aatala amakamu aakwe woonse ayo akayaswa epanga -- Falo ampi yakwe yoonse -- aya ngemalayilile aa Mwami Jehova. ³² Ndamubikka mbuli sikuyoosya wangu munyika yabawumi, pesi uyolazikwa ansi akkati kabatapalwidwe, akkati kabaabo bakayaswa epanga, Falo amakamu aakwe wonse -- aya ngimalayilile a Mwami Jehova.''