¹ Ijwi lyaJehova lyakaza kuli ndime, kalyaamba kuti, ² ''Mwana wamuntu, sinsima akwamba kuti, 'Mwami Jehova uwamba eechi: kwiila; ''Maawe kuzuba litobela.'' ³ Izuba lilaafwifwi. Izuba lyaJehova lilaafwifwi. Liyooba zuba lyamayooba, chiindi chakunyonyooka kwazisi. ⁴ Mpawo ip[anga liyoosika aatala aIjipita, alimwi kuyooba kupengeleka muKkusyi eelyo bantu bajiidwe nibayoowa muIjiputi, eelyo nibayotola buvubi bwakwe, alimwi intalisyo zyakwe niziyooba matongo. ⁵ Kkusyi aPuti, Lidiya alimwi aboonse baAlabbiya, aLibbiya, antoomwe abantu balimuchizuminano, bayoowa boonse apanga. ⁶ Jehova uwamba eechi: Aboobo aabo bagwasya Ijiputi bayoowa, alimwi kulisumpula kwanguzu zyakwe kuyooya aansi. Kuzwida kuMigidoli kuyosikila kuSyene basilumamba babo bayowisigwa apanga, aaya ngemalayilile amwambila Jehova. ⁷ Bayooyosegwa mukati kanyika zicheede, alimwi muunzi wabo uyooba akati kamyuunzi yoonse yakaba matongo. ⁸ Eelyo bayoziba kuti ndime Jehova, elyo ndayobikka mulilo muIjiputi, alimwi boonse basikumugwasya nibayomwayisigwa. ⁹ Mubuzuba oobo batumwa bayozwa aanze kuzwa kunembo lyangu mumaato kuti bayoosye Kkusyi ukwabilidwe, alimwi kuyooba mapenzi akati kabo kubuzuba oobo bwakumwayisigwa kwaIjiputi. Nkaambo bona! Chiyobuza. ¹⁰ Mwami Jehova waamba eechi: njoochita mamanino kumakamu makamu aIjiputi kwiinda kujanza lyaNebbugadineza, mwami waBbabbiloni. ¹¹ Lwakwe abasilumamba bakwe kabalaamwi, nchiyoosyo chazisi, ziyoyetwa kuti zimwaye nyika: bayogwisya mapanga aabo aatala aIjiputi akuzuzya nyika abaabo bakajigwa. ¹² Ndiyochita milonga kuti ikabe nyika injumu alimwi ndiyowuzya nyika mumaanza aabalumi basizibi. Ndiyochita nyika azili mulinjiyo kuti likabe tongo ajanza lyabazwakule, lwangu ndeJehova, ndakaambuula. ¹³ Mwami Jehova, waamba eechi: ndiyomwaya zikozyanio, akuyoboozya kumagolelo zikozyanio zyabuyo zyaMeempisi. Takwe nikuyooba mwana wamwaami mulombe pe munyika yaIjiputi, alimwi njotila chiyoosyo munyika yaIjiputi. ¹⁴ Mpawo ndiyochita Patilosi chiyosezyo akubika mulilo muZoyani, njojaya inchito zyalubeta aaliTebbesi. ¹⁵ Nkaambo njotila kunyema kwangu aali Pelusiyamu, singuzu waIjiputi, akugonka bwiingi bwaTebbesi. ¹⁶ Mpawo njobika mulilo muIjiputi, Pelusiyamu uyoba mumapenzi mapati, Tebbesi uyootyololwa, alimwi Memfisyi uyolangana abasinkondonyina mazuba woonse. ¹⁷ Balombe bachikula muHeliyopolisyi akuBbubbasyitisyi bayowisigwa apanga, alimwi madolopo aabo ayobikwa mubuzike. ¹⁸ MuTapanesi, izuba liyokachilwa kupa mumuni walyo elyo nentakatyole ijokwe lyaIjiputi ooko, alimwi kulisumpula kwanguzu zyakwe kuyomana. Kuyooba joba linomuvumbide abana bakwe basimbi bayoyenda mubuzike. ¹⁹ Ndiyojaya inchito yakubeteka muIjiputi, aboobo bayoziba kuti ndime Jehova.''' ²⁰ mpawo nikwakaba mumunyaka wakkumi awuumwi, mumwezi wakutanguna, mubuzuba bwamusanu atubili bwamwezi, jwi lyaJehova lyakasika kulindime, kalyamba kuyti, ²¹ ''Mwana wamuntu, ndakatyola Ijiputi. Langa! Taakwe nikwakali kwaangwa pe,nanka kuchitwa kuti kusilikwe achaanzyo, kuchitila kuti kukasime loko kuti kukonzye kujata panga. ²² Aboobo Mwami Jehova uwaamba eechi, 'Langa, ndayimikizyania aFalo, mwami waIjiputi. Nkaambo njotyola kuboko kwakwe, antomwe akusimide akutyokede, akuchita kuti ipanga likawe kuzwa mujanza lyakwe. ²³ Mpawo njomwaya Ijiputi akati kazisi akubasansaania akati kanyika. ²⁴ Njoyumya maboko amwaami waBbabbiloni akubikka panga lyangu mujanza lyakwe kuchitila kuti nkakonzye kumwaya maanza aFalo. Uyotongooka kunembo lyamwami waBbabbiloni antongawuko yamuntu wambakufwa. ²⁵ Nkaambo njosimya maboko amwaami waBbabbiloni, muchiindi eecho maboko aFalo ayoowa. Mpawo bayoziba kuti ndime Jehova, eelyo ndayobika panga mujanza lyamwami waBbabbiloni: nkaambo uyoolwisya nyika yaIjiputi andilyo. ²⁶ Aboobo njowanzaania Ijiputi akati kazisi akubasansaania kwiinda munyika. Mpawo bayoziba kuti ndime Jehova.'''