¹ Mumwaaka wakkumi, mumwezi wakkumi mubuzuba bwakkumi atubili bwamumweezi, ijwi lyaJehova lyakeza kuli ndime, lyaamba kuti, ² ''Mwana muntu, kolwisya Falo, mwami waku Ijiputi, ³ Kokanana kulinguwe akwaamba boobu: Bona! ndime sinkondonyokwe, Falo; mwami waIjiputi. Iwebo, achinyama chipati chamulwizi chiyubide aakati kamulonga, nchiwaamba kuti, ''Mulonga wangu nguwangu. Ndakupanga nkelichitila lwangu.'' ⁴ Aboobo ndiyobika tulobyo mumulomo wako, alimwi baswi bamumulonga wenu Nayili bayojatilila kumakwa aako; ndiyokunyampula kuzwa aakati kamulonga wako antomwe abaswi boonse bamumulonga bajalilidwe kumakwa aako. ⁵ Ndiyokusowela aansi munkanda, webo antoomwe abaswi bamumulonga wako. Uyoowida mumuunda ujulikide; takwepe noyobungikwa nikuba kubusigwa. Ndiyookwaba mbuli chakulya kuzinyaama zipona zyaanyika alimwi akubayuni bakujulu. ⁶ Mpawo boonse aabo bakkala muIjiputi bayoziba kuti ndime Jehova, nkaambo bakali kkuba lyatete kung'anda yaIzilayeli. ⁷ Muchiindi nibakabweza amanza aabo, wakatyola akudeluula makkuko aabo; alimwi wakachitya mawulu aabo kuti atayimi kabotu. ⁸ Aboobo Mwami Jehova waamba boobu: Bona! Ndiyokweetela ipanga liyookulwisya. Ndiyogonka baalumi antomwe abanyama kulinduwe. ⁹ Aboobo nyika yaIjiputi iyoosigwa akuba tongo. Eelyo bayooziba kuti ndime Jehova, nkaambo munyama wamulwizi wati, ''Mulonga nguwangu, nkaambo ndakawuchita.'' ¹⁰ Nkinkaako, langa! Ndiyolwisyania anduwe akuyolwisya mulonga wako aboobo ndiyoopa nyika yaIjiputi kubatongo akutakaanika, alimwi iyooba tongo lyaanyika kuzwa kuMigidolo kusika kuSayini akumigaano yakuKkusyi. ¹¹ Taakwe kuulu kwamwaalumi kuyooyinka mukati, alimwi taakwe kuulu kwamunyama kuyoyinka mukati. Takukoyokkalwa kwamyaaka ilimakkumi aane. ¹² Eelyo ndiyochita nyika yaku Ijiputi kusiigwa aakati kanyika zitakkedwe, amadolopo ayosiigwa kwamyaaka makumi aane; eelyo ndiyomwaya Ijiputi akati kamaasi, alimwi ndiyoyisansaania kumanyika woonse. ¹³ Eelyo Mwami Jehova waamba boobu: kumamanino amyaaka iilimakumi aane ndiyobungania Ijiputi kuzwa kubantu akati kabaabo bakamwayikide. ¹⁴ Ndiyoboozya buzike bwaIjiputi akubwedezya kubusena bwaPetulosi, kunyika nkubazwa. Eelyo kuyooba bwami bulaansi ooko. ¹⁵ Buyooba buniini loko kumaami amwi, alimwi tabukoyobusigwa limbi akati kazisi zimwi. Ndiyobafwiinsya kwakuti tabachiyoyendelezyi limbi zimbi zisi. ¹⁶ BaIjiputi tabachiyoobi chitamizyo kuchaamba chang'anda yaIzilayeli. Anukuti, bayoba chiyeezyo chabubi oobo Izilayeli mbwakachita muchiindi nakalanga kuli Ijiputi kuti bajane lugwasyo. Eelyo bayoziba kuti lwangu ndendime Mwami Jehova.''' ¹⁷ Eelyo kwakaba kuti mumwaka wamakkumi aabili alamusanu atubili mubuzuba butaanzi bwamweezi, kuti ijwi lya Jehova lyakasika kulindime, kaliti, ¹⁸ ''Mwana wamuntu, Nebbugadineza mwami waku Bbabbiloni wakakkazika impi yakwe kukuchita mulimo mupati kukulwisya Taya. Mitwe yoonse wakachikinisigwa manedo yabamabbuwa, alimwi makkuko woonse akachubbuuka. Kakuli kuti lwakwe abasilumamba takwe nibakatambula mufolo kuzwa kuTaya nkambo kamulimo muyumu ooyo ngwakachita kukwilwisya. ¹⁹ Nkinkaako iMwami Jehova waamba boobu, ''Langa! Ndiyopeda nyika yaIjiputi kuli Nebbugadineza mwami waBbabbiloni, alimwi uyotola buvubi bwayo, akuyola zyonse nzyajisi, akuyokukulula zyoonse nzyayojana nkuko; eezyo nzeziyooba mufolo wabasilumamba bakwe. ²⁰ Ndamupa nyika yaIjiputi mbuli impindu nkambo kamulimo ngubakachita kulindime, oyu Mwami Jehova nguwamba oobu. ²¹ Mubuzuba oobo ndiyomezeka lwija kung'anda yaIzilayeli, alimwi njokuchita kuti webo ukaambuula akati kabo, kuchitila kuti bakazibe kuti ndime Jehova.'''